MÜNCHUAK-TSAI 18 - OTSAO BAIBEL (BSI)

Tholün pongma Ngaokya Dawid Tsai

¹ Jowanpa, kue nang to chemtukux mongkünpuix! Nang a ku khowa-pa changle.

² Jowanpa a ku kho-wa pa changpu; chix a shingmongkya ku zanhunuibu changpu. Ku Zang a ku wintuk-hantha changpu, üntoxle chix füi ku azangle ngopu. Di lailaile chixe ku kho awale thompu; chixe ku khosele üntoxle khosünle thompu.

³ Kue Jowanpa to nyakpu, üntoxle chixe zanpabu chak tokya ku khosünpu. Jowanpa achuak-achyenpu!

⁴ Zikmüt-mangkho thama ku akhople tüi; thama adün angkya tichene ku to ule hüi.

⁵ Zikmüt-mangkho thama ku akhople tüi, üntoxle zuk-khae ija kam thale ku tsüntüi.

⁶ Ku sikngün pongma kue Jowanpa to nyak; ku to asun angkya hanpakma kue Zang nyak. Chix zangshwom-hom ma chixe ku kaxzing atatlelax; chixe fong angkya mix lomle ku sopkya apalelax.

⁷ Ifüima haxwan sile achen üntoxle alox; haxnu chifünbu kang üntoxle atsun, chemthüikoxle Zang ang mongtsik dong.

⁸ Chix nakua makhange wünkhut othwom-othwom alai, zokle ashunkya wünle hia wün füikya wünhan chix wikha makhange alai.

⁹ Chixe zangding akyetle awüt laxle chix cha fang ma zangfwom fwomnak laxlaxle thai.

¹⁰ Ozang füikya chix zünmok ma chix pile pao; zangwin ozangtok ma chix aham.

¹¹ Chixe chix to zangnak füi chwop; tüle atyenkya, ti awangkya zangfwome chix to akhople kop.

¹² Jun-longbu hia wün ajik-ajepkya zangchangjep makhange chix tunthoma lai üntoxle zangfwom fwomnak afile lai.

¹³ Ifüima Jowanpa-ezangding tokhange atsak-adung ang tom; üntoxle Khüthak Zang kaxzing atat ang kop.

¹⁴ Chixe chix sanhap füi hap üntoxle chix zanpabu afale pao ang tom; zangchang ajik-ajeple changkya thoto hwom zikle pao ang tom.

¹⁵ Jowanpa, nange nang zanpabu to sale changpongma tamchu mongtsik füi hwom füi shixle changpongma, Molo Tinu jimong ohua ma dantox, üntoxle haxwannu chifün a kothoza to tox.

¹⁶ Jowanpae ding tokhange ku to chux üntoxle chix chak ma kop; chixe ku tüle zukya tinu mongkha tokya be-le alai.

¹⁷ Chixe ku tüle zongle tüikya ku zanpabu chak tokya kople azün, üntoxle chu ku to miktsakle tüikyabu chak tokya azün: hwom a ku zongto tüle tsakle tüikya.

¹⁸ Ku sikngünle tüi pongma hwome ku to sing, ikoxlechu Jowanpae ku sünle kop.

¹⁹ Zyama chak tokya ku to chixe fongle kop; chix ang ku füi mongmüikya tüikya khoma chixe ku khosünle kop.

²⁰ Kue changkyakya wüi mokkoxle Jowanpae ku ang hingho koxle; chixe ku to mohimanle chemthüikoxle ku a oma chemchu chitikkya mix chang koxle.

²¹ Kue Jowanpa kaxtom kax ma laxle hüipu; Kue ku Zang hato tok otuechu chiahopu.

²² Kue chix wanlombu pangwüi tole hüipu; kue chix kaxtom kax ma chilaxle chitüitoxpu.

²³ Ku ma thaikya chemchu müntüile chixe tikle ngopu, chemthüikoxle thaikya mwot füi ku lualua to atsaile ngokoxpu.

²⁴ Ile kue sukyakya wüi mokkya khoma chixe ku ang hingho fapu, chemthüikoxle ku a oma mün chemchu chitikkya mix changpule chixe awanle ngokoxpu.

²⁵ O Jowanpa, nang to mongong thomkyabu zongto nang a mongong ma chialekya Zang changpu;

²⁶ tsaothakyabu zongto nang tsaothale tüipu, ikoxlechu chichangchizangle tüikyabu zongto zanpa ang changpu.

²⁷ Nange pui-hi-naikyabu khosünpu, ikoxlechu ongam füikyabu nange fang to ajopu.

²⁸ O Jowanpa, nange ku ang zangngai koxpu; nange ku zangnak sam ang tompu.

²⁹ Nange ku ang zanpabu to sing angkya janzüi koxpu, üntoxle chu hwome ziakople thomkyabu to anao angkya tsak-zong koxpu.

³⁰ Zang ija: chix mwotbu chemtukux okhonguikya hex! Chix zangwünbu ma chemtukux mongong angkya tüipuix! Kho-awa angkya chix ma lomkyabu hanpakma chix a di tuita ningle changpu.

³¹ Jowanpa, chix tata tix Zang changpu; Kem wintuk-hantha angkya Zang chix tix changpu.

³² Chix a ku tsak-zong ang tomkya Zang changpu, chixe ku lomtang chem chabüt-lasün angkya chitüile zingpu.

³³ Chixe ku a müikhi lailaile chikho chiasua angkya ang zingpu; chixe ku haxnukho to khosünle thompu.

³⁴ Chixe ku ang zankat anole koxpu, kue atsakkya hapnu twon ang tho angkya hanpakma a.

³⁵ O Jowanpa, nange ku zia koppu üntoxle khosünle thompu; nange ku nuazingkyae ku achenpu, ilaxle nang tsak-zonge ku thangshix chemchu chitüile thompu.

³⁶ Zane kople changhaxkux chak tokya nange ku ziakople thompu, ilaxle ku a tamchu chinguakpu.

³⁷ Achua laxle kue zanpabu koppu;

³⁸ Kue hongle anguakkya hwom a tamchizopu; ku pomtho ma hwom a lütdaokyabu ang achangle ngopu.

³⁹ Nange ku ang azan angkya janzüi koxpu, ilaxle zanpabu to kue wüi anao ang tsuakpu.

⁴⁰ Nange zanpabu ku thoto zikle pao ang koxpu; Ku thua anukyabu kue amüt ang tompu.

⁴¹ Fong angkya lomle hwom soppu, ikoxlechu hwom kho owaechu chisünpu; hwome Jowanpa to nyakkoxlechu chixe chilanpu.

⁴² Kue hwom zutle akhixpu, ikhoma hwom zangwin to jeple paokya haxbu ang achangpu. Lomnutang tokya haxthom to nakpupule kue hwom to nakpu.

⁴³ Nange ku olün-olox khünakbu chak tokya khosünle koppu, ilaxle ku chaxwanbu thakma apünkya mix ang achangpu; kue chitikkya khünakbu athax a ku wangpün ang achangpu.

⁴⁴ Mixnokbue ku chitong ma akhuxpu; ku zing atatle changpongma hwome ku kax ma laxpu.

⁴⁵ Hwome hwom mongchen amütpu, ilaxle zanhunuibu angkya hwom abünpu.

⁴⁶ Jowanpa ozün ma tüile! Ku khowa-pa achuakle changkox! Ku khosünle kopkya Zang chongkya khuapukox.

⁴⁷ Chixe ku ang zanpabu to lüt ang koxpu; chixe chaxwannu nok ku fang to ajopu,

⁴⁸ ilaxle zanpabu chak tokya ku khosünpu. O Jowanpa, nange ku ang zanpabu to lüt ang tompu, ilaxle changnong-pünthomle tüikyabu chak tokya nange ku azünpu.

⁴⁹ Ikhoma kue nang onokbu khato achuakpu; kue nang achuakle tsai ngaopu.

⁵⁰ Zang-e chix wanghom ang zanbu to lüt ang koxpu; chixe zünle kopkya mix hato chizakle chixe mongkün ahopu, othuithuima Dawid hia chix sixli hwom hato a.