MÜNCHUAK-TSAI 16 - OTSAO BAIBEL (BSI)

Mongong Zangjop

¹ Ku khosün hüi, O Zang; azang angkya hanpakma kue nang to ongpu.

² Kue Jowanpa ang thüipu: “Nang a ku Jowanpa changle; ku ma tüikya müikya oli pangwüi nang makhange tix hüipu.”

³ Jowanpa to mongong tüikya khünakbu chemtukux ataxkya hex! Hwom füi ngo angkya a ku mongmüi akhokya changpu.

⁴ Mama baozangbu hato paokyabue hwom hato alüile thamabu apüile. Hwome tö koxkyabu khato ku münwomüi; kue hwom baozangbu to münshwomüi.

⁵ Ku ma atüitüi pangnu, Jowanpa, nang tata wüi, üntoxle kue laxli pangwüi nange ku ang koxpu; ku khüzün füichi hanpak nang chak tüipu.

⁶ Ku ang koxkya nang hingho ohünotün changpu; ibu ku zongto huanuma müipu!

⁷ Chixe ku lomzunkya khoma, kue nang achuakpu, Jowanpa ilaxle zangnak ma ku tutexe ku ang kaxkhün koxle.

⁸ Jowanpa womle tüikya kue othuithuima awanle; tütaechu ku to sile alox ang müntho, chix a ku zui ma tüile.

⁹ Ikhoma ku ang huanuma mongmüipu üntoxle münchong fapu, üntoxle ku komkaile khosünle tüile le awanpu,

¹⁰ chemthüikoxle zikmüt-mangkho pangnu tsak-zong chak tokya nange ku sünle thompu. Mongong tüikya füi kue nang thothapu, ilaxle nange ku amalum fangto awütle chichangüi.

¹¹ Khüzün lom to alyet angkya lomtang nange ku hama ahoüi; nang womle tüikya ma ku mongmüie awang üntoxle othuithuima ku ang mongmüi apüi.