MÜNCHUAK-TSAI 112 - OTSAO BAIBEL (BSI)

Müikya Khünak tuita Mongmüi

¹ Jowanpa achuak kox!

² Müikya khünak su-sa hwom haxtok ma tsak-zongle tüiüi; chix sixli hwom to mohimanüi.

³ Chix homkha a ahak-aluale tamchu tsangtsa ma chemkak-chemlak chitüile changüi, ilaxle chix a othuithuima saxpu-luawang ang ngoüi.

⁴ Müikya khünakbu hanpakma zangnak to zangngaie faüi, chingchajaja hia sukya olom ma ngokyabu hanpakma a.

⁵ Mix ang thashe kox ang chiakhüixkya khünak a mongmüi mix changpu, chix a ma thalex mwot tsaothathale mokkya mix changpu.

⁶ Müikya khünak chemtuechu thaithaxle münchangüi; chix a jento texle atak angkya changle.

⁷ Chix a chimüikya kaxho nguikya thua münza; chix mongong shingmongle tüile, ilaxle chixe Jowanpa to ongle.

⁸ Chix a mongthangle chichangba zale mün-ngo; chix zanpabu to anaokya ngün angkya chix mongkha ma tüikop ünkoxle.

⁹ Chixe chitüi-chinang mix ang mongtsutsule kox-zunle, ilaxle chix chingcha otuechu thaithaxle münbang; chix a tsak-zongle tamchu achuak-achenle tüiüi.

¹⁰ Chichangchizangkya khünake ija ngünlaxle chix ang tüle mongtsikle; chix a miktsak füi wa aziakle samle paole; hwom monghom a othuithui hanpakma paodaoa.