MÜNCHUAK-TSAI 105 - OTSAO BAIBEL (BSI)

Zang üntoxle chix Khünaknu

¹ Jowanpa ang münchong fakox, chix chongkya bama apuk-kox; chixe chempang mokdaopuix ibu zangfang hama wünkox.

² Jowanpa achuakle tsai ngaokox; chixe mokdaokya ohünotün mwotbu mo wünkox.

³ Kem a chix kux changkya khoma mongmüikya tüikox; chix to shwom-tole changkyabu pangnu mongmüi-pwonlakox.

⁴ Ofong-otsox lomle Jowanpa hato paokox; üntoxle chizakle chix to shwomkox.

^5-6 Hünzom Abraham, chix dapa sixli hwom; hünzom Jakop, chixe zünle kopkya, sixli hwom: Zang-e mokkya ohünotün mwotbu ilaxle chixe hünzom ang koxkya kaxfünbu texle ataklax.

⁷ Jowanpa a kem Zang changle; chix kaxtombu a chaxwannu pangnu hanpak changle.

⁸ Chixe chix Tsaotsüt othuithuima otia ma thomüi, chix kaxtsaobu ojat-ojat tsünthom kople thomüi.

⁹ Chixe Abraham füikya tsaifün-kaxwün otia ma thomüi üntoxle chu Isak füikya chix kaxtsaobu.

¹⁰ Jowanpa Jakop füi longzütle kaxfün, ija kaxfün tsüntsün to ngoüi.

¹¹ Chixe thüi: “Kue nang ang Kanan haxtok koxüi. Ija a nang haxtok jaojaole changüi.”

¹² Khünak huak ma Zang khünakbu a hidaole wüi changkya, Kanan haxtok to hwom a mixnok wünpa ang süt.

¹³ Hwom onok tuita makhange ata-nok tole aham hüi, wangting tuita makhange ata wangting tole ahamle hüi.

¹⁴ Ikoxlechu Zang-e hwom to owaechu afangle thom ang chitom; hwom kho awa angkya hanpakma chixe wanghombu ang kaxkhün kox:

¹⁵ “Kue zünle kopkya ku dabu to thomzün maklaxle chang ang taxtom; ku ajebu to chake taxtwon”

¹⁶ Jowanpae ibu haxtok to otui-onuak ahüi ilaxle hwom sütling komle pao.

¹⁷ Ikoxlechu chixe hwom thoto achale khünak tuita akat; chix a da ang hangle apaokya Jusep changkya.

¹⁸ Chix chabu janbüi füi akale thomkya, ilaxle chix dingkux ma jankhap langle kox.

¹⁹ Chixe ajekyabu pangwüi changle mangai tanto chix ile wüi ngo. Chix a otsingtsing changpule Jowanpa kax makhange ngaile aho.

²⁰ Ifüima Ijip nok wanghompa-e chix danle alai; chaxwan apünkyabue chix danle angai.

²¹ Chixe Jusep a chix wangting ma apünkya mix ang achangle thom ilaxle chix a haxtok ma pangnu khato apünkya mix ang zingle dan,

²² wanghom okax-okhobu thakma apün angkya tsak-zong chix ma tüi ilaxle chix adangpabu ang adangle fa angkya apün-adakya zong chuwüi chix ma tüi.

²³ Ifüima Jakop Ijip nok to ka ilaxle ikhato ongwot ang achangle ngo.

²⁴ Jowanpa chix khünaknu ang su-sabu huanuma kox ilaxle hwom a zannokbu füi ngaxchu tsak-zongle chang.

²⁵ Chixe Ijip nok ang chix khünaknu to miktsak üntoxle chix dabu to dyenlale chang ang tom.

²⁶ Ifüima chixe chix dapa Mosa akat, ilaxle chixe zünle thomkya Arun chuwüi akat.

²⁷ Hwome chongkya Zang mwotbu mok ilaxle Ijip nok to ohünotün mwotbu mok.

²⁸ Ija haxtok to Zang-e zangnak ahüi, ikoxlechu Ijip noke ojao chix kaxtombu kax ma chilax.

²⁹ Chixe hwom tibu aji ang achang ilaxle hwom nyax pangwüi langle awüt.

³⁰ Hwom chaxwan a luke awangle chang, wanghom homkha ngaxchu luke wüi awang.

³¹ Zang-e kaxtom koxle hwot hia nax ibu, hwom chaxwan awangle afox ang tom.

³² Hwom haxtok hato chixe jundütle zangchangjep füi cheinu le ang tom ijama zangwat ojao chiawon;

³³ chixe hwom grepzu hia fupsa pünbu ama ilaxle pünzuabu pangwüi anguak.

³⁴ Chixe kaxtom kox, ilaxle kuknubu ngui, ija kuknubu a e-ang jao chithole tüikya;

³⁵ haxtok ma tüikya fumsa-suisa ijabue komle sax; ibue saxziak komkaile saxle awüt.

³⁶ Chixe Ijip nok kako tyale tüichongpapa komle lang.

³⁷ Ifüima chixe Israel khünakbu laile pao ang tom; hwome khop hia hunbu laxle pao, ilaxle hwom pangwüi okak-olak chemchu chitüile tsak-zongle tüikya.

³⁸ Ijip khünakbu a hwom thua zale ngokya ikhoma hwom laile paokya zuma hwom ang mongmüi.

³⁹ Zang-e chix khünaknu khangkho ma zangfwom dan ilaxle hwom ang zangngai fa angkya hanpakma awünningle wün kox.

⁴⁰ Hwome jukya khoma chixe hwom hato songsik osabu apüile kox; chixe hwom wokfwot amüi ang zangding tokya süt kox.

⁴¹ Chixe longnu adaple kox, ilaxle imakhange ti fuakle alai, ilaxle ija sak-hax akaile shuajen lailaile jenle ju.

⁴² Chixe chix dapa Abraham füikya otsao kaxtsao texle atak.

⁴³ Ikhoma chixe chix khünakbu laile pao ang tom, ilaxle mongmüi-pwonla atungle hwom akhong.

⁴⁴ Chixe hwom ang mix haxtok hwom kux ang kox üntoxle hwom ang ibu haxtokbu lax ang tom,

⁴⁵ Ile chix khünakbue chix wanlombu kax ma laxle tüi angkya hanpakma tamchu chix kaxtombu bakle thom angkya kuxma. Jowanpa achuak kox!