MÜNCHUAK-TSAI 119 - OTSAO BAIBEL (BSI)

Jowanpa Wanlom

¹ Thaikya chitüile Jowanpa wanlom fang ma ngotsuak puix, ibu khüzün a mohiman changpu.

² Opange hwom kün-hi-mong makhange abakle chix kax ma laxle chix kaxtombu tole tüipuix, hwom a mohiman.

³ Hwom chemtuechu münthai; hwom a Jowanpa lomtang ma ahamle.

⁴ Jowanpa, nange nang wanlombu kwom ang koxpu ilaxle chiale lüibu kax ma laxle tüi angkya kwom füi akaxpu.

⁵ Nange adangle fakyabu thom angkya bama otuechu münaleüi le kue chemtukux monghompuix!

⁶ Nang kaxtombu to mongkoxle jangchang thüiningle, ku ang zakkop ang müntomüi.

⁷ Kue nang otsao kaxfün tsingle hüikya füi tomtomle, küntsao-mongtsaokya füi kue nang achuaküi.

⁸ Kue nang wanlombu kax ma laxle tüiüi; chemtuechu ku danle taxtox!

Jowanpa Wanlom Kax ma Laxkya

⁹ Khüse-naochabue ma tsün atsaole chemle thomüi? Nang kaxtombu kax ma laxle tüikya füitix.

¹⁰ Ku kün-mong abakle koxle kue nang thotha ang azongpu; ku nang kaxtombu kax ma chilax homle ngo ang taxtom.

¹¹ Kue nang zongto ochax chilyen angkya hanpakma kue nang wanlom ku mongkha ma thompu.

¹² Kue nang achuakpu, O Jowanpa; ku hama nang lomtangbu anole fahüi.

¹³ Nange ku ang koxkya wanlombu pangwüi kue akhongle noxüi.

¹⁴ Tuina huanuma tüile changkya füi ngaxchu sütsexle, nang kaxtombu mantole chang angkya ku ang mongmüipu.

¹⁵ Nange adangle fakyabu kue otua lompu; kue nang hwon-nwotbu thwonlop ang azongpu.

¹⁶ Nang wanlombu füi ku ang mongzom müipu; kue nang kaxtombu münalak.

Jowanpa Wanlom ma Mongmüikya

¹⁷ Kue nang hwon-nwotbu kax ma laxle ozün ma ngo kuxma, nang dap, ku füi nang müihüi.

¹⁸ Nang wanlom ma tüikya ohünotün otsingtsingbu ngünle lax angkya hanpakma, nange ku ang ku mik daple fahüi.

¹⁹ Ku ija chaxwannu ma onox tuita hanpakma ngopu; ku pomtho ma nang kaxtombu khomle taxchang.

²⁰ Othuithuima nang kaxfünbu awanle laxsele; ku mongkha ma sungkya bule tüile.

²¹ Ngamkya mix to nange sale; nang kaxtombu kax ma chilaxle tüikyabu othuak-ozom changpu.

²² Hwome sa-makya hia aza-anakya füi ku atsaile thom hüi, chemthüikoxle kue nang wanlombu thompu.

²³ Apün-adakyabu asoxlaxle ku zan to ka ang tung, ikoxlechu kue nang hwon-nwotbu awan ang azongüi.

²⁴ Nange adangle fakyabue ku ang mongzom amüile; ibu a ku zongto adangpabu changle.

Jowanpa Wanlom Kax ma Laxle tüiang Mongzangwünkya

²⁵ Ku a mixe lütlaxle haxbu khato nguakle tüile; nange tsaodaokya ningle ku chatle azünhüi.

²⁶ Kue mokdaokyabu pangnu kue ngaipu, ilaxle nange ku to lanpu; ku hama nang lomtangbu apua-ano fahüi.

²⁷ Nang wanlombu awanle lax angkya ku to asunhüi, ilaxle kue ohünotün nang hwon-nwotbu bama zule ajangüi.

²⁸ Ku to mongmae lütlaxle tüile; nange tsaodaokya ningle ku tsak-zong ang tomhüi.

²⁹ Ku chichangkya lom tole ang taxtom, ilaxle nang müikya füi ku hama nang wanlom anwot-anole fahüi.

³⁰ Kue kax ma laxle tüi angkya zünle kopdaoa; kue nang kaxfünbu to mongkoxle changdaoa.

³¹ Jowanpa, kue nange adangle fakyabu tole changdaoa; kue thünzak kop ang taxtom.

³² Kue mongtsutsule nang kaxtombu kax ma laxle tüiüi, chemthüikoxle nange ku ang tsing-wankya anaolechu kox angkya changle.

Tsingwan angkya bama Zangjopkya

³³ Nang wanlombu chem hex ija ku hama anole fahüi Jowanpa, ilaxle kue othuithuima ibu kax ma laxle tüiüi.

³⁴ Nang wanlom ku hama akhixle wünfahüi, ilaxle kue ija kax ma laxüi; ija kue zongbakle mongkha ma thomüi.

³⁵ Ku a nang kaxtombu kax ma laxle thom hüi, chemthüikoxle ibu ma kue mongmüi atakle.

³⁶ Hakpa-luapa ang achangkya füi nang wanlombu kax ma laxsele tsukya mong ku ang fahüi.

³⁷ Kue chilaxlibu to mongkoxle ngo ang taxtom; nang tsaodaokya ningle nang ku zongto müihüi.

³⁸ Nang kax ma laxle tüikyabu hanpak ang tsaokya nang kaxtsao: nang dapa ku hanpak ang thom hüi.

³⁹ Ku zale ngokya thajao-wünhai chak tokya ku azünhüi; nang kaxfünbu chemtukuxkya ohünotün changpuix!

⁴⁰ Kue nang kaxtombu kax ma laxse tsule; ku a tsün hozün fahüi, chemthüikoxle nang a otsao changle.

Jowanpa Wanlom to Mongong Thomkya

⁴¹ Jowanpa, nange ku to chemtukux künpuix, ija ahohüi ku hama, ilaxle nang kaxtsao tüikya ningle ku khosün hüi.

⁴² Ifüima ku adix-adale changkyabu kax to kue lantsuaküi chemthüikoxle kue nang kax to mongongpu.

⁴³ Othuithuima ku ang otsingtsing kax akaxtsuak ang tomhüi, chemthüikoxle ku monghom a nang kaxfünbu ma tüile.

⁴⁴ Tamchu chiashuktoxle, jento kue nang wanlom kax ma laxüi.

⁴⁵ Ku a komkaile khangkho-zangngaile ngoüi, chemthüikoxle kue nang hwon-nwotbu kax ma laxle chang ang azongpu.

⁴⁶ Nang kaxtombu kue wanghombu hato tsing ang tomüi ilaxle ku ojao münazaküi.

⁴⁷ Nang kaxtombu kax ma laxle changkya ma ku ang mongzom müile, chemthüikoxle kue ibu to mongkünle.

⁴⁸ Kue nang kaxtombu chathua zapu tamchu ibu to mongkünpu; kue nange adangle fakyabu to zule ajangkya tüiüi.

Jowanpa Wanlom to Mongong-chalomkya

⁴⁹ Nang dapa ku füi nange tsaosaxkya texle ataklax; ku ang ijae monghom koxle.

⁵⁰ Sikngün-mongthang pongma ngaxchu kue mongsom kople, chemthüikoxle nang tsaotsüte ku ang khüzün fale.

⁵¹ Ngamkyabu to kue jento sale ngopu, ikoxlechu nang wanlom angkya ku atsaile chipao.

⁵² Kue kaiwüikya nang kaxfünbu texle-atakpu, ilaxle, O Jowanpa, ibue ku ang mongsom fale.

⁵³ Chemtue chichang-chizangkya khünakbue wanlom pünle changkya kue ngünpuix, ku a mongtsike awangle.

⁵⁴ Chaxwannu ma onox ma ozün ma ngopongma kue nang kaxtombu bama tsai zingpu.

⁵⁵ Zangnak ma kue nang texle atakpu, Jowanpa, ilaxle kue nang wanlom bama ajangpu.

⁵⁶ Nang kaxtombu kax ma laxle changkya ma kue ku mongmüi atakpu.

Jowanpa Wanlom to Mongkoxkya

⁵⁷ O Jowanpa, nang a kue lomkya pangnu changpu; nang wanlombu kax ma laxle tüi angkya kue tsaopu.

⁵⁸ Nang kaxtsao tüikya ningle, ku to chingcha angkya, ku mongkhae abakle kue nang ma jupu.

⁵⁹ Chemtue kue ku lomtangbu ajangle anopuix, nang bama sakhi fa ang cha tswon angkya kue achatpu.

⁶⁰ Shenle chingo homle nonokhaile ku nang kaxtombu kax ma laxle tüi ang zikpu.

⁶¹ Chichangchizangkyabue ku lomtang ma kam thale tüile, ikoxlechu kue otuechu nang wanlom münalak.

⁶² Nang otsao kaxfünbu achuak ang ku zangnak twomtingle ngaxchu mik azangle zopu.

⁶³ Ku a nang thothale ngokya pangnusa zuikhui changpu, nang wanlom kax ma laxle tüikyabu zuikhui a.

⁶⁴ Jowanpa, chaxwannu a ojem chifünkya nang mongküne awangle tüile; ku hama nang Wanlombu anwot-anole fahüi.

Jowanpa Thalixkya

⁶⁵ Jowanpa, nange nang kaxtsao thomdaoa, ilaxle nang a, ku nang dapa zongto müipu.

⁶⁶ Ku ang je-hi-hwon laxhüi, chemthüikoxle kue nang kaxtombu to ongpu.

⁶⁷ Nange ku to sikngün faüi thoto, ku a thaile ngohomkya, ikoxlechu athax kue nang kax-kax ma laxpu.

⁶⁸ Nang a chemtukux müipuix tamchu chingchale tüipuix! Ku ang nang hwon-nwotbu anole fahüi.

⁶⁹ Ongambue ku bama atsele wündaoa, ikoxlechu ku mongkhae abakle kue nange adangle fakya kax ma laxpu.

⁷⁰ Hwom ma tsing-wankya chemchu müntüi, ikoxlechu nang wanlom ma ku mongmüipu.

⁷¹ Ku to sikangünkya ku zongto müikya, chemthüikoxle ijae ku ang nang kaxtombu awan ang tomle.

⁷² Nange ku ang fakya Wanlom ku zongto müima müile, chaxwannu angkya ngun-syen pangnu füi ngaxchu wüi sümüi.

Jowanpa Wanlom Sukya

⁷³ Ku nange zing, ilaxle nange ku khüzün müile thom; kue nang wanlombu tsingle lax angkya hanpakma, ku ang tsing-wankya fahüi.

⁷⁴ Hwome ku ngünkya zuma nang achuak-achenle tüikyabu ang mongmüiüi, chemthüikoxle kue nang kaxtsao to mongongpu.

⁷⁵ Jowanpa, nang kaxfünbu a otsao changpule kue awanpu, ilaxle nang ma chialekya mongong tüikya khoma nange ku to sikangünpu.

⁷⁶ Nange ku, nang dapa füi tsaodaokya ningle, ojem chifünkya nang mongküne ku ang mong asom hüi.

⁷⁷ Ku to chingcha hüi, ikoxle ku ozün ma ngoüi chemthüikoxle kue nang wanlom to mongmüile texpu.

⁷⁸ Ku ma othai kaxfekya bama ngamkyabue thünzak naxkop; ikoxle kue a nange adangle fakyabu bama khünzule ajangüi.

⁷⁹ Nang chathua zale tüikyabu ku hato naxhüi: nang kaxtom awankyabu pangnusa wüi.

⁸⁰ Kue nang kaxtombu tsaothale kax ma laxle chang ang tomhüi ilaxle kue zakkop ang taxtom.

Khosünle kop angkya hanpakma Zangjop

⁸¹ Nang khosün tanle ngokya obaba ma ku ashole maxüna, Jowanpa; kue ku mongong nang kax ma dan thompu.

⁸² “Nange ku to chemtue fong angkya?”, le atüi pongma, nang kaxtsao to hule ngokya ku mik nadaoa.

⁸³ Grep-ti osik ningle ku a chilaxli tuita changle; ikoxlechu kue nang kaxtombu ma-alak.

⁸⁴ Kue chemtukux tanle ngonuiüi? Ku to zothuple changkyabu to nange chemtue sikangünüi?

⁸⁵ Ongambu, opange nang wanlom kax ma chilaxle tüipuix, hwome ku aman ang tswomkha thole.

⁸⁶ Nang kaxtombu a pangwüi mongong angkya oli changle; khünaknue atsekya füi ku to zothuple: ku to fonghüi!

⁸⁷ Hwome ku balang-langsa, ikoxlechu kue nang kaxtombu chiahai.

⁸⁸ Ojem chifünkya nang mongkün khoma nang ku zongto müihüi, ile kue nang Wanlombu kax ma laxle naxchang ang.

Jowanpa Wanlom ma Mongong

⁸⁹ O Jowanpa, nang kax a jento ngoüi; ija a zangkangting to othuithuima tüile.

⁹⁰ Chialekya nang mongong tsün-tsün to ngole; nange chaxwannu a onui ma dan, ilaxle ija ikhama ngo.

⁹¹ Nang kaxtom khoma anyix kople tütalichu tüile ngole, chemthüikoxle ibu a pangwüi nang dabu changle.

⁹² Ku mongmüi otong a nang wanlom chichang koxba, ku sikngün ma ku zidaose.

⁹³ Kue otuechu nange adangle fakyabu münahai, chemthüikoxle ibu makhange nange ku ozün ma thompu.

⁹⁴ Ku a nang kux changle: ku khosün hüi! Kue nang kaxtombu kax ma lax ang azongdaoa.

⁹⁵ Chichangchizangkyabu a ku lang ang tanle ngole, ikoxlechu kue nang wanlom to mongkoxle toüi.

⁹⁶ Pangwüi ma othüt tüikya kue awandaoa; ikoxlechu nang kaxtombu a okhonguikya changpu.

Jowanpa Wanlom tokya Mongkün

⁹⁷ Kue nang wanlom to chemtukux mongkün puix! Kue ija bama han-ahomle ajangle.

⁹⁸ Nang kaxtom a ku füi jento tüile ilaxle ku a zanpabu füichu onüi ang hwontüi-jelang mix ang achangle.

⁹⁹ Ku nwotmixbu pangnusa füi kue wüi sütsing, chemthüikoxle kue nange adangle fakyabu to mongkoxle apa koxle.

¹⁰⁰ Zunu-zupabu füi ngaxchu hwon-je ku ma wüi sütüi, chemthüikoxle kue nang kaxtombu kax ma laxkoxle.

¹⁰¹ Kue chimüikya zanglom-saikha pangwüi tsiaktox daoa, chemthüikoxle kue nang kax ma laxsele tsu koxle.

¹⁰² Nange adangle fakyabu kue chiahai, chemthüikoxle nang jaojao ku nwotmix changle.

¹⁰³ Nange adangle fakyabu chemtukux tipuix: nax-ti füi ngaxchu sütile!

¹⁰⁴ Kue nang Wanlombu makhange hwon-je kople, ikhoma kue chimüikya zanglom-saikha pangwüi thua anule.

Jowanpa Wanlom makhange Zangngai

¹⁰⁵ Nang kax a ku lomzun angkya wüntik changle ilaxle ku lomtang hanpakma wünnyan.

¹⁰⁶ Sukya nange adangle fakyabu kax ma laxle tüi angkya kue ku kaxtsao otia ma thomüi.

¹⁰⁷ Jowanpa, ku sikngünbu a huanu changpu; nange tsaodaokya ningle ku ozün ma thom hüi.

¹⁰⁸ Münchong fakya ku zangjop pongle kop-hüi, O Jowanpa, ilaxle ku hama nang kaxtombu anwot-anole fahüi.

¹⁰⁹ Ku-a othuithuima ku tsün bama hünlit lax ang achwonle ngole; Ku

¹¹⁰ Chichangchizangkyabue ku aman ang tan ngole, ikoxlechu kue nang kaxtombu kax ma chilaxle chitüi.

¹¹¹ Nang kaxtombu a oshuk chitüile ku süntswon; ibu a ku mongkha mongmüi changle.

¹¹² Ku mazi mazile kue nang wanlombu kax ma lax angkya mongzangwünle tsuakdaoa.

Jowanpa Wanlom ma Khosün

¹¹³ Nang zongto komkaile nang kax ma laxle chichangkyabu to kue miktsakle, ikoxlechu kue nang wanlom to mongkünpu.

¹¹⁴ Nang a ku kho-awapa tamchu ziakopmix changpu; nang kaxtsao ma kue ku monghom thompu.

¹¹⁵ Hünzom ochax khünakbu, ku ha-angkya atsaiün. Kue ku Zang kaxtom mawüi lax angkya changle.

¹¹⁶ Nang kaxtsao ningle ku ang janzüi fahüi, ilaxle ku ozün ma ngoüi; ku monghom ma ku ang mong taxatho!

¹¹⁷ Ku to künhüi, ilaxle ku ozün ma ngoüi, ilaxle kue jento nang kaxtombu to mongkoxle ngoüi.

¹¹⁸ Nang wanlombu kax ma chilaxle tüikyabu pangwüi nange chilaxle awüt; hwome dyenlale atsing-atsangkya mwot laxli chemchu müntüi.

¹¹⁹ Nange chichang-chizangkyabu pangwüi to awüt daokya oma-oshix to hwonkya ningle hwon, ikhoma kue nange adangle fakyabu to mongkünle.

¹²⁰ Nang khoma ku zale; chemthüikoxle nang kaxfün thoto ku zakyae awangle.

Jowanpa Wanlom Kax ma Laxkya

¹²¹ Kue chem supuix tamchu müipuix ija mokdaoa; ku a zanpabu chak to taxdan!

¹²² Nang dapa to fongüile tsaofa; zang chitüikyabue ku to zothup ang taxtom!

¹²³ Nange khosünle fong angkya to hukya ku mik nadaoa, azünüihex-o lükya nang tsaotsüt to a.

¹²⁴ Ojem chifünkya nang mongkün ma thütle, ku ang nang kaxtombu anwot-ano fahüi.

¹²⁵ Ku a nang da changle; ku ang tsing-wankya fahüi, ikoxle tix kue nang hwon-nwotbu awan ang thoüi.

¹²⁶ Jowanpa, ija a nange mok angkya hanpak changle, chemthüikoxle khünaknue nang wanlom kax ma chilaxle tüingole.

¹²⁷ Kue nang kaxtombu to hun füi ngaxchu onüi mongkünle, tsaothakya hun füi ngaxwüi chu-a.

¹²⁸ Ikhoma kue nange adangle fakyabu pangwüi kax ma laxpu; Kue thaikya lom pangwüi thua anule.

Jowanpa Wanlom kax ma Lax ang Mongtsukya

¹²⁹ Nang hwon-nwotbu a ohünotün changpu; kue ibu to mong khange jao kax ma laxle tüipu.

¹³⁰ Nang hwon-nwot akhix-akhanle wünkyae zangngai fale.

¹³¹ Nange kaxtombu fa angkya to sungle kue wikha akalaxle hungopu.

¹³² Nange nang to mongkünkyabu to chempang changdaopuix ija ningle kuchi to huhüi ilaxle ku tochu chingcha hüi.

¹³³ Nange tsaodaokya ningle, düt ang chitomle ku kople thom hüi; ku to ochaxe lüt ang taxtom.

¹³⁴ Kue nang kaxtombu kax ma laxtsuak angkya kuxma ku to zothupkyabu chak tokya ku azünhüi.

¹³⁵ Nang womkya füi ku to mohimanhüi ilaxle ku hama nang wanlombu apuahüi.

¹³⁶ Ku mikfibu shuajen ningle jenle ju, khünaknue nang wanlom kax ma chilaxkya ngünlaxle.

Sukya Jowanpa Wanlom

¹³⁷ Jowanpa, nang a otsao changle, ilaxle nang wanlombu sukya changle.

¹³⁸ Oja wanlombu nange koxle tüipuix ibu a komkaile sukya tamchu changkya changle.

¹³⁹ Ku zanpabue nang kaxtombu chixe-chisele tüikya ngünlaxle ku mongtsik kuma wün lailaile chuale tüile.

¹⁴⁰ Nang kaxtsao chang angkya jaojao! Kue ija to chemtukux mongkünpuix!

¹⁴¹ Ku a ema münlax ilaxle ahaile thomle, ikoxlechu kue nang hwon-nwotbu münajao.

¹⁴² Nang otsao a othuithuima ngoüi, ilaxle nang wanlom a jento sule.

¹⁴³ Ku a sikngün hia mongsunge awangle tüile, ikoxlechu nang kaxtombue ku ang mongmüi apüile.

¹⁴⁴ Nange adangle fakyabu a othuithuima sule; ku ang tsing-wankya fahüi, ilaxle ku ozün ma ngoüi.

Khangkho Angai angkya hanpakma Zangjopkya

¹⁴⁵ Ku mongkhae abakle kue nang nyakpu; Jowanpa, ku kax to lanhüi, ilaxle kue nang kaxtombu kax ma laxüi!

¹⁴⁶ Kue nang nyakpu; ku khosünhüi, ilaxle kue nang wanlombu thomüi.

¹⁴⁷ Zanghan dongüi thoto kue asunhüile nang nyakpu; kue nang kaxtsao ma ku monghom thompu.

¹⁴⁸ Zang angaile ku mik azangle apüipu, nange adangle fakyabu mongkoxle to angkya hanpakma a.

¹⁴⁹ Chemthüikoxle nang mongkün ma ojem münfün, O Jowanpa, ku zing apahüi; nang chingcha ahohüi, ilaxle ku khüzün khosün hüi!

¹⁵⁰ Mongtsik ashukkya ku zothup mixbu soxle hüile, otuechu nang wanlom chithomkya khünakbu a.

¹⁵¹ Ikoxlechu nang a ku hama tüile Jowanpa, ilaxle nang kaxtombu a othuithui hanpak changle.

¹⁵² Nange adangle fakyabu bama kue kaitanto wüi awanle hüipu; nange ibu jento ngo angkya hanpakmale zing.

Asunhüile Chingcha Jukya

¹⁵³ Ku sikngün to hulax, ilaxle ku khosünlax, chemthüikoxle chemtuechu kue nang wanlom ahaile chichang.

¹⁵⁴ Ku ba angkya zangwün khoselax, ilaxle ku danlax; nang kaxtsao tüikya ningle ku khosün hüi.

¹⁵⁵ Chichangchizangkyabu a khosün kop angkya münchang, chemthüikoxle hwome nang wanlombu kax ma münlax.

¹⁵⁶ Ikoxlechu nang chingcha a huanu changle, Jowanpa; ku hato nang chingcha ahole ku khosün hüi!

¹⁵⁷ Ku ang zanpabu hia zothup mixbu huanuma tüile, ikoxlechu nang wanlombu kax ma laxle tüi angkya kue otuechu chithai.

¹⁵⁸ Chemtue kue ibu khohang mixbu to hupuix, mongtsike ku awangle, chemthüikoxle hwome nang kaxtombu chemtuechu chithom.

¹⁵⁹ Jowanpa, kue chemtukuxle nange adangle fakyabu to mongkünpuix, hulax. Nang mongkün chemtuechu lüixchüixle münchang, idaile ku khosün hüi!

¹⁶⁰ Nang wanlom mongtsang a otsingtsing changle, ilaxle nang otsao kaxfünbu pangwüi oshuk chitüikya changle.

Jowanpa Wanlom hanpak ang Atsaokya

¹⁶¹ Tsakzongle tüikya khünakbue chemngax chichangkya khato ku to sing, ikoxlechu kue nang wanlom chathua zapu.

¹⁶² Nang kaxtsaobu khoma ku ang mong chemtukuxle müipuix: tüle-tüle chongkya thanu-juapa kopkya khünak mongmüi ningle.

¹⁶³ Kaxthai zangwün pangnu to kue anupu ilaxle ibu füi atsaile ngopu, ikoxlechu kue nang wanlom to mongkünpu.

¹⁶⁴ Nang otsao kaxfünbu khoma hanpak to othom anüt pongma kue nang ang münchong fapu.

¹⁶⁵ Nang wanlom to mongkünkyabu ma okhonguile kuimüi-zangmakya tüile, ilaxle hwom adüt angkya chemchu müntüi.

¹⁶⁶ Jowanpa, ku khosün hanpakma kue nang tanpu, ilaxle kue nang kaxtom ma mokpu.

¹⁶⁷ Kue nang hwon-nwot kax ma laxpu; kue ibu to ku mongkha makhange mongkünpu.

¹⁶⁸ Kue nang kaxtombu hia adangle fakyabu kax ma laxpu; kue mokkya pangwüi nange ngünpu.

Asunhüile Zangjopkya

¹⁶⁹ Jowanpa, asunhüile ku sopkyae nang ha naxalop! nang kaxtsao tüikya ningle ku ang tsing-wankya fahüi.

¹⁷⁰ Ku zangjop to apahüi, ilaxle nang tsaotsüt ningle ku khosün hüi!

¹⁷¹ Kue othuithuima nang achuaküi, chemthüikoxle nange ku hama nang wanlombu apuale kox.

¹⁷² Nang wanlom bama kue tsai ngaoüi, chemthüikoxle nang kaxtombu a sukya changle.

¹⁷³ Ku to fong ang othuithuima achwonle ngohüi, chemthüikoxle kue nang kaxtombu kax ma laxle.

¹⁷⁴ Jowanpa, kue nang khosün fongkya bama chemtukux sungpuix! Kue nang wanlom ma mongmüi atakle.

¹⁷⁵ Kue nang achuak ang thokuxma ku ang khüzün fahüi; nange adangle fakyabue ku to naxfong.

¹⁷⁶ Chun samkya ningle ku samle ngopu; idaile nang dapa ku lomlax, chemthüikoxle kue nang wanlombu otuechu münahai.