MIKNGÜN-OHÜN 7 - OTSAO BAIBEL (BSI)

144, 000 Israel khünaknu

¹ Ifüima chaxwannu ozong ali ma kaxtaimix ali ajongle ngokya kue ngün. Chaxwannu ma chichangba tinu ma chichangba pünzua chem hatochu zangwin chihüi angkya kuxma hwome zangwin olom ali abaxle thom.

² Khüzün Zang shintop füikya handünchi tokya mama kaxtaimix laikya kue ngün. Zange chaxwannu hia Molo-Tinu amüt angkya tsakzong koxlaxle tüikya kaxtaimix hwom ali nyakle chix tüle akhong.

³ Kaxtaimixe thüi: “Kwome kem Zang thothakyabu khangpong ma chix shin matop tanto, hünzome chaxwannu chichangba Molo-Tinu chichangba pünzua ang sik shongtax angün.”

⁴ Üntoxle ija shin topkya khünak huak, hajat hota boma punyi ali a Israel homjen bün anyi kha angkyabu changpu le ku hama apua.

⁵ Juda homjen angkya jatbün anyi, Reuben homjen angkya jatbün anyi, Gad homjen angkya jatbün anyi,

⁶ Asher homjen angkya jatbün anyi, Neptali homjen angkya jatbün anyi, Manasseh homjen angkya jatbün anyi,

⁷ Simeon homjen angkya jatbün anyi, Liwi homjen angkya jatbün anyi, Isakar homjen angkya jatbün anyi,

⁸ Zebulun homjen angkya jatbün anyi, Jusep homjen angkya jatbün anyi, Benjamin homjen angkya jatbün anyi shintop.

Tülekya Khünaknu Tusox

⁹ Ifüima kue hukoxle: owaechu akiak ang chitho le tüle tülekya khünaknu tusox tüikya! Hwom a pangnu jat-li, saxthom homjen, chaxwan longkho, kax-ngao tokyabu changkya. Hwom a chak ma pam pünkangbu twontwon le nyi tsekyabu awunlaxle, chongwang tüntong hia Chun Hosa thüntho ma ajong.

¹⁰ Hwome akhongle akax: Chongwang tüntong ma thungle, tüikya hia Chun Hosa, kem Zang tokhange khosün hüile!

¹¹ Kaxtaimixbu pangwüi, ozün ma tüikya müi ali hia tüichong mixmüibuchu wüi, chongwang tüntong akhople ajong. Ifüima chongwang tüntong thüntho ma haxchi to hule hwom akhux ilaxle Zang shwomle,

¹² hwome thüi: Amen! Achuak achenkya, fuazang, je-hwon, münchong fakya, chathua zakya, tsakzong üntoxle tholünkya, jento kem Zang kux wüi naxchang! Amen!

¹³ Tüichong mixmüi tuitae ku ma atüi: “Nyitse laxlaxle tüikyabu opang üntoxle hwom ojong tokya nguikyabu hex?”

¹⁴ “Alixachong, nange wüi awan, kue münawan hex”, le kue lan. Chixe ku ang thüi: “Ibu khünakbu a tüle tülekya zothup chak tokya azangle hüikyabu changle. Hwome hwom nyiza solaxle Chun Hosa aji füi tsekya ang achangle.

¹⁵ “Ikhoma hwome nyixfokya to, Zang chongwang tüntong thüntho ma, ajong laxle zangnak zangngai, chix zangshwom-hom ma chix thothale. Chix womlaxle chongwang tüntong ma, thungle tüikya mixe, hwom khosünle thomüi.

¹⁶ Hwom ang tamchatle wok münano, chichangba ti münalan; zanghanechu chichangba okham chemechu, hwom to münhuaküi,

¹⁷ chemthüikoxle chongwang tüntong, osungwa angkya Chun Hosa a, hwom Chunnyetpa changüi; khüzün tümik fuaknui to, chixe hwom zunnüi. Hwom angkya mikfi pangwüi, Zange fwotle faüi.”