MÜNCHUAK-TSAI 118 - OTSAO BAIBEL (BSI)

Zan to Lüt angkya hanpakma Münchong Fakya Zangjop

¹ Jowanpa to münchong fakox, chemthüikoxle chix a müikya changle, ilaxle chix mongkün a oshuk chitüikya changle.

² Israel khünaknue thüikox, “Chix mongkün ma oshuk müntüi.”

³ Zompu-zangpabue thüikox, “Chix mongkün ma oshuk müntüi.”

⁴ Chix to shwomkya pangnusae thüikox, “Chix mongkün ma oshuk müntüi.”

⁵ Ku khosam pongma kue Jowanpa to nyak; chixe ku kax to lan ilaxle ku dan.

⁶ Jowanpa ku füi tüile, ku chemthua chu münza; ku to owae chemthüithoüi?

⁷ Ku to fongkya mix a Jowanpa changpu, ilaxle kue zanpabu to anaokya ngün ang kopüi.

⁸ Khünak to mongkya füi Jowanpa to mongong thomkya wüi sümüi.

⁹ Khünaknu lompabu to chalomkya füi Jowanpa to mongong chalomkya wüi sümüi.

¹⁰ Zanpabu ku akhople huanuma tüikya; ikoxlechu kue ibu a Jowanpa tsak-zong füi amüt ang tho!

¹¹ Ibue pangnu chitokhange ku akhoplaxle tüikya; ikoxlechu kue ibu Jowanpa tsak-zong füi amüt ang tsuak!

¹² Hwom a nax lailaile ku akhople afox, ikoxlechu lebama wüi wün füi wun shunpupule hwom shunle pao; Jowanpa tsak-zong makhange kue hwom amüt awüt.

¹³ Ku to zanma lüwüi sing ilaxle lüt, ikoxlechu Jowanpae ku to fong.

¹⁴ Jowanpae ku janzüi füi tsak-zong ang tom; chixe ku khosünle kop.

¹⁵ Zang khünaknu nyihombu to tholün laxle mongmüile akhongkya zing apalax: “Ija a Jowanpa tsak-zonge moktsuakpu!

¹⁶ Chix tsak-zonge kem ang tho-lünkya fale: zanhok ma chongkya chix tsak-zonge a!”

¹⁷ Ku a münzi, ku a ozün ma ngoüi ilaxle Jowanpae mokdaokya apukle ngoüi.

¹⁸ Chixe ku to chisumüile sikangün, ikoxlechu chixe ku zile pao ang chitom.

¹⁹ Ku ang Zangshwom-Hom fülombu daple fahüi; ku noplaxle Jowanpa ang münchong fa ang!

²⁰ Ija a Jowanpa fülom changpu, ikhato otsao khünakbu tix noptsuaküi.

²¹ Kue nang achuakpu, Jowanpa, nange ku zing atat koxle, nange ku ang tho-lünkya fakoxle.

²² Homzai mixe münlaxle awütkya long pangnu füi akhokya laxli long ang achang.

²³ Ija ile Jowanpa mok, ija mikngün ma huanu ohünotün changle!

²⁴ Ija a Jowanpae tho-lünkya nyix changle, kem mongmüihax, keme fongkha hax!

²⁵ Kwom khosün hüi, Jowanpa, kwom khosün hüi! Kwom ang tsuak ang tomhüi, O Jowanpa!

²⁶ Jowanpa mün ma nguikya mix to Zang-e mohimanhüi! Jowanpa Zangshwom-Hom makhange kwome nang mohimanpu.

²⁷ Jowanpa a Zang changle, chix a kem zongto müile. Hünzom chak ma fummuabu koplaxle, pangpwon owang wang kox ilaxle tö-tsap akhople shonkox.

²⁸ Nang a ku Zang changpu, ilaxle kue nang ang münchong fapu; kue nang chuak-chongkya zangzing apuküi.

²⁹ Jowanpa ang münchong fakox, chix a müikya changle, ilaxle chix mongkün ma oshuk müntüi.