MÜNCHUAK-TSAI 106 - OTSAO BAIBEL (BSI)

Chix Khünakbu füi Jowanpa Müikya

¹ Jowanpa achuak kox! Jowanpa ang münchong fakox, chemthüikoxle chix a müikya changle; chix mongkün ma oshuk müntüi.

² Chixe mokdaokya ipongpong chongkya mwotbu mo owae wüntsuaküi? Okho-anguile chix owae achuak ang thoüi?

³ Chix kaxtombu kax ma laxle tüikyabu mohiman changpu, othuithuima sukya mwot mokkyabu mohiman.

⁴ Nange nang khünaknu to fongle changpongma, ku texle atak-hüi Jowanpa; nange hwom khosünle kop pongma ku chu wom ang tomhüi.

⁵ Nang khünakbu ahak-aluale changkya kue ngün ang tomhüi ilaxle nang jat-li hwom mongmüi tomhanle lax ang tomhüi; nang kux ang ngokyabu ngadün füi tomle a.

⁶ Kwom pupa hwom lailaile kwome chuwüi ochax lyenle changdaoa; kwom a chichangchizangle tamchu achax-asaxle hüidaoa.

⁷ Ijip nok to kwom pupa hwome Zang ohünotün mwotbu chitsingtsuak; chixe hwom hama obithomthom ma hexle ahokya hwom tokya chix mongkün hwome alakle asam, ilaxle Khikya Tinu Shinthuk ma hwome Khüthak Zang füi alünle chang.

⁸ Ikoxlechu chixe tsaosax daokya ningle chixe hwom khosünle kop; ija a chongkya chix tsak-zong aho angkya hanpakma.

⁹ Chixe Khikya Molo Tinu ang kaxtom kox, ilaxle ija jople pao; chixe chix khünaknu haxzua dingma tale le ang tom.

¹⁰ Hwom to miktsakkyabu chak tokya chixe hwom khosün; hwom zanpabu chak tokya chixe azün.

¹¹ Ikoxlechu tie hwom zanpabu khangle zi ang tom; hwom tuita ngaxchu danle chitox.

¹² Ifüima chix khünaknue chix tsaotsüt to mongong ilaxle chix achuakle tsai ngao.

¹³ Ikoxlechu chixe mokdaokyabu hwome lebama wüi alakle asam ilaxle chix adangle tanle chingole jansuma mokle le.

¹⁴ Sak-hax to tüipongma hwom a omüi-onyax ma tüle azam ilaxle Zang to thwontsingle chang;

¹⁵ ikhoma hwome chem jupuix, chixe hwom ang kox, ikoxlechu hwom hato khomtsikya kaknu laknu chuwüi ahüi.

¹⁶ Hwome sak-hax ikhato Mosa to miktsak-mongngwom Jowanpa otsao dapa Arun to chuwüi tsak.

¹⁷ Ifüima chaxwan kang ilaxle Dathan jok üntoxle Abiram hia chix homkha ikhama chwople zu;

¹⁸ hwom füito azüikyabu ding ma wün düt ilaxle ibu chichang-chizangkya khünakbu zokle ashun.

¹⁹ Hwome Sinai haxnu ma hun füi maihupong tuita zing ilaxle ija chapa to shwom;

²⁰ hwome Zang fuazang fum tsütkya müi chapa füi alüix.

²¹ Ijip nok to chix ohünotün mwot makhange hwom khosünle kopkya Zang alakle asam.

²² Chixe ikhato ohünotün mwotbu tüle mok! Khikya Tinu ma chemtukuxle abütle changkya dai!

²³ Chemtue Zang-e chix khünaknu amütüile thüipuix, ipongma chixe zünle kopkya Mosa Zang füi apüile ajong ilaxle hwom olithule amase chix mongtsik abaxle achat.

²⁴ Ifüima hwome ipong müikya haxtok chilaxle awüt, chemthüikoxle hwom Zang kaxtsao to mong chiong.

²⁵ Hwome hwom nyihom ma ngolaxle Zang kax ma chilaxle tüi ilaxle Jowanpa kax chiapa.

²⁶ Ikhoma chixe hwom ang sak-hax to hwom mik max ang tom angkya bama kaxshing kople tsaosax;

²⁷ ilaxle hwom a songsaribu khato chiakle asam angkya akax. Hwom a mixnok chaxwan to zi ang tom angkya kaxkox.

²⁸ Ifüima Peor ma Zang khünakbue Bal shwomkya khato hak, ilaxle omang baozangbu ang koxkya töbu kha angkya hwome sax.

²⁹ Hwom mwot makhange hwome Zang mongtsik lüixle alai, ilaxle khompua-atsikkya kakma-lakshix hwom khama lai.

³⁰ Ikoxlechu Finehas momle ajong ilaxle thaikyabu ang sikngün kox, ikhoma ija kakma zakle sam.

³¹ Ija ahwom tokya Zang chingcha changpule texle atak ilaxle ija a othuithuima texle ataküi.

³² Meribah shuasa ma khünaknue Jowanpa ang mong ama, ilaxle hwom khokho ma Mosa mixe thama apong angkya lai.

³³ Hwome chix ang mong huanuma ama ikhoma chix ajang angkya hanpakma zakle toxkya noxjao chitüile akax ang süt.

³⁴ Hwome songsaribu mik chiamüt. Jowanpa a hwom ang ibu amüt angkya kaxtom koxle thomdaokya,

³⁵ ikoxle hwome ibu füi atu-amaile chang ilaxle hwom songsaribu zanglom twon ang azong.

³⁶ Zang khünakbue chapabu to shwom ang süt, ijae hwom hato zikmüt-mangkho apüi.

³⁷ Hwome tö ang masu masabu koxle Kanan nok chapabu to shwom-töle chang.

³⁸ Chem-mün chiawankya naosom ibu hwome lang, ilaxle haxtok a ibu mik amütkya tokhange chitsaokya haxtok ang achang.

³⁹ Hwom mwotbu makhange alüile hwom a chitsaokya ang achang ilaxle hwom ma Zang to ongkya mongong ojao chitüi.

⁴⁰ Ikhoma Jowanpa ang chix khünaknu füi huanuma mongma; chix a hwom füi nushix dongkya ang chang.

⁴¹ Chixe hwom a songsaribu tsak-zong chak to dantox, ilaxle hwom to zanpabue apün-adale chang.

⁴² Hwom zanpabue hwom to afangle thom ikhoma hwom komkaile hwom fangto ngo angkya lai.

⁴³ Jowanpa chix khünaknu kho obithomthom ma hexle sün, ikoxlechu hwome chix zan to ka angkya wüi zünle kop ilaxle ochax khato süzuzule khang.

⁴⁴ Ikoxle ngaxchu Jowanpa hwome nyak pupu ma hwom kax to lan, ilaxle hwom sikngün chixe ngünle lax.

⁴⁵ Hwom kuxmale chixe hwom füikya chix Tsaotsüt texle atak, ilaxle chongkya chix mongkün khoma chixe hwom to chingchale thüt.

⁴⁶ Chixe hwom to afangle thomkyabu pangnue ibu hanpakma hwom thaikyabu bama mongto kakle thüt ang tom.

⁴⁷ Jowanpa, kwom Zang, kwom khosünfa, ilaxle chaxwannu chak tokya kwom chatle chat ang tomhüi, kwome nang ang münchong fatsuak angkya kuxma tamchu nang otsao mün achuakle tsuak angkya kuxma.

⁴⁸ Israel nok Zang, Jowanpa achuakkya tüikox; athax üntoxle othuithuima chix achuak-achenle changkox! Pangnusae wüi “Amen!”, le thüikox! Jowanpa achuak-achen kox!