MIKNGÜN-OHÜN 9 - OTSAO BAIBEL (BSI)

¹ Ifüima kaxtaimix aga lükyae chix nyazong müt. Ding tokya lyettsi tuita chaxwan to dütkya kue ngün, ilaxle othong chitüikya tswom kahak to aja angkya kapatja chix ma kox.

² Ija lyettsie tswom ka dap, ilaxle ija tswomkha tokya wünkhut lai. Ija wünkhut a tüpong tüpongkya wünchua tokya wünkhut ningle lai. Ija wünkhute zanghan hia zangwin to tuk.

³ Ija wünkhut khatokya kuknubu chaxwan tok to lai; ilaxle twonsi ma tüikya zong hwom ang kox.

⁴ Fumsa suisa chichangba pünnu zuanu tüta ziachu chiama angkya hwom füi akax. Hwome khangpongma Zang shintop chitüikyabu zia tata ama ang tho.

⁵ Kuknu ibue khünak ibu lang angkya chichang, ikoxle lyet aga hanpakma hwom zothup ang dan. Hwome zothup pongma twonsie tsik pongma kakpupu le kak.

⁶ Ituke khünaknue zik lomüi, ikoxlechu ija otuechu chiataküi; hwome zise tsuüi ikoxlechu zik hwom thoto paoüi.

⁷ Kuknu sünjo a azan ang achwonle tüikya man lailaile tüikya; hwom khang ma hun khohom ningkyabu tüikya, üntoxle hwom thün-le khünak thün-le lailaile tüikya.

⁸ Hwom khobu shekobu kho ningle tüikya, hwom wa a chax wa lailai le tüikya.

⁹ Hwom thünkhux ma jan faksox lailaikyae khwop laxle tüikya, üntoxle hwom ozangbue alaikya ozing a zyen lin laxle man zanto ka ang awukpupule tüikya.

¹⁰ Twonsi lailaile hwom ma müikua hia opax tüikya, ilaxle lyet jang aga khünaknu zothup angkya tsakzong a hwom müikua ma tüikya.

¹¹ Othong chitüikya tswom nyekya kaxtaimix a hwom wanghom ang tüikya. Chix ang Ibri kax ma Abandon le üntoxle Grik kax ma Apolion (thüikoxle Ama angkya mix) le amün.

¹² Pongwang angkya thama kaidaoa; hulax, ija füima thama anyi hüile ngole.

¹³ Ifüima kaxtaimix azok lükyae chix nyazong müt. Zang thüntho ma ajongle tüikya hun zomtong zong ali tokhange laikya ozing kue atat.

¹⁴ Ija kaxzinge kaxtaimix azok lükya füi akax: “Eufrat shuanu ma kople thomkya kaxtaimix ali dandao!”

¹⁵ Kaxtaimix ali dan; chemthüikoxle ija zangpua angkya ija lyetkua, Ija nyix, ija khonta a othom azom angkya thom tuita khünaknu lang angkya hanpakmale hwom thomkya changle.

¹⁶ Ibu man süpahibu ho-anyi million tüikya ku hama wün,

¹⁷ Üntoxle ku mikngün-ohün ma kue man bün hia ibu khoma ngakyabu le ngün; Mankho ma ngakyabu ma wün ningle khikya, safir long ningle nakle hingkya üntoxle khat ningle nanjaikya thünkhux khyep füi tüikya. Man khangbu a mailang khangbu ningle tüikya, ilaxle ibu wikha makhange wün, wünkhut üntoxle khat le lai.

¹⁸ Khünaknu othom azom ma ahankya thom tuita ma man wikhabu makhange laikya wün, wünkhut tamchu khat, ibu makhange lang.

¹⁹ Man ibu ma hwom tsakzong a wikha hia müikuabu ma tüikya, ilaxle hwome ibu khünak zia ama ang twon.

²⁰ Ibu thama ma mik chiamütle toxkya khünak owachu ma chak-mwot tokya mong chichat. Hun, khop, janjong, long hia pünbu makhange zingkya chapabu owae ngün ang, atat ang, tamchu aham ang chitho, ibu baobu shwomkya hwome chitox.

²¹ Tamchu mix langkya, khunkya, chinunchakkai chichangba ahux-alopkya, iningkyabu tokya hwom ang mong chialüix.