MIKNGÜN-OHÜN 19 - OTSAO BAIBEL (BSI)

¹ Ifüima tüle chongkya khünaknu othom akhongkya ningle zangkangting to ozing kue atat. Hwome thüi: “Zang achuakkox! Khosün, fuazang hia tsakzong, kem Zang kux changle!

² Chix kaxfünbu otsingtsing, tamchu sukya changle. She müi-hi-aji mongzok füi, zangfang fün amakya tsahangcha, chixe thajao ang tomdaoa. Chix thothakyabu langkya khoma, Zange she sikngün ang tom.”

³ Anaolechu hwome akhong, “Zang achuakkox! Chongkya tingnu zokle ashunkya, wünkhut hia wünle ding to, othuithuima dongle ngoüi!”

⁴ Chongwang tüntong ma thungle ngokya Zang shwomle tsa ali tüikya tüichong mixmüi hwom üntoxle ozün ma tüikya müi ali akhux. Hwome thüi: “Amen! Zang achuakkox!”

Chun Hosa Aju-asomkya Fongkhat

⁵ Ifüima chongwang tüntong makha-nge ozing tuita laile ile akax, “Chix chathua zale tüikya, chix dabu tamchu chix khünaknu; hixkya chongkya noke, Zang achuakkox!”

⁶ Ifüima khünaknu tüle tüikya zing ningle, asoxsoxfüt le ti dütkya sap zing ningle tamchu zang adungkya ozing ningle kue atat. Hwome ile akaxkya kue atat, “Zang achuakkox! Khüthak Zang a Chongwang changle!

⁷ Oman, kem mongmüi pwonlahax; keme chix chongkya achuak-hax! Chun Hosa Aju-asom ang otu nguile; ija hanpakma tuinuchu achwonle tüile.

⁸ Jikjepkya jaknyi tsaothakya füi, she aza-apua ang koxdaoa.” (Nyitse a Zang khünakbue mokkya mwot müikya changpu).

⁹ Ifüima kaxtaimixe ku ang thüi: “Ija zalax: Chun Hosa aju-asomkya püntuxkya to ahyenkyabu mohiman.” Kaxtaimixe chatlechu thüi: “Ijabu a otsingtsing Zang kaxbu changle.”

¹⁰ Chix shwom ang ku chix chitong ma akhux, ikoxle chixe ku ang thüi: “Nange ile taxchang! Kuchu wüi hünzom füi tamchu hüntüi hünnaohom, opange Jisu-e angaikya otsingtsing ma shingmongle koplaxle tüipuix, hwom lailaikya da tuita changle. Zang shwomkox! “Chemthüikoxle Jisu-e angaikya otsingtsing a cheme ajebu mong ma zangwün puix ija changpu.”

Mantho ma Ngakya Mix

¹¹ Ifüima zangkangting ka daple tüikya kue ngün, ija ma mantho tuita tüikya. Ija mankho ma ngakya mix ang mongong shingmong üntoxle otsingtsing le nyak; chixe kaxfünkya hia azankyabu mwot sukya olom ma mok.

¹² Chix mikbu a wünle ningle tüikya, üntoxle chix khang ma khohom obiobi asün. Chix ang ija ma mün zale tüikya, ikoxlechu chix boma ija chemhex owaechu chiawan.

¹³ Chixe ajie awang le tüikya nyi awun. Chix mün a “Zang Kax.”

¹⁴ Man athokyabu khoma nga üntoxle jaknyidax tsaothakyabu awunlaxle zangkangting süpahibu chix füito azui.

¹⁵ Anaxkya changlo oja füi chixe chaxwannu nok to anao angkya hex, ija changlo chix wikha angkya lai. Chixe jan kaithox füi hwom thakma apün angkya changle, üntoxle tüle shixkya Khüthak Zang mongtsik grep-ti fyetnui to chix cha füi tingüi.

¹⁶ Chix nyiza hia chix weho ma mün ija zale tüikya: “Wanghombu thakma Chongwangpa hopunubu thakma Opupa.”

¹⁷ Ifüima kaxtaimix tuita zanghan ding ma ajongkya kue ngün. Ding hia hax nyi bato pile ngokya osabu pangnu sele akhongle chix akaxkya zing kue ile atat: “Oman, Zang püntux chongkya to pangwüi tomle nguihüi!

¹⁸ Nuilax üntoxle wanghom, süpahi akhokya, süpahibu, ibu müi; man hia hwom khoma ngakyabu müi; pangnu khünaknu da hia pankyabu tamchu chongkya hixkya, pangnusa müi saxlax.”

¹⁹ Ifüima mankho ma ngale tüikya mix hia chix süpahibu füi azan ang chaxwannu angkya müi hia wanghombu tamchu hwom füikya süpahibu tomle asoxkya kue ngün.

²⁰ Ija müi hia chix thüntho ma ohünotün mwot mokle ahokya othai ajepa nyi a kun ma shole thom ang laxlaxtox. (Müi münwan koplaxle ngokyabu hia ija müi chapa to shwomkya khünakbu pangwüi chixe ibu ohünotün mwot tokhange dyenle laxkyabu changle). Ija müi hia ajepa nyi a khat wün khato ozün ma tswonle awüt.

²¹ Mankho ma ngale tüikya mixsün wikha makhange laikya changlo füi süpahibu a komle langle awüt; osabue ibu müi otsuaktsuak ma sax.