MÜNCHUAK-TSAI 26 - OTSAO BAIBEL (BSI)

Müikya khünak Tuita Zangjop

¹ Jowanpa, ija bama kue chemchu müntik koxa, le ngaifa, chemthüikoxle kue chem supuix ija mokwüi ilaxle komkaile mongong thompu.

² Jowanpa, ku to thwontsingle tamchu wanle anohu; ku mongtsukya hia tutex, ibu to kaxfün fale anohu.

³ Chizakkya nang mongkün a ku lom azuikya changle; chialekya nang mongonge jento ku lom zunle.

⁴ Chilaxli khünakbu füi kue üitho chizing; künkux-mongkwombu füi ku ang chem mwot müntüi.

⁵ Ochax üithobu thua ku anule, chichang-chizangkyabu tsiakle toxpu.

⁶ Jowanpa, ku a chem chitikkya mix le aho ang kue chak sopu, nang tö-tsap akhople zangshwom ang angüipu.

⁷ Kue münchuak tsai tuita ngaopu, nang ohünotün mwot pangnu mo wünpu.

⁸ Jowanpa, kue nang ngokya hom to mongkünpu, nang fuazang ngokya onui to a.

⁹ Ochax khünakbu füi tomle ku taxamüt; mix-mik amüitkyabu, othuithuima ochax mokle ngokyabu,

¹⁰ jento zuizunbu lax ang achwonle tüikyabu; ibu pakfün-shalo osho tokya ku dantoxhüi:

¹¹ Ku hanpakpak a, chem supuix ijatix kue mokpu; ku to chingcha-jaja tüihüi üntoxle khosünle kophüi!

¹² Pangnu thama chak tokya ku azangle tüile; chix khünaknu tusox ma kue Jowanpa achuakpu.