MIKNGÜN-OHÜN 21 - OTSAO BAIBEL (BSI)

Hozün Zangkangting

¹ Ifüima kue hozün zangkangting hia hozün chaxwannu ngün. Pongwang angkya zangkangting hia pongwang angkya chaxwannu samle max, üntoxle tinu amua le max.

² Üntoxle hotuipa füi apong ang aza-apuale tüikya hotuinu tuita ningle, atha-anyem tamchu aza-apua laxle, Zang tokhange zangkangting Otsao Tingnu tuita, hozün Jerusalem juüi kue ngün.

³ Chongwang tüntong makhange akhongle akaxkya kaxzing tuita kue ile atat, “Zang hom a athaxpi, khünaknüsa füi tüiüna! Chix hwom füi tomle ngoüi; hwom chix khünaknu ang achangüi. Zang jaojao hwom füi tüiüi; chix a hwom Zang ang changüi.

⁴ Chixe hwom mik angkya mikfi, pangwüi fwotle faüi. Ikhato zikya, mongmakya, sop-juakya, okak-olak chemchu müntüiüi. Hozang lili komle maxdaoa.”

⁵ Ifüima chongwang tüntong ma thungle tüikya mixe thüi: “Athaxpi kue pangwüi hozün ang zingdaoa!” Chixe ku angchu wüi thüi: “Ija zalax, chemthüikoxle ibu a otsingtsing tamchu mongong tüiangkya kaxbu changle.”

⁶ Üntoxle chixe thüi: “Ija tsuakdaoa! Ku a Alfa üntoxle Omega, owang tamchu oshuk changle. Tütapu wüi changlax, ti alankya mix ang omün chifango homle khüzün ti fuaknui angkya ti ling ang kue koxüi.

⁷ Owae tholün tsuakpuix, chixe ku angkya ija kopüi: Ku a chix Zang changüi üntoxle chix a ku susa ang changüi.

⁸ Ikoxlechu zakhutkyabu, khohangkyabu, ochei to lekyabu, mixlang-mixhuakkyabu, khun-khekyabu, chapa to shwomkyabu, üntoxle atsele zangwünkyabu, ibu hanpak ngwotnui ang tinu ningle tüikya wün hia khat chuale ngokya kha, oja anyi lükya zik hex, ikha changpu.”

Hozün Jerusalem

⁹ Kaxtaimix anüt kha angkya owa ma oshuk lükya thama anüte awang le tüikya pe tüikya hex, chix ku hato hüilaxle thüi: “Ikhato oman, kue nang hama tui to juüi naocha, thüikoxle Chun Hosa kakonu ahofang.”

¹⁰ Üntoxle chasa ma chixe ku tüle tsuakya tuita haxnu kho to pao. Zang tokhange, zangkangting tokya juüi, tuita Otsao Tingnu Jerusalem chixe ku hama aho.

¹¹ Ija tingnu a Zang fuazangkyae nyanle tüikya. Ija tingnu a thalix long jaspar ningle nyanle tamchu kristel lailaile tsaotha le tüikya.

¹² Ngailom bün anyi füikya tüle tsuakya long katuke ija tingnu akhople tüikya. Ngailom bün anyi a kaxtaimix bün anyie nyele tüikya. Ngailom ma Israel homjen bün anyi mün zalaxle tüikya.

¹³ Kaopong ma ngailom azom pong füi tüikya: Handünchi ma azom, shuathongchi ma azom, shuakuxchi ma azom, üntoxle hannopchi ma azom.

¹⁴ Ija tingnu katuk a thong bün anyi küilaxle zing; ibu ma Chun Hosa wangshem hwom bün anyi mün zale tüikya.

¹⁵ Ku füi akaxkya kaxtaimix ma ija tingsho, ija ngailom hia katuk thüt angkya hanpakma hun kaithox tuita tüikya.

¹⁶ Tingnu a olwot hia okhao ma tomwüi tüikya. Ija kaxtaimixe chix ma tüikya othüt kaithox füi thütkoxle olwot ma 2,400 km bang, ilaxle okhaochu ipongpong wüi bang.

¹⁷ Ija kaxtaimixe katukchu wüi thütle ano, ilaxle chixe twonkya othüt ma akiak koxle chuakkya saxlom thüt 60 bang.

¹⁸ Katuk a jaspar füi ilaxle tingsho a hun tsaotsao füi le zawan lailaile tsao wüi tsaole zingle tüikya.

¹⁹ Tingnu katuk küikya longbu a thalix long pangnu li füi aza-apuale tüikya. Pongwang angkya thongküi nui ang jaspar long lax, anyi lükya a safir long lax, azom lükya a agate long lax, ali lükya a emarel long lax,

²⁰ aga lükya a onik long lax, azok lükya a karnelian long lax, anüt lükya a kresolait long lax, achyet lükya a beril long lax, aku lükya a topaz long lax, bün lükya a kalsedom long lax, bün-büta lükya a turkuis long lax, bün anyi lükya a amathit long lax.

²¹ Ngailom bün anyi a liknu bün anyi changkya; ngailom tupong a liknu muakpong füi zing. Tingsho lomnu a hun tsaotsao füi zinglaxle zawan lailaile tsao wüi tsaole tüikya.

²² Kue tingnu ma zangshwom-hom chingün chemthüikoxle ija ma zangshwom-hom ang a Opupa chix tomtata tamchu Chun Hosa le changle.

²³ Ija tingnue she to nyan angkya zanghan hia lyetnu lax angkya chem mwot chitüi, chemthüikoxle Zang fuazangkyae ija to nyanle tüi tamchu ija ma wüntik ang Chun Hosa changle.

²⁴ Chaxwannu angkya khünaknu ija wünnyan zung to ahamüi ilaxle chaxwannu angkya wanghombue ija khato hwom tuinabu apüiüi.

²⁵ Ija tingnu ngailom nyixtungtale daple thomüi; ibu otuechu münhaküi, chemthüikoxle ikhato zangnakkya müntüi.

²⁶ Ma haxtoktok tokya fuazang tamchu tuina ija tingnu ma asox ang tomüi.

²⁷ Ikoxlechu chitsaokya oli chemchu ija tingnu ma nop ang müntomüi, iningle zakkop mwot mokkyabu hia atsekyabu owachu ikhato dong ang müntom. Ikoxle Chun Hosa khüzün Laipex ma opang mün zale tüilaxpuix, ibu tix dong ang tomüi.