MIKNGÜN-OHÜN 5 - OTSAO BAIBEL (BSI)

Laitün üntoxle Chun Hosa

¹ Chongwang tüntong ma thungle tüikya tsaxchi chak ma kue laitün tuita, pangnyi chima zakyae awang laxle tamchu shin anüt füi top laxle tsüile thomkya kue ngün.

² Üntoxle tüle tsakzongkya kaxtaimix tuita kue ngün. Chixe ija kax tsingang tom: “Shin topkyabu ama üntoxle laitün dap angkya mix owa tüi?”

³ Ija laitün sha üntoxle omong khato hu ang tho angkya mix ding hia hax ma tamchu zangkangting to owachu chitüi.

⁴ Ija laitün sha laxle omong ma chem tüipuix ija to hu angkya mix owachu chitüikya ngünlaxle ku tüle mongmaxle sop.

⁵ Ipongma tüichong mixmüi tuitae ku ang thüi: “Taxsop, hulax! Juda homjen angkya mailang tuita, owa Dawid sixli akhokya changpuix, chixe zan to anao daoa, ilaxle chixe shin anüt topkyabu dalaxle ija laitün sha ang thoüi.”

⁶ Ifüima ozün ma tüikya müi ali hia tüichong mixmüibue akhop laxle chongwang tüntong osung wama Chun Hosa ajongkya kue ngün. Chun Hosa a langdaokya ningle ngün. Ija ma ozong anüt üntoxle omik anüt le tüikya. Ibu a chaxwannu pangkha towüi pao ang tomkya Zang Chasa anüt changle.

⁷ Chun Hosa hüilaxle chongwang tüntong ma thungle tüikya tsaxchi chak angkya laitün lax.

⁸ Ile chang pongma ozün ma tüikya müi ali üntoxle tsa ali tüichong mixmüi hwom Chun Hosa chitong ma akhux. Hwom pangwüi ma waxmai tupong üntoxle ongan müikya soe amünkya hun pe le tüikya. Ibu a otsao khünakbu zangjop changkya.

⁹ Hwome tsaizün ile ngao: “Laitün lax üntoxle, shintop dap ang asule tüile; chemthüikoxle nang a lang daoa, tö koxle nang zikya füi; nange Zang hanpakma, pangnu jat-li tamchu kax-ngao; chaxwan longkho hia li-kan tokya, khünaknu shakdaoa.

¹⁰ Nange hwom, kem Zang thotha angkya kuxma, zommixbu wangting ang zingdaoa; hwome chaxwannu ma apün-adaüi.”

¹¹ Anaolechu kue hu, üntoxle hajat-hajat kaxtaimixbu zing kue atat! Hwom chongwang tüntong akhople ajong; ozün ma tüikya müi ali hia tüichong mixmüi hwomchu wüi womle,

¹² ilaxle akhongle tsai ngao: “Chun Hosa, owa langdao laxpuix; chix tsakzong hia tui-na, je-hwon tamchu achuak achenkya; fuazang üntoxle mohiman, kop ang asule tüile!”

¹³ Üntoxle zangkangting to tüikya, hax ma tüikya, hax fang to tüikya, tinu khato tüikya: ding hia hax ma tüikya zünmok pangwüie tsai ile ngaokya kue atat: “Chongwang tüntong ma thungkya mix, tamchu Chun Hosa ang; oshuk chitüi achuak achenkya, chathua zakya tamchu fuazang, tsakzongkya naxchang!”

¹⁴ Ozün ma tüikya müi alie lan: “Amen!” Üntoxle tüichong mixmüibue akhuxlaxle shwom.