MIKA 5 - OTSAO BAIBEL (BSI)

¹ Jerusalem angkya khünaknu, hünzom süpahibu asoxlax! Hwome kem ziakople changdaoa! Hwome Israel nok lompabu to single ngole!

Zang-e Bethlehem angkya Lompa tuita Lai angkya Tsao

² Jowanpae thüi: “Efrathah angkya Bethlehem, nang a Judah tinglongbu khama ahixkya tuita, ikoxlechu nang makhange kue Israel nok lompa tuita angaiüi. Chix putong hwom pukax a kaitokya hato chatle chatüi.”

³ Ikhoma ija naosa ngün angkya mixcha tuitae nao ngünle changkya kople Jowanpae chix khünaknu a zan-nokbu chak to koxle thomüi. Ifüima zanda ang ngokya Israel khünak ibu ma khünakbu füi tamchatle motomle changüi.

⁴ Chemtue chix nguiüihex, chix ma khünaknu thakma Jowanpa tokhange hüikya janzüi hia Jowan Zang chix chongwang tsak-zong füi apün-awangle changüi. Chix khünaknu a chaza-angkya chemchu chitüile ngoüi chemthüikoxle zangfang angkya khünaknu pangnusae chix zaxzangkya to changkox-ale ngoüi,

⁵ ilaxle chixe tumüi-mongsom apüiüi. Chemtue Asiria nok, keme ziakople thomkya pan kaile, kem chaxwan tingtakle changüihex, keme kem kha angkya mixtsak naomüibu hwom füi azan ang apaoüi.

Khangkhosünkya hia Sikngün Fakya

⁶ Chang-pax füikyabu zongma laxle, Nimrod haxtok, Asiria nok tingtakle kopüi, ilaxle hwome Asiria nok kem haxtok tingtakle nguipongma, ibu chak tokya hwome kem khosünle kopüi.

⁷ Israel khünak opang chizile azang laxpuix, ibu a jat-libu hanpakma Jowanpa tokhange ahüikya tamchatle azün ang tom angkya nyenti ang, pünnu kho to puakya maipuabu ningle changüi. Hwome khünak to chichangle Jowanpa to mongongkya tüiüi.

⁸ Mixjat mixli khato danle toxkyabu a faonu mongto chichangba wunsa khato osüt lomle ngokya mailang ningle changüi: ija chun zyem khama nop, ibu to shing, ilaxle ibu ashikle akhix: ilaxle khosünle kop angkya mongong angkya ojao chitüi.

⁹ Israel noke hwom zanpabu tingtakle kopüi ilaxle ibu oli thule amaüi.

¹⁰ Jowanpae thüi: “Hepongma kue hünzome manbu paoüi ilaxle hünzom man-kanlinbu amaüi.

¹¹ Kue hünzom haxtok angkya tingnubu amaüi ilaxle hünzome ziakople thomkya zanhunuibu amaüi.

¹² Hünzome twonkya chajik-muashem zong kue amaüi ilaxle hünzom a aje-ahing chemchu chitüile dantoxüi.

¹³ Kue hünzome shwomkya chapabu hia longküikyabu amaüi; athaxpi hünzome mae zingkya jali chemtochu shwom-tole münchangüi.

¹⁴ Kue hünzom haxtok angkya baozangchanu Asherah chapabu thuple atsunüi ilaxle hünzom tingnubu amütüi.

¹⁵ Ilaxle ku mongtsik chongkya füi kue ku kax ma chilaxle tüikya onok pangwüi to kue olüix khomüi.”