MATHI 8 - OTSAO BAIBEL (BSI)

Jisu-e khünak tuita Kak Amüikya

¹ Otue Jisu haxhua tokya ju, khünaknu othom chongkya tuitae chix man tole hüi.

² Iponge angwonpa tuita chix hato hüi üntoxle chix chitong ma akhuxlaxle thüi: “Nwotmix, nang mong jangtsu thüiningle nange ku amüi fahüi!”

³ Jisu-e chix chak thui ilaxle chix to twonle thüi: “Ku mongtsule, müilax.” Ijama wüi ija mixsün kak müi.

⁴ Ifüima Jisu-e chix füi akax: “Apalax, owa hamachu taxwün, ikoxle tangthole nguapabu hato paolax ilaxle hwome nang chak to thwon ang laxkox. Ifüima pangnu hato nang kak müikya ahole, Mosa wanlom ma tüikya ningle tö laxkox.”

Rom nok Alixachong Da tuita Kak Jisu-e Amüi

⁵ Chix kaparnaum to nguikya zuma, hota thakma apünkya Roman süpahi tüichong tuita chix hato nguilaxle chix tong shwomle akax,

⁶ “Jowanpa, ku da tuita kaklaxle chingcha ashukle jiple ngole.”

⁷ Jisu-e thüi: “Ku nguilaxle chix kak amüiüi.”

⁸ Ikoxle ija alixachonge thüi: “Jowanpa, nang pongpongkya ku loxkax fang to pui angkya ku ma ojao münasu. Kax zaza ma akax fa, ija ma wüi ku da kak müiüi.

⁹ Chemthüikoxle ku chuwüi ma thak ma akhokyabu laxlaxle ngokya süpahi tüichong tuita changpu; Ku fangmachu süpahibu tüihu le; Kue tuita ang ‘Paokox’ jangthüiba chix pao angkya wüi; mama mix ang ‘oman’ jangse ba chix hüi angkya wüi; tamchu ku da ang ‘Ibu mokkox’ le tom koxle chixe apale.”

¹⁰ Ija kax atatlaxle Jisu abüt ilaxle chix füito azuile hüikyabu füi akax: Kue hünzom ang otsingtsing akaxpu, Israel khama kue chix bukux mongong füikya mix maatakkya.

¹¹ Ilaxle kue hünzom füi akaxpu, handün hia hannop chito khange khünakbu huanuma nguilaxle, Abraham, Isak, hia Jakop hwom füi tomle zangkangting fongsüt ma womüi.

¹² Ikoxle ija wangting ma wom haxkux khünakbu a zangnak khato awütüi! Ikhato hwom ang mikfi jenkya hia wa azyakkya tüiüi.

¹³ Ifüima Jisu-e ija alixachong füi akax: “Nang hom to chatlax, nange chem jupuix, ija nang ang mokle faüi.” Ija alixachong da tuita kakle ngokya mix ipongkhae wüi müi.

Jisu-e Khünaknubu Kaklak Amüi

¹⁴ Ifüima Jisu Pitar hwom hom to ngui. Üntoxle chixe Pitar honyenu tundün kak kakle lya ma shuile ngokya ngün.

¹⁵ Jisu-e she chak to twonkya füi tomle, tundün kake she dan; she zolaxle chix to humele fa.

¹⁶ Ifüima hansonge, khünaknue haxshix chasa füikya khünakbu chix hato apüi. Chixe kaxfa tuita füi idu haxshix chasabu jwonle apao ilaxle kakmixbu pangwüi amüile kox.

¹⁷ Ile changkya makhange ajepa Isaia-e “Chixe kem boshokya tamchu kaklak mün thom”, le akaxkya kax kotok to ngai.

Jisu Wangshem ang Achang angkya

¹⁸ Khünaknu othom ngünkya zuma Jisu-e chix wangshembu ang tinu tachi to ta angkya akax.

¹⁹ Ipongkhae wanlom nwotmix tuita nguilaxle Jisu ang thüi: “Nwotmix, nang apaopao khato pao ang ku achwonle tüile.”

²⁰ Jisu-e chix ang thüi: “Hijanbu ang olua tüipu tamchu ding angkya osabu ang ozop tüipu ikoxle Khünak Hosa ang shuile nazak angkya nui ngaxchu müntüi.”

²¹ Füizuimix kha angkya mama mixe aka: “Nwotmix! Pongwang ma Apa mang zule tox angkya hanpakma ku ang hanpak laxhüi.”

²² Jisu-e chix ang thüi: “Nang ku füito pao angkya changle; zikyabu hwom zukzuk to naxzukox.”

Zangchei Adangkya

²³ Jisu khua ma dongkya ma, chix wangshembuchu wüi chix füito hüi.

²⁴ Ija pongma allele tinu khato zangcheie thule hüi ilaxle khua a tichape lyemüi khakha le chang. Ipongma Jisu a jiple asu.

²⁵ Iponge wangshembu chix hato hüilaxle azwotle thüi: “Jowanpa! Kem azün hüi; kem pi maxkya changa!”

²⁶ Jisu-e lan: “Hünzom ibukux büthüikoxle zapu? Hünzom ang mongong ibukux hixle hi?” Ifüima chix zolaxle zangchei hia tichap to sa. Ifüi tomle zingle dang.

²⁷ Ikoxle khünakbue abüt laxle thüi: “Chix a chem ningkya mix hex? Zangchei hia tichapbue ngaxchu chix kax ma laxle!”

Haxshix Chasa füikya Mixsün anyi Jisu-e Amüi

²⁸ Tinu tachi ma tüikya Gadara chaxwan to Jisu nguikya zuma, zuktsam khatokya laikya mixsün anyi chix füi apong. Bao pax daokya tüle za adünkya mixsün tüikya khoma ija lom male ang owa angchu mong chichong tsuak le tüikya.

²⁹ Ijama hulax, hokhie akhongle akax: “Nang a Zang Hosa, nang füi kwom ang chem mwot tüipu? Hanpak manguiba wüi kwom ang sikngün fa ang nang ikhato nguipia?”

³⁰ Iponge hwom füi muale atsai laxle wak ozyem tuita osüt lomle tüikya.

³¹ Haxshix chasabue chix shwomle thüi: “Nange kwom jwon angkya jangchang thüiningle, chudu wak othom khato jwonle apao hüi.”

³² Jisu-e hwom pao ang dan; ija daile hwom laile pao ilaxle wak zyem hato hüi ilaxle ibu wakbu ma hwom nop. Ifüima hulax, wakzyem abakle alüile zikle zakkho to tokhange tinu khato dütle zi.

³³ Ifüima wak nyele ngokya khünakbu awukle paolaxle, chempang le changdao puix tamchu haxshix chasae koplaxle ngokya mixsün anyi bama kaxho tingkhua to apuk.

³⁴ Ijama tingkhua angkya khünaknu Jisu füi apong ang lai. Chix ngünkya zuma hwome chix ang hwom longzi akaile shongpaofaki le akax.