MÜNCHUAK-TSAI 17 - OTSAO BAIBEL (BSI)

Oma chemchu Chitik-chiwankya Khünak Zangjop

¹ Jowanpa, sukya kaxfün bama kue tsaiju-kaxjukya to apahüi; fonghüile ku sopkya to natha hüi! Loplüile chitüikya ku zangjop to apahüi.

² Nange kuchima sele kaxfün faüi, chemthüikoxle chem supuix ija nange awan ngopu.

³ Nange ku mongkha awan ngopu. Nang ku hato zangnak ma nguipu; nange ku to komkaile wanle anopu, ilaxle ku ma ochax lom to mongtsukya chemchu chiatakpu. Mix lailaile

⁴ kue ochax zang chiwünpu; kue nang kaxtom kax ma laxpu ilaxle changnong-pünthomle tüikya lomtang chitopu.

⁵ Othuithuima ku nang lomtang ma ahampu, ilaxle ija angkya ku atsaile chipaopu.

⁶ Kue nang to joppu, O Jowanpa, chemthüikoxle nange ku kax to lanpu; idaile kuchi to huhüi üntoxle ku kax to apahüile thüipu.

⁷ Nang ohünotün mongkün angai üntoxle ku khosün hüi; nangchi kaoma ku a zanpabu pangnu chak tokya azangle tüile.

⁸ Nange nang mik chemle azünse hex ile ku azünhüi; nang kui-hi-zang fangto ku pyenle thom hüi,

⁹ chichang-chizangkya khünakbu zansing chak tokya a. Mik amüt angkya zanpabue ku akhople tüile;

¹⁰ hwom ma chingcha chemchu müntüi üntoxle ongamngam zangwünle.

¹¹ Ku alele chito hwom a ku akankhople tüile. Hwome ku chika wüi angkya ziasyen to hule ngole.

¹² Ku tan ang hwom a mailangbu lailaile; hwome ku ashikle akhixse tsule.

¹³ Jowanpa, hüihüi! Ku zanpabu to abaxkox üntoxle hwom to lütkox! Nang changlo füi baozangbu chak tokya ku khosünkox.

¹⁴ Ija chaxwannu tsün ma laxsese komle tüikyabu chak tokya ku khosünle thomkox. Hwom hanpak ang athünle thomkya zothup füi hwom to sikangünkox; hwom sasün hwom hanpakma nguizuile naxtüi, üntoxle hwom susün hwom hanpak angchu ota tüile naxchang kox!

¹⁵ Ikoxlechu kue nang ngün ang kopüi, chemthüikoxle kue thaikya mwot chimok; üntoxle chemtue ku zopuix, nang womle tüikya mongmüie ku awangle tüiüi.