MIKNGÜN-OHÜN 8 - OTSAO BAIBEL (BSI)

Shintop Anüt

¹ Otue Chun Hosae anüt lükya shintop dap, zangkangting to atha khonta tukux kongle dang.

² Ifüima kaxtaimix anüt Zang thüntho ma ajongkya kue ngün. Hwom ang nyazong anüt kox.

³ Ongan müikya so zokkya pe oja hun füi zingkyahex, ija koplaxle tüikya kaxtaimix mama ngün üntoxle chix zomtong ma ajong. Chongwang tüntong thüntho ma tüikya hun zomtong ma tö kox ang tamchu Zang khünaknu pangnu zangjop to bole chix ang ongan müikya so tüle kox.

⁴ Zang thüntho ma ajongle tüikya kaxtaimix chak angkya ongan müikya so zokle wünkhut Zang khünaknu zangjop füi tomle dingkho to dong.

⁵ Ifüima kaxtaimixe ongan müikya so zokkya pe lax, zomtong angkya wün füi ija awang, ilaxle ija chaxwan tok to tswonle awüt. Ipongma zangtsak zangdung hia zangchang ajepkya tüi tamchu tüle-tüle bütix si.

Nyazongbu

⁶ Ifüima kaxtaimix anüte nyazong anüt müt ang achwon.

⁷ Pongwang angkya kaxtaimixe chix nyazong müt. Jun hia wün, aji füi awon, chaxwan to adüt. Chaxwan tok othom azom ma ahankya thom tuita zokle ashun, pünbu othom azom ma ahankya thom tuita zokle ashun, fumhing laihing komle zokle ashun.

⁸ Ifüima anyi lükya kaxtaimixe chix nyazong müt. Tüle wünchua füikya tuita haxnu ningle tüikya tinu khato tswonle awüt. Tinu othom azom ma ahankya thom tuita aji ang achang,

⁹ ti ma tüikya zünmok othom azom ma ahankya thom tuita zile pao, üntoxle khua othom azom ma ahankya thom tuita amale awüt.

¹⁰ Ifüima azom lükya kaxtaimixe chix nyazong müt. Wünnyan ningle chuale ngokya lyettsi chongkya tuita ding tokya düt. Shua othom azom ma ahankya thom tuita dingma, tamchu ti fuakle laikya nui to düt.

¹¹ Ija lyettsi mün a “Khaxkya”. Ti othom azom ma ahankya thom tuita khaxle pao, ilaxle ija ti ling laxle khünaknu tüle zi, chemthüikoxle ti a tuita khaxkya ang achangdaoa.

¹² Ifüima ali lükya kaxtaimixe chix nyazong müt. Zangngai othom azom ma ahankya thom tuita zangngai chitüi le changkya; üntoxle zangnak hia zangngai othom azom ma ahankya thom tuita ma zangngaikya chitüi angkya hanpakmale zangnaktukle chang angkya hanpakma, zanghan othom azom ma ahankya thom tuita to, lyetnu othom azom ma ahankya thom tuita to le fitdaoa.

¹³ Ifüima kue hu, ikoxle dingkho to pile ngokya ola tuita akhongle ile akaxkya kue atat: “Mama kaxtaimix azome nyazongbu mütkya zuma, chaxwannu ma opang tüilaxpuix, hwom hanpakma, Maxsax! Maxsax!”