MIKNGÜN-OHÜN 20 - OTSAO BAIBEL (BSI)

Hajat tuita Zangpua

¹ Ifüima zangkangting tokya kaxtaimix tuita jukya kue ngün. Chix chak ma othong chitüikya tswom kapatja hia lixkya janbüi koplaxle tüikya.

² Dragon, owa owang pongkya pu hex, chix a Bao chichangba Haxshix, Ija chixe kop ilaxle zangpua hajat tuita hanpakma janbüi füi khale thom.

³ Zangpua hajat tuita ma ashuk tanto chaxwannu dyen angkya chemchu chitüi angkya hanpakma kaxtaimixe chix othong chitüikya tswom khato sho; ija oka hak üntoxle tsüile thom. Ifüima chix onox ma tam dan angkya changle.

⁴ Ifüima chongwang tüntongbu üntoxle ibu ma thungle tüikyabu ang kaxfün fa angkya tsakzong fakya kue ngün. Jisu Khrista-e angaikya otsingtsing hia Zang Kax apuk-apuakya khoma dingsomkya chasabuchu wüi kue ngün. Ibue müi hia chix chapa to chishwom, ilaxle hwom khangpong ma chichangba chak male müi münwan hwome chilax. Zangpua hajat tuita Khrista füi tomle apün-ada angkya hwom ozün ang achangle chat.

⁵ (Zangpua hajat tuita ashukle machang tanto zidaokya mamabu owachu chatle ozün ang achangle chichat). Zidaokya azangle zokya pongwang lükya a ija changle.

⁶ Ija pongwang lükya zidaokya azangle zokya khama womkyabu a tüle mongmüi tamchu mohiman changle. Anyi lükya zike hwom to chemthüi ang müntho; hwom a Zang hia Khrista nguapabu ang achangüi, ilaxle hwome chix füi tomle zangpua hajat tuita apünüi.

Haxshix to Lütkya

⁷ Zangpua hajat tuita ashuk füima haxshix a chix kun kha tokya daple alaiüi,

⁸ ilaxle chix a chaxwannu handün hia hannop, shuakux hia shuathong pangnu khato chiakle tüikya jat-li, ija Gog hia Megog, dyen ang laile paoüi. Haxshixe shuakax angkya fix ningle tüikya khünaknu azan ang nyakle asoxüi.

⁹ Chaxwannu pangnu khato chiakle hwom paoüi ilaxle Zang khünaknu thongnui hia chixe mongkünkya tingnu akhople kopüi. Ikoxlechu zangkangting tokya wün düt laxle hwom amütüi.

¹⁰ Ifüima Bao, owae hom dyenle thompuix, chixchu wüi müi hia othai ajebu tswonle awüt thomkya okham wünnu tilo ningle tüikya khato tswonle awüt; ilaxle ikhato hwom zangnak zangngai jento tüle fuxtsüile ngoüi.

Oshuk Kaxfün

¹¹ Ifüima kue chongwang tüntong tsekya hia ikha ma thungkya mix ngün. Chix thüntho angkya ding hia hax paole sam üntoxle ibu chatle tamchingün.

¹² Üntoxle chongwang tüntong thüntho ma mangbu, chongkya hixkya talailaile ajongkya kue ngün. Laipexbu dap, ilaxle mama laipexchu dap, ija a khüzün Laipex. Laipexbu ma chemle bangpuix, ija ningle hwome ma mwot füifüi to zidaokyabu ang kaxfün fa.

¹³ Ifüima tinue ma ma tüikya zidaokyabu alaile kox. Zike tamchu ama-lumtingechu hwom ma tüikya zidaokyabu kox. Hwome chemle mokdaopuix, ija hwom mwot füifüi to hwom pangwüi kaxfün.

¹⁴ Ifüima zik hia lumtingbu tinu ningle tüikya okham-wün khato tswonle awüt. (Ija tinu ningle tüikya okham-wün a anyi lükya zik changpu).

¹⁵ Khüzün Laipex ma opang mün chibang laxpuix hwom pangwüi tinu ningle tüikya okham-wün khato tswonle awüt.