MÜNCHUAK-TSAI 24 - OTSAO BAIBEL (BSI)

Chongkya Wanghom

¹ Chaxwannu üntoxle ima atüitüi komkaile Jowanpa kux changpu; haxwan üntoxle ima ngokyabu a chix kux changpu.

² Chixe ija haxwan mongto tüikya tinu ma chifün laxlaxle zaipu, ilaxle ija chifün a molo tinu jimong to zingpu.

³ Jowanpa haxnu to chemningkya khünak dong ang tomüi? Chix Zangshwom-Hom to owa dong ang thoüi?

⁴ Opang mwot hia tutex ma tsaothale tüipuix, owae chapabu to chishwom puix chichangba othai to tsaosaxle chichangpuix, ibutix nguidong tsuaküi.

⁵ Jowanpae hwom to mohimanüi üntoxle hwom khosünüi; Zang-e hwom a chem onu-oma chitüikyabu changpule ngaiüi.

⁶ Zang hato ngui angkya khünakbu a iningkyabu tix changüi, hwom a Jakop Zang hato nguiüi. Selah

⁷ Zünkaibu oka hyetle achenkox kaipongkya fülombu dapkox, fuazangkya chongwangpa ngui angkya changle.

⁸ Ija fuazangkya chongwangpa a owa? Chix a tsak-zongkya tamchu pangnu to lüttsuakkya Jowanpa changle. Jowanpa, chixe azankya pangnu to lüt.

⁹ Zünkaibu oka hyetle achenkox, kaipongkya fülombu dapkox, fuazangkya chongwangpa ngui angkya changle.

¹⁰ Ija fuazangkya chongwangpa a owa? Pangnusa to lüttsuakkya Jowanpa: chix a ija fuazangkya chongwangpa changle! Selah