MÜNCHUAK-TSAI 139 - OTSAO BAIBEL (BSI)

Zang-e Tsingwankya hia Humele changkya Okhonguikya

¹ Jowanpa, nange ku to thwontsingle anopu ilaxle ku tsingle laxpu.

² Kue mokkya komkaile nange tsingle laxpu; tsai-tokhange nange ku mongtex bakle awan laxpu.

³ Kue mwot mokle ngopia hia nazakle ngopuix, nange ku ngünle ngopu; ku chak-mwot komkaile nange awan ngopu.

⁴ Kue akaxüi thoto wüi, kue chem akaxüihex nang komkai tsinglax ngopu.

⁵ Nang a pangnu chima wüi ku akhop-khakle ngopu; nange ku nang tsak-zong füi kho-awa koppu.

⁶ Nange ku bama tsingkya a müimamale zule; ija a kue tsingkya to ngaxchu akaile changpu.

⁷ Nang Chasa tuntho tokya ku ojongto paoüi? Chichangba nang ku nang chitüikya ojongto paole azangüi?

⁸ Ku dingkho to dongkoxchu, ikhato nang tüi! Kue Sheol to ku jipnui zikoxlechu, ikhatochu nang tüi!

⁹ Ku zanghan-dün ting alople ku pile paokoxchu chichangba tinu kax haxtua-zangnam to ku ngole changkoxchu,

¹⁰ ikhato ngaxchu wüi nang chake ku zunüi, ilaxle nang chake ku to künüi.

¹¹ Kue: “Ku to komkaile zangnake alumle naxchang, ilaxle ku akhople tüikya zangngai a zangnak ang naxchang”, le thüikoxchu,

¹² ija zangnak a nang zongtochu huanuma zangnak chang koxlechu, zangnak a anyixning lailaile zangngaile changüi; chemthüikoxle nang füi a zangnakchu zangngai ningle changpu.

¹³ Chemthüikoxle ku okhax-omong komle nange zingpu, anu wok-kha towüi nange ku athut-apongle zingle tsuakpu.

¹⁴ Kue nang achuakpu, chemthüikoxle nang a za-adünkya tamchu ohünotün changpu. Nang mwotbu a ohünotün changle! Nange ku tsaothale tsing-ngopu;

¹⁵ Chaxwannu othong zukya khato nakthai-ole ku athut-apongle, ku otsao ma zingpongma ku pum-tsa a nang miktho ma pyenkya chitüi.

¹⁶ Nang laipex oja ma hwom pangnu bama zakya tüipuix, hanpak ku bama zingkyabu, hwom tuita chu matüi pongma ku tsangtsa mazing tanto wüi nange ku ngünle ngo.

¹⁷ O Zang! Nang tuitex a ku zongto chemtukuxkya thalix changpuix! Nange ibu athütkya chemtukux chongle changpuix!

¹⁸ Kue ibu akiak-hax thüikoxle, ibu a sak büta achangle. Chemtue ku zopuix, ipongmachu ku nang füi ngole tüile.

¹⁹ O Zang, nange ochax khünakbu langle awütkox müisele texpu, ilaxle changnong-pünthomle tüikyabu ku füi atsaile ngokoxle müihusele texpu.

²⁰ Chixe nang mowün amale, hwome nang zongto chimüikya kaxbu akaxle!

²¹ O Jowanpa, nang thua anule changkyabu thua ku mün-anu hexnyi? Ilaxle kue nang zongto chichangle tüikyabu wünhaile münchang hexnyi?

²² Kue hwom thua komkaile anule; kue hwom a ku zanpabu ang ele.

²³ O Zang, ku lomlax, ilaxle ku kün-mong awanlax! Wanle anolax ilaxle ku tutexbu tsingle koplax!

²⁴ Ilaxle ku ma tütali chichang-chizangkya olom tüilaxcha le hulax, ilaxle oshuk chitüikya lom to ku azuihüi!