MÜNCHUAK-TSAI 27 - OTSAO BAIBEL (BSI)

Zang Achuakkya Zangjop

¹ Jowanpa a ku zangngai üntoxle ku khosün changpu; ku owa thuachu münzapu. Jowanpae thama pangnu chak tokya ku azün; ku chemtuechu münzapu.

² Chemtue ochax khünakbue single ku lang ang tungpuix, hwom ang chikho thu üntoxle nguak.

³ Süpahi pangwüie ku akhople changkoxchu, ku a chemthuachu münzaüi; zanpabue ku to single changkoxchu, kue Zang to mongongle wüi ngoüi.

⁴ Kue oli tuita Jowanpa ma juüi; kue laxse texkya oli tuita a: Jowanpa hom ma tsünjangmasule ngo angkya, ikhato chix müikya bama abüt angkya, ilaxle chix ang lomzunhüile thüi angkya.

⁵ Thangnak-tuitaile changpongma chixe ku ang ngwotnui faüi; chix Zangshwom-Hom ma chixe ku khosünle thomüi, üntoxle longnu kho ma ku azangle ngo ang tomüi.

⁶ Idaile akhoplaxle tüikya zanpabu to kue wüi anaoüi. Mongmüi tungle akhongle kue chix Zangshwom-Hom ma töbu koxüi; kue tsai ngaoüi, kue Jowanpa achuaküi.

⁷ Kue nyakpongma, O Jowanpa, nange ku kax apahüi! Chingchajaja laxle ku kaxto lanle changhüi!

⁸ Chemtue nange: “Oman, ku to shwomlax le thüipuix, Jowanpa, ku nguiüi”

⁹ Ku thoto nang taxkhün! Nang ang ku füi mongtsikkya taxtüi; nang dapa ku anongle chat ang taxtom. Ku to nange fongle hüipu; ku danle taxtox, ku awütle taxtox, O Zang, ku khosünpa.

¹⁰ Ku anu hia apa hwome ku danlechu toxtüilax, ikoxlechu Jowanpae ku to hume lüwüi ngoüi.

¹¹ Jowanpa, nange chemle texpuix ija ku hama anwot-ano fahüi, thomzün-maklax angkya chitüikya lom to ku zunhüi, chemthüikoxle ku ang zanpabu huanuma tüile.

¹² Ku to othai hia atsekya lomtang makhange single ngokya ku zanpabu chak to ku taxawüt.

¹³ Ija ku tsün ma Jowanpa müikya ngün angkya hanpakma ku ozün ma ngokya kue awanpu.

¹⁴ Jowanpa to mongong tüikox. Mongong tüikox, mong taxatho. Jowanpa to mongongkya tüikox.