MÜNCHUAK-TSAI 21 - OTSAO BAIBEL (BSI)

Zan to Lütkya hanpakma Achuakkya

¹ Nange chix ang janzüi koxkoxle, O Jowanpa, wanghompa ang mongmüile; nange chix ang zan to lüt ang tomkya khoma tüle mongmüile.

² Chix mongto thütkya nange chix ang koxpu; chixe ju-lomkyabu to nange lanpu. Selah

³ Nang chix hato chongkya mohiman füi nguipu ilaxle chix khang ma hun khohom sünle koxpu.

⁴ Chixe khüzün jupu, ija nange koxpu, tüle tsünlo zaknuikya khüzün a.

⁵ Nange asunkya tüikoxle chixe huanu fuazangkya koppu; nange chix ang mün chongkya hia apün-ada angkya koxpu.

⁶ Nang mohiman a chix füi jento ngole, ilaxle nang womle tüikya mongmüie chix awangle.

⁷ Wanghompa-e Jowanpa Khüthak Zang to mongongpu; üntoxle chizakle Jowanpa mongkün khokho ma chix a jento khang azangle ngoüi.

⁸ Wanghome chix zanpabu pangwüi kopüi; chix to miktsakkyabu tyale chixe kopüi.

⁹ Chix ngaikya zuma chixe ibu wün füi zokle ashunkya ningle olithu ang tomüi.

¹⁰ Hwomsu-hwomsabu tuitachu ozün ma müntoxüi; wanghompa-e hwom pangwüi langle awütüi.

¹¹ Hwome chix zan to ka angkya katzua laxüi, ikoxlechu hwome chithoüi.

¹² Chixe hwom to chix sanhap füi hapüi ilaxle hwom anongle afüt achatüi.

¹³ Chongkya nang janzüi khoma, Jowanpa, kwome nang achuakpu! Nang tsak-zong achuakle kwome tsai ngaopu.