MIKNGÜN-OHÜN 22 - OTSAO BAIBEL (BSI)

¹ Zang hia Chun Hosa chongwang tüntong makhange lailaxle tingnu angkya tingjang lomnu osungwa ma jenle jukya, kristel lailaile tüle ajik-ajep le tüikya,

² khüzün ti shuajen kaxtaimixe ku hama aho. Shuajen atale pangnyi chikao ma khüzün pün tüikya. Ija pün lyetjang to tampong, zanglao to othom bün anyi pongma ziak; ilaxle ija pünchakbu a chaxwannu kak amüi angkya hanpak ang twon.

³ Ija tingnu ma Zang thuakzom ma womdaokya chemchu chiatak. Zang chix Chun Hosa chongwang tüntong ija tingnu ma ngoüi, ilaxle chix dabue chix tong shwomüi.

⁴ Hwome chix thünza ngünüi, ilaxle hwom khangpongbu ma chix münwan zaüi.

⁵ Ikhato otuechu zangnakkya müntüi, ilaxle wüntik hia zanghane fakya hwom zongto chem mwot ang münchang, chemthüikoxle Opunu Zang tix hwom zangngai ang changüi, ilaxle hwome wanghombu ang achangle othuithuima apün-adaüi.

Khrista Nguikya

⁶ Ifüima kaxtaimixe ku ang thüi: “Ibu kax a otsingtsing tamchu mongong tüiangkya changle. Üntoxle Jowanpa Zang owae ajebu ang chix chasa fapuix, chixe chwon chwonle wüi chem chang angkya tüipuix ija chix dabu hato aho angkya hanpakma kaxtaimix tomle apao.”

⁷ Jisu-e thüi: “Apalax! Ku chwonle wüi nguiüi! Opange ija laipex ma tüikya jekaxbu kax ma laxle tüilaxpuix, ibu mohiman!”

⁸ Juhan kue ibu pangwüi atat ilaxle ngündaoa. Ilaxle otue kue ibu ngünkya hia atatkya tsuakle hüipuix, ku hato ibu ahokya kaxtaimix chitong ma nguak laxle kue chix tong shwomüi khakha.

⁹ Ikoxle chixe ku ang thüi: “Nange ile taxchang! Jowanpa mwottho ma kuchu hünzom füi tamchu hünzom tüinao ajebu füi ilaxlechu ija laipex ma tüikya kaxbu ma laxle tüikya pangnusa füi wüi üitho changle. Zang shwomlax!”

¹⁰ Ilaxle chixe ku ang thüi: “Ija laipex ma tüikya jekaxbu pyenle thom angkya oli münchang, chemthüikoxle ibu pangwüi changle ngai angkya hanpak chwonle hüingole.

¹¹ Achaxle ngokyabue ochax mwot omok omokle mokle le angkya changle, ilaxle owapange kaxtsing chiakaxle tüilaxpuix, ibu atsele le angkya changle; opangsa müile tüipuix ibue mwotmüimüi mokle le angkya changle, ilaxle opangsa otsao hex hwom otsao ma ngole le angkya changle.”

¹² Jisu-e thüi: “Apalax! Ku chwonle nguile! Mae chemle mokdao laxpuix ilailaile pangnusa ang wüi fa angkya hanpakma ku füi tomle kue hinghobu laxlaxle nguiüi.

¹³ Ku a Alfa üntoxle Omega, owang tamchu oshuk changle.”

¹⁴ Ma zapua sole atsao daokyabu mohiman, chemthüikoxle khüzün pün angkya pünziak sax ang tamchu ngailombu makhange tingnu to dong ang hwome ataküi.

¹⁵ Ochei lom to lekyabu, khun-khekyabu, chinunchakkaikyabu, mixlang-mixhuakkyabu, chapa to shwomkyabu ilaxle kax hia mwot pangwüi ma thai-nyaile tüikyabu pangwüi tingnu tokna to tüile.

¹⁶ “Jisu, kue hünzom ang ibu tsingang tom angkya hanpakma kaxtaimix apaodaoa. Ku a Dawid sixli tokhange hüikya changle; ku a tüle nyankya swomsa lyettsi changle.”

¹⁷ Chasa hia Tuipa-e thüi: “oman!” Ija atatkya noknusae wüichu, thüi angkya changle, “Oman!” Oman, opangsa ang ti alan laxpuix; laxse tsukya pange wüi, ija khüzün ti, hingho ang pongle koplax.

Kaxshuk

¹⁸ Ija laipex angkya jekaxbu atatkya pangnu füi wüi kue kaxfün koxle akaxpu: Owawae ibu to janbo langle jangchang thüiningle, Zange chix sikngün to janbo langle ija laipex ma tüikya thama faüi.

¹⁹ Owawae ija laipex angkya jekaxbu oli tuita ngaxchu awütle jangchang thüiningle, ija laipex ma wünle tüikya khüzün pün angkya pünziak hia Otsao Tingnu angkya chix süntom Zange tswonle paoüi.

²⁰ Ibu pangwüi to chix bama kaxkhi fakya mixe thüi: “Ija changtomtale! Ku chwonle nguiüi!” Amen. Opunu Jisu, nguihüi!

²¹ Opunu Jisu chingchajaja Zang khünaknu pangnusa füi ngohüi.