MÜNCHUAK-TSAI 149 - OTSAO BAIBEL (BSI)

Zang Achuakle Ngaokya Tsai

¹ Jowanpa achuak kox! Jowanpa ang tsaizün tuita ngaokox; chix to mongong tüikya khünaknu tusox ma chix achuak kox!

² Hünzom Zingpupa hanpakma mongmüikya tüikox, hünzom Israel; hünzom wanghompa bama Zaion angkya khünaknu, hünzom ang mongmüikox!

³ Azüizüithale chix mün achuak kox; chix achuakle büi-hong samthu üntoxle thuaput-waxmai mütle changkox.

⁴ Jowanpae chix khünaknu füi mongmüile; puinaile changkyabu chixe zan to lüt ang tomkya füi achuak-achenle.

⁵ Hwom zan to anaokya bama Zang khünakbu mongmüi-pwonlakox ilaxle zang angaile pwonlatungle tsai ngaokox.

⁶ Hwome Zang achuakle changpongma akhong ang tomkox, hwom chak ma nong-nong-naxkya changlobu koplaxle

⁷ chaxwannu jat-libu to anao ang ilaxle khünaknu ang sikngün kox ang;

⁸ hwom wanghombu janbüi füi khale kop ang, hwom lompabu janbüi füi khakop ang;

⁹ chaxwannu jat-libu to Zang kaxtom ma sikangün ang. Ija a Zang khünaknue zan to anaokya changüi. Jowanpa achuak kox!