MÜNCHUAK-TSAI 103 - OTSAO BAIBEL (BSI)

Zang Mongkün

¹ Ku chasa, Jowanpa achuak kox! Ku khüzün pangnue chix otsao mün achuak kox!

² Ku chasa, Jowanpa achuak kox! chix ma chemtukux mongkün-chingcha tüipuix ija taxalak.

³ Chixe ku ochax pangwüi thailak kox ilaxle ku kak-lakbu amüile kox.

⁴ Chixe ku zuk kha tokya kople thom ilaxle mongkün hia chingcha füi ku to mohiman.

⁵ Chixe ku khüzün awangmüikya jalibu füi, ku naosün ma tamchu tsak-zong füi ola lailaile ngo angkya hanpakma.

⁶ Jowanpae afangle thomkyabu chikao ma sele kaxfün fale ilaxle hwom ang hwom chifün koxle.

⁷ Chixe chix mongjang Mosa hato ngaile aho ilaxle Israel khünaknue tüpong chongkya chix mwotbu ngün ang tom.

⁸ Jowanpa a chingchajaja hia mongkün füikya changle, mong a zaze letix tsik ilaxle ojem chifünkya mongküne awang laxle tüikya.

⁹ Chixe salanle chingo; chix a othuithuima mongtsikle chingo.

¹⁰ Keme chem kopsehex itukuxle chixe kem to sikngün ang tomle chichang chichangba kem ochaxbu hia thaikyabu ma thütle olüix khomle chichang.

¹¹ Chaxwannu thakma zangding chemtukuxle tsuale tüipuix, chix chathua zale tüikyabu hanpakma chix mongkün itukuxle chongle tüi.

¹² Hannop füi handün chemtukuxle atsaile tüipuix, itukuxle atsaile chixe kem ochaxbu kem atsaile pao ang tom.

¹³ Hopa tuitae sasün to chemle chingcha puix, itukuxle chix chathua zale tüikyabu zongto Jowanpa chingcha tüi.

¹⁴ Kem chem füi zingpuix chixe awanle ngo; kem a haxbu changpule chixe awanle ngo.

¹⁵ Kem zongto, kem khüzün a tuita hingzang lailaile. Kem a tuita fao maipua lailaile tsong ilaxle putsale chang;

¹⁶ ifüima ija to zangwin füi jep, ilaxle ija amale awüt: ija tamchatle owaechu chingün.

¹⁷ Ikoxlechu opange Jowanpa chathua zale tüipuix, hwom hanpakma chix mongkün jento ngo, ilaxle chix müikya tsüntsün to ngo;

¹⁸ chix Tsaotsüt otya ma thomkyabu hanpak ang tamchu chialekya mongong füi chix kaxtombu kax ma laxle tüikyabu hanpak ang.

¹⁹ Jowanpa chix tüntong zangkangting to dan; chix a pangnusa thakma wanghom.

²⁰ Hünzom janzüi füi hia tsak-zongle tüikya kaxtaimixbue, opange chix kaxtombu kax ma laxle tüilaxpuix, chixe chem akaxpuix ibu to apale tüikya pangnusae Jowanpa achuak-achenle changkox.

²¹ Hünzom zangkangting tsak-zong pangnusae, hünzom chix mongtex ma mokle tüikya chix dapabue Jowanpa achuak-achen kox!

²² Jowanpa achuak kox, chixe zingkya zünmok pangnusae chixe apünle tüikya pangnu khato. Jowanpa achuak kox, ku chasa!