MÜNCHUAK-TSAI 108 - OTSAO BAIBEL (BSI)

Zanbu Thoto hwom to Asun angkya Zangjop

¹ O Zang, kue komkaile nang to ongpu! Kue tsai ngaoüi ilaxle nang achuaküi! Zohüi, ku chamua!

² Ku thuaput-waxmaibu zohüi! Ku zanghan jip azwotüi.

³ Kue chaxwannu tuma münchong faüi, O Jowanpa Kue khünaknu tuma nang achuaküi.

⁴ Chizakkya nang mongküne zangdingkho kaile alople; chialekya nang mongonge zangding to thule.

⁵ Zangdingkho to nang chongkya ahohüi, O Zang, ilaxle chaxwan tokma nang fuazangkya ahohüi.

⁶ Ang janzüi makhange kwom khosünhüi; ku zangjop to lanhüi, nange mongkünkya khünaknu khosün ataktsuak angkya hanpakma.

⁷ Chix otsao nui makhangeZang-e thüile, “Lüt üntoxle kue Shekem ahak-ahanle changüi ilaxle Sukkoth haxnucha ku khünakbu ang ahanle koxüi.

⁸ Gilid a ku kux changle, ilaxle Manasseh chuwüi; Efraim a ku khohom changle ilaxle Judah a ku wang kiathox changpu.

⁹ Ikoxlechu kue Moab a tilax khuanu ningle twonüi ilaxle kue ku chisox Edom nok dingma danüi; ija a hwom chuwüi kue kopdaoa lekya münwan. Filistia nok to anaolaxle ku sungdünle akhongüi.”

¹⁰ O Zang, ku a ziakople tüikya tingnu to owae apüiüi? Edom nok to ku owae zunle paoüi?

¹¹ Nange kwom otsing tomtata ma awütdaopia? Nang kwom zanpabu füi tomle zankat ma womüi münchang hexnyi?

¹² Zanpa füi alünle ajong ang kwom to fongfa; khünake juafongkya ma chem mwot münthap.

¹³ Kwom chima Zang wom laxle kwome wüi lütüi; chixe kwom zanpabu to lütüi.