MÜNCHUAK-TSAI 19 - OTSAO BAIBEL (BSI)

Ding-hi-hax Zingpongma Zang Fuazang

¹ Zangdinge chemtukux tsaothale Zang fuazangkya angai puix! Chixe mokdaokya mwotbu tsaothale chemle ahopuix!

² Hanpak tyale ofüinyix bama ija kax tsingang tompu; zangnak foto ija kax ofüija hanpak ang chithaile tsing ang tompu.

³ Kaxfa chichangba zangwün chemchu chilaxpu, ozing chemchu chiatatpu;

⁴ Ikoxlechu hwom kaxho chaxwannu pangnu khato pule paopu, üntoxle chaxwan otua ozang alople atat ang koppu. Zanghan hanpakma zangdingkho to chix hom zaile koxpu;

⁵ tui to ju ang achwonlaxle tüikya tüinao tuita ningle ija anopning swomsa ma laipu, zik mix tuita zik ang achwon laxle ngokya ningle a.

⁶ Zangdingkho kaochi makhange tüchikao alople ija ahampu. Ija zangkham to tukle tui ang chithopu.

Jowanpa Wanlom

⁷ Jowanpa Wanlom a okhonguikya changle; ijae janzüi hozün koxle. Jowanpa kaxtombu a mongong tüikya wüi changle, je chitüikyabu ang je kox.

⁸ Jowanpa wanlombu a otsingtsing changle, üntoxle ibu kax ma laxle tüikyabu ang mongmüi tüile. Jowanpa kaxtombu a sukya changle üntoxle tutex ma atsing-awankya koxle.

⁹ Jowanpa chathua zale tüikya a amüikya changle; ija a tamchithwonle jento ngole. Jowanpa kaxfünbu a sukya changle; ibu a othuithuima mapai-mix-chizünkya kaxfün changle.

¹⁰ Hun amüikya füi ngaxchu ibu wüi laxse tsule; nax-ti tsaothakya füi ngaxchu ibu wüi sütile.

¹¹ Ibue, ku, nang dapa ang tsing-wankya koxle; Ibu kax ma laxle tüikya khoma ku to mohimanle.

¹² Kem owaechu ma thaikyabu mae alüile ngün ang müntho; Jowanpa, thaikya khomle thomkyabu chak tokya ku azünhüi!

¹³ Anaole chu chaktung ochaxbu chak tokya ku azünhüi; ibue ku thakma apün ang taxkox. Ile chang füima ku nguiwangkya tuita ang achangüi ilaxle ochax haxshix chak tokya ku khangkho zangngaile changüi.

¹⁴ Ku zangwün hia ku tutexbu nang zongto pongle koptsuakkya lima naxchang, O Jowanpa, ku khangkhom nui üntoxle ku shakkop-pupa!