MIKNGÜN-OHÜN 17 - OTSAO BAIBEL (BSI)

Fuale Wünkya Tsahangcha

¹ Ifüima kaxtaimix anüt kha angkya tuita anüt lükya pe koplaxle tüikya mixe ku hato hüilaxle thüi: “Oman, kue nang hama fuale wünkya tsahangcha, thüikoxle shuajenbu hama zingle tüikya chongkya tingnu tuita to chem sikangün angkya hex ahofang.

² Chaxwannu angkya wanghombue she füi chinunchakkai, üntoxle she angkya müi-hi-aji mongzok ju ling laxle chaxwannu angkya khünaknu jutok le changüna.”

³ Ku ma chasa wang, ilaxle kaxtaimixe ku faokha to pao. Ikhato kue khisumkya müi tok ma thungdao le mixcha tuita ngün; ija müi ma Zang mün ama le zakyabu okhui apongle tüikya. Ija müi ma okhang anüt üntoxle ozong bün le tüikya.

⁴ Ija mixchae lumle khikya hia khisumkya nyi lax üntoxle hun, thalix long, liknu, ibu füi zingkya lik-wün she tsangtsa awang le tüikya. Ilaxlechu she chak ma nushix dongkya tamchu she chinunchakkai chitsao chithakya mwote awang laxle hun pe tuita tüikya.

⁵ She khangpong ma huxsa zangwün füikya mün tuita ile zale tüikya: “Achongkya Babilon a chaxwannu ma chinunchakkaile tüikyabu hia nushix dongkya mwot-kat honu changle.”

⁶ Ija mixcha a Zang khünaknu aji hia Jisu kax ma laxle tüikyabu langkya ajibu ling laxle tokkya kue ngün. Otue kue she ngünpuix, ku ang tüle jepa.

⁷ Kaxtaimixe ku ang thüi: “Nang ang chem jepapu? Ija mixcha hia she ngale tüikya müi oja ma okhang anüt üntoxle ozong bün tüipuix, hokhi ba angkya huxsa zangwün kue nang hama apuafang.

⁸ Ija müi ami ozün ma tüikya, ikoxle athax a ozün ma tammüntüi; ija a othong chitüikya tswomkha tokya alai laxle amüt angkya khato paoüi khakha. Chaxwannu angkya khünaknu opang mün ami khünak zingpong tokhange wüi khüzün laipex ma zale chitüikya hex, hwome ija müi ngünkya zuma tüle abüt maxüi. Ija a ozün ma tamchitüi, ikoxle ija tamchatle ngaiüi.

⁹ “Ija ma hwon-je tamchu tsingwankya lomle. Okhang anüt a haxnu anüt changle, oja ding ma mixcha thungle tüilaxpuix. Ibu a wanghom anütchu changle;

¹⁰ hwom aga nguakdaoa, tuitae athaxchu apün ngole, ilaxle mama tuita a mahüi; otue chix nguiüihex, chixe hidaole wüi apün angkya changle.

¹¹ Üntoxle müi oja tam ozün ma tüikya hex, ikoxlechu athax ozün ma tamchitüi, chix a achyet lükya wanghom changpu. Chixchu wüi anüt khama tuita ilaxle amüt angkya nui to chixchu wüi pao angkya changle.

¹² “Ozong bün ojapang nange ngündao laxpuix, ibu a apün ang masütkya wanghom bün changle, ikoxlechu hwom ang müi füi tomle wanghom le apün ang khonta tuita hanpak fa angkya changle.

¹³ Hwom bün bibi pangwüi mongtex tuita changle, ilaxle hwom tsakzong hia apün-adakya hwome müi ang koxle.

¹⁴ Hwome Chun Hosa füi azanüi, ikoxlechu Chun Hosae, chixe nyakle hia zünle kopkyabu tamchu mongong ma shingmongle chix füito azuikyabu füi notom laxle ibu to anaoüi, chemthüikoxle chix a hopunubu thakma Opupa üntoxle wanghombu thakma Chongwangpa changle.”

¹⁵ Chatlechu kaxtaimixe ku füi akaxle thüi: “Nange ngünle ngokya tibu, oja dingma tsahangcha thungle tüilaxpuix, ibu a chaxwanbu, khünakbu, jat-libu tamchu kaxngaobu changpu.

¹⁶ Nange ngünkya müizong bün üntoxle müi, ibue tsahangcha to miktsaküi; hwome she kuxka komle paoüi ilaxle she ohua ma dantoxüi; hwome she müi saxüi üntoxle wün füi she amütüi.

¹⁷ Chemthüikoxle Zang kax changle mangai tanto hwome notom le saxmokkya hia apün-ada angkya hwom tsakzong müi ang koxkya tokhange chix mongtex mokle le angkya hanpakma Zange hwom kün-mongto mongtsukya tutex fadaoa.

¹⁸ “Nange ngünkya mixcha a chaxwannu wanghombu pangnu thakma apün angkya chongkya tingnu tuita changle.”