MIKNGÜN-OHÜN 16 - OTSAO BAIBEL (BSI)

Zang mongtsik füikya Khong

¹ Kaxtaimix anüt füi zangshwom-hom tokhange akaxkya kaxzing kue ile atat: “Paolax üntoxle ibu Zang mongtsik khongbu chaxwannu to thokkox!”

² Pongwang angkya kaxtaimix pao ilaxle chix khong chaxwannu ma thok. Müi münwan koplaxle tüikyabu tamchu chix chapa shwomkyabu ma za adünkya hia tüle luakle kakkya makchakbu lai.

³ Ifüima anyi lükya kaxtaimixe chix khong tinu khato thok. Ti khünak mang aji ningle achang, ilaxle tinu mongto ngokya zünmok komle zi.

⁴ Ifüima azom lükya kaxtaimixe chix khong shua hia tümik fuak nui to thok, ilaxle ibu aji ang achang.

⁵ Ti to hu ang ngokya kaxtaimixe akaxkya kaxzing kue ile atat, “Nange zingkya kaxfün sule, O Atsaokya; nang owa tüipuix tamchu tüikyahex!

⁶ Hwome Zang khünaknu hia ajebu, aji thokdao koxle nange hwom ang, aji ling ang koxpu. Hwome chem kopse hex, hwome ija koppu!”

⁷ Ifüima zomtong makhange akaxkya kaxzing kue ile atat, “Jowanpa Khüthak Zang! Nang kaxfün otsingtsing, tamchu sukya changle!”

⁸ Ifüima ali lükya kaxtaimixe chix khong zanghan thün ma thok, üntoxle ija tüle khamkya füi khünaknu zokle ashun ang tom.

⁹ Tüle khamkya ija wün khame hwom to akhatle hat, ilaxle ibu thama thakma owae apünpuix, ija Zang mün to hwome thuakzom; üntoxle fuazangkya achuak achen ang hwom ang mong chichat.

¹⁰ Ifüima aga lükya kaxtaimixe chix khong Ija müi tüntong ma thok. Müi wangting to zangnake alum, ilaxle hwom to kakkya khoma khünaknue male-le to tsüt,

¹¹ üntoxle hwom to kakkya hia makchak khoma hwome zangkangting Zang thuakzom. Ikoxlechu ma ochax lom tokya hwom ang mong chichat.

¹² Ifüima azok lükya kaxtaimixe chix khong Eufrat shuanu ma thok. Handünchi tokya wanghombu nguikya lomzang ang ija shua zople zan.

¹³ Ifüima lukbu lailaikya chitsaokya chasabu azom kue ngün. Ibu a dragon wikha angkya tamchu othai ajebu wikha angkya laikyabu changle.

¹⁴ Hwom a ohünotünbu mokle ahokya haxshix chasabu changle. Khüthak Zang Hanpak Nyix azan angkya hanpakma chaxwannu angkya wanghombu komle sele afox ang, ibu chasa azom hwom hato pao.

¹⁵ “Apalax! Ku ahuxmix lailaile nguiüi! Tomhua ma lai laxle noknu thüntho ma zakkop thajaokya naktüi le owae mik-hingkya füi ma nyiza otya ma laxle ngolaxpuix, chix mohiman.”

¹⁶ Ifüima chasabue Ibri kax ma Armagedon le nyakkya nui to wanghombu sele tomle asox ang tom.

¹⁷ Ifüima anüt lükya kaxtaimixe chix khong zangwin to thokle awüt. Zangshwom hom angkya chongwang tüntong makhange kaxzing tuita azaxle laile thüi: “Ija tsuakdaoa!”

¹⁸ Ipongma zangchang ajep, ozing lai üntoxle zang adung, tamchu bütix si. Khünak zingpong tokhange ilailaile bütix sikya tümatüitox; bütix si khakha ma ija a huanu changkya!

¹⁹ Achongkya tingnu azom ang achangle ahak, ilaxle pangnu chaxwan tokya tingnubu amüt. Zange Babilon tuita chongkya tingnu texle atak, ilaxle chix wansa angkya ju oja tüle chix mongtsikkya ju changpuix, ija ling ang tom.

²⁰ Shuazo pangwüi osün chingün le max, haxnu pangwüi amua le sam.

²¹ Tüpong tüpong chongkya jun, tuak punyi bün pong lixkyabu ding tokya düt, ilaxle jun makhange apüikya thamabu khoma Zang to thuakzomle changkya khünaknu ding to ibu düt ang tom, chemthüikoxle ibu thama a tüle chongkya sikngün changle.