MIKNGÜN-OHÜN 13 - OTSAO BAIBEL (BSI)

Müi Anyi

¹ Ifüima tinu kha tokya müi tuita laikya kue ngün. Ija ma ozong anüt üntoxle okhang anüt le tüikya; ozong pangwüi ma khohom tüikya ilaxle okhang pangwüi ma Zang mün amakya münbu zalaxle tüikya.

² Ija müi sünngün ma chaxnu ningle, ocha a chep cha ningle üntoxle owikha a mailang wikha ningle, le tüikya. Dragon-e ija müi ang ma tsakzong, ma chongwang tüntong tamchu mae apün-adakya zong, ibu kox.

³ Ija müi ang okhang tuita a omang ang achangle thomzün apong ikoxlechu ija mak müiünkya ningle kue ngün. Omang ang achangle mak laxdaokya müikya ngünlaxle chaxwannu pangwüi abüt ilaxle ija müi füito azui.

⁴ Chixe ma tsakzong müi ang koxdao koxle pangnue wüi dragon tongshwom. Hwome müichu wüi shwom, ilaxle thüi: “Ija müi ningkya owa tamtüi? Chix füi azan ang owae thoüi?”

⁵ Ija müi ang kax achongchong akax ang tamchu Zang ajao ahai angkya otun kox; ilaxlechu lyetkua punyi anyi chizak le mok angkya tsakzong chix chak to dan.

⁶ Ijae, Zang, chix mün, chix ngwotnui tamchu zangkangting tokyabu pangwüi thuakzom ang süt.

⁷ Zang khünaknu füi azan üntoxle hwom to lüt angkya chix ang kox, ilaxle pangnu jat-li, chaxwan longkho, kaxngao hia homjenbu thakma apün-ada angkya zong kox.

⁸ Langkya Chun Hosa kux ang tüikya khüzün laipex ma ding hi hax zingüi thoto wüi mün zale tüikyabu chi-e homtoxle chaxwannu ma ngokya khünak noke ija to shwom angkya changle.

⁹ Owa ma na zaipuix chixe apalax!

¹⁰ Koplaxle pao angkya le tüikyabu koplaxle pao angkya wüi changle; changlo füi langüi thüikyabu, changlo füi lang angkya jao changle. Ikhama Zang khünakbu hanpakma, adukya hia mongong tüi angkya lomle.

¹¹ Ifüima chaxwannu angkya laikya müi mama kue ngün. Ija ma chun zong lailaile ozong anyi zaile, ilaxle ijae dragon zangwün ma wünle tüikya.

¹² Chix thüntho ma ijae owang pongkya müi tsakzong tüle chongkya chixe twon. Makkha daokya azangkya owang pongkya müi to shwom angkya chaxwannu angkya khünak pangnu to chixe atsang.

¹³ Anyi lükya müi ijae khomatsikkya mwotbu tüle mokle aho. Ijae nok mikngün ma chaxwannu to ding tokya wün düt ang kox.

¹⁴ Owang pongkya müi thüntho ma ija ang mok ang dankya khomtsik mwotbu mokle ahokya tokhange chaxwannu ma ngokya khünaknu pangwüi dyen. Changlo füi thomzün apongdao koxlechu azangle tüikya müi achuak achenle chix chapa zing angkya ija müie hwom füi akax.

¹⁵ Pongwang angkya müi chapa zingle tüikya to, ija chapa akax ang tsuak tamchu chix tong chishwomkyabu pangwüi lang ang tsuak le tüikya hanpakma, anyi lükya müi ang ija chapa to khüzün fakya zake müt ang tom.

¹⁶ Hixkya chongkya, chitüi chinangkya hia tüinangkya, da hia panle thomkya khünaknu pangnue wüi tsaxchi chak ma chichangba khangpong ma münwan apüt angkya hanpakma ija müie khünaknu atsang.

¹⁷ Ija müi mün chichangba chix lüix to tüikya huake chilaxle tüikya owaechu shak ang hia hang ang müntsuaküi.

¹⁸ Ikhama je lomle. Owa ma jetüi hwonlang laxpuix chixe ija müi mün hia huake chem hanpak hex mokle alai ang thoüi, chemthüikoxle ija huake a khünak mün hanpak changle. Ija huake a 666 changle.