MIKA 1 - OTSAO BAIBEL (BSI)

¹ Jotham, Ahaz, hia Hezekiah hwom Judah nok ma wanghom ang ngopongma, Jowanpae chix kaxho ajepa Mika makhange kox. Chix a Meresheth tinglong angkya changkya. Jowanpae Samaria hia Jerusalem bama ibu pangwüi Mika hama ngaile aho.

Samaria hia Jerusalem Nyi bama Mangsopkya

² Ija apalax, jat-li pangnu; ija to apalax, chaxwan ma ngokyabu pangnu! Jowanpa Khüthak Zang-e hünzom füi alünle kaxkhi koxüi. Apalax! Chixe zangkangting zangshwom-hom tokhange akaxle.

³ Jowanpa a chix otsao nui tokhange nguingole; chix juüi ilaxle haxnukhobu to ahamüi.

⁴ Ifüima chix chitong ma haxnubu chule paoüi wün zui ma müizao chukya ningle; ijabu haxnuchabu to thokle ajenüi haxkho tokhange ti thokle ajenkya ningle.

⁵ Israel khünaknue ochax lyen ilaxle Zang zan to kale changdaokya khoma ibu ile changüi. Israel noke Zang zongto tüikya bama owa ma tsaitox kaxfele changüi? She jaoechu chapabu to shwomtole thaidaokya khoma Judah angkya pongwün tingnu Samaria ma feüi hia? Jerusalem ma jao feüi hia?

⁶ Ikhoma Jowanpae thüile: “Kue Samaria a kothofa to onok samle paoünkya nui-ting, grep zu küile changkya nui ang achangüi. Kue tingnu angkya longkhixbu thokle haxnucha to atuile ajoüi, ilaxle tingnu chifün oman chitüile achangüi.

⁷ Ikha angkya chapabu pangwüi thuple akhix awütüi. Zangshwom hom angkya tsangtsa hangkya mixchabu ang koxkya oli pangwüi wün ma max ang tomüi, ilaxle ibu omua pangwüi chilaxli athünle thomkya ang achangüi. Saxcha-tuacha nyakle zomzingkya hanpakma Samaria-e ibu apong angkya changle. Pangnu khato wüi hwome zangshwomnui ma tsangtsa hangkya mwot mokkya khoma athaxpi hwom a zanpabue koplaxle hwople paoüi.”

⁸ Ifüima Mika-e akax: “Ija khokho ma ku mongmaxle mangsopüi. Ku mongma aho ang, ku cha hua ma tamchu nyi-za chilax homtoxle akhople ahamüi. Ku hijan ningle juaüi ilaxle ostris olo ningle ngaoüi.

⁹ Samaria mak a tam-müitoxüi münchang, ija lailaile ija ningkya thama Judah-echu apong tu nguile; ku khünakbu ngwotnui, Jerusalem tingnu angkya panbu hato, ibu pünle ama angkya tunu nguile hüile.”

Jerusalem Hato Zanpabu Soxle Hüi

¹⁰ Gath ma tüikya kwom zanpabu hama kwom to lütkya bama wünle taxkox; Hünzom mang sople changkya hwome ngün ang taxtom. Beth Leafrah angkya khünaknu haxbu khato nguakle atüikya makhange hünzom küntsik-mongma ahohu!

¹¹ Hünzom Shafir angkya khünaknu, hünzom ohua ma tamchu zakkop ashukle pünpao ang paole samlax. Zaman ma ngokya khünaknue hwom tingnu angkya laile hüise chitsu. Chemtue hünzome Bethezel angkya khünaknu sop-juakya zing atatüihex, ikhato khangkhom angkya nui chitüikya hünzome awanle koplax.

¹² Maroth angkya khünaknu nazak kop angkya sungle tan-ngole, chemthüikoxle Jowanpae thama Jerusalem hato soxle hüi ang tomdaoa.

¹³ Hünzom Lakish ma ngokyabu, manbu man-kanlin ma adang koxle. Hünzome Israel nok ochax thüi anole ilaxle Jerusalem ang ochax lyen ang tomle.

¹⁴ Üntoxle athax, Judah khünakbu, hünzome Moresheth Gath ang achexünpox-o thüilax. Israel nok wanghombue Akzib tinglong angkya ofong-otsox chemchu münkop.

¹⁵ Mareshah angkya khünaknu, Jowanpae hünzom a zan-nokbu chak to koxdaoüi, ibue hünzom tinglong akhople kopüi. Israel nok lompabu a Adulam longkun to paole azwonüi.

¹⁶ Judah khünakbu, hünzome mongkünkya naosombu hanpakma mang sople khang onglax. Hünzome ma alüile ma khang okunbu khang hwonkya ningle hwon ang tomlax, chemthüikoxle hünzom naosombu hünzom chak tokya koplaxle zanda ang paoüi.