MÜNCHUAK-TSAI 144 - OTSAO BAIBEL (BSI)

Zan to Lüt-tsuakkya hanpakma Wanghompa-e Zang ang Münchong Fa

¹ Ku khowapa, Jowanpa achuak kox! Chixe ku ang azan angkya anole fa ilaxle ku zan to ka ang achwonkox.

² Chix a ku khowapa tamchu wintuk-hantha, ku khangkhomnui tamchu khosünpa changpu. Chem khong-kha chitüile ngo angkya hanpakma kue chix to mongong thompu. Chixe chaxwannu nok ku chitong to pui ang tom.

³ Jowanpa, khünak a nange e-se tang chem changkya? Nange e-sele chang tang chemchu chitüikya!

⁴ Kwom khünak a tuita zangwin thatha; kwom hanpakbu a obato lele paokya chaxba tuita ningle.

⁵ O Jowanpa, zangding akyet kadaplaxle juhüi; ilaxle haxhuabu to lyetkox, ibu makhange wünkhut thokle alaiüi.

⁶ Zangchangjep wünnyan ahüilaxle nang zanpabu afale pao ang tomkox; nang sanhapbu füi haple hwom zikle pao ang tomkox.

⁷ Ding tokya thailaxle, jithong tokya bele alaile ku azünhüi; mixnokbu tsak-zong chak tokya ku khosünhüi;

⁸ hwome chemtuechu kaxtsing zang münwün ikoxle tsaosax lejao atsele.

⁹ O Zang, kue nang ang tsaizün tuita ngaoüi; kue thuaput-waxmai mütle nang achuakle tsai ngaoüi.

¹⁰ Nange wanghombu ang zanbu to lüt ang tom ilaxle nang dapa Dawid nange azün.

¹¹ Künshix-mongmale tüikya ku zanpabu chak tokya ku khosünhüi; mixnokbu tsak-zong chak tokya ku azünhüi. Hwome chemtuechu kaxtsing zang münwün ilaxle tsaosax lejao hwom atsele.

¹² Kwom sasün hwom düla ma tüipongma otong mongle tsongkya pünbu ningle chang ang tomkox. Kwom sacha hwom a wanghom homkha osün amüile tüikya otong mongkya fakngombu ningle chang ang tomkox.

¹³ Kwom pungbu a tua-tsax tamchu tsaxsa-hikhae awangle chang ang tomkox. Kwom wun ma tüikya chunbue hosabu jatbün-jattsa puxle tsa ang tomkox.

¹⁴ Kwom tsom-pombue ojao ashix-akhaxkya chitüile okhonguile pu-tsa ang tomkox. Kwom tingjang lomnu to mangsople nuzaokya tüi ang taxtom.

¹⁵ Otsingtomtata ma ile changkya onok-oza a mongmüi tüikya nok-za changpu; Jowanpa a opang Zang changlaxpuix, mongmüi angkya a hwom changpu!