MATHI 28 - OTSAO BAIBEL (BSI)

Chatle Azangle Zokya

¹ Nazak nyi lekya füima, hatdang owang nop zangzunge Meri Magdalen hia mama Meri hwom zuk to hu ang ju.

² Allele bütix si. Zangkangting tokya kaxtaimix ju, ilaxle ija long atuile awütlaxle ija dingma thung.

³ Chix sünjo zangchang jep wünnyan ningle tamchu nyiza a jun büta tse le tüikya.

⁴ Nyetmixbu tüle zale abün ilaxle omang ningle achang.

⁵ Kaxtaimixe shekobu füi akax, Hünzom taxza, hünzome pünsak ma takle langkya Jisu lompu le kue awanle.

⁶ Chix ikhama müntüi; chixe akax toxkya ningle chix a chatle azangle zodaoa. Oman hüilax üntoxle chix toxkya man to hulax.

⁷ Hünzom momle paolax üntoxle wangshembu hama wünlax: “Chix azangle zodaoa; hünzom thoma achale chix Galili to paoüi, ikhato hünzome chix ngün ang kopüi!”

⁸ Idaile hwome akhangle zuk dantoxlaxle chat. Zangale ikoxlechu mongmüi füi tamchu wangshembu hama apua angle zikle ngui.

⁹ Allele Jisu hwom füi apong üntoxle thüi: “Hünzom füi mongsom naxtüi!” Hwom chix hato hüi ilaxle chix cha to twonle chix shwom.

¹⁰ Jisu-e hwom ang thüi: “Taxza, kutüi kunao hwom ang Galili to paolax ta thüikox; ikhato hwome ku ngünüi.”

Zuk Nyetmixbu Kaxwün Wangkya

¹¹ Ibu shekobu paokya füima, zuk nyele ngokya süpahibu züita tingnu to chatlaxle chempang le changpuix ibu komle nguakhobu hama wün.

¹² Nguakhobu mixpa tüichongbu füi apong laxle kax tuita azua. Hwome süpahibu ang ngun huanuma koxlaxle thüi:

¹³ “Hünzome, kwom jiple ngotama awünningle wangshembu nguilaxle Jisu man ahuxle paodaoale akax angkya changle.

¹⁴ Gowarnor na to ija zangwün wangkya zuma kwome chix anom anai ang thoüi ilaxle hünzom ang chem khosam müntüipu.”

¹⁵ Ngun pongle lax üntoxle nyetmixbue hwom füi akaxkya ningle mok. Anyix kople Jehudi khünakbue apukkya kax a ija changpu.

Jisu Wangshembu hato Ngai

¹⁶ Jisu-e donglax ole thüikya Galili haxhua to wangshem hwom bün büta dong.

¹⁷ Hwome chix ngün ang kopkya zuma, züizüi mongto changpule chitex koxlechu hwome chix shwom.

¹⁸ Hwom hato hüilaxle Jisu-e thüi: “Zangkangting hia chaxwannu pangnu thakma tsakzong komle ku ang koxdaoa.

¹⁹ Idaile khünak pangnu hato tamchu nok khato paokox ilaxle hwom ku wangshem ang achangkox; Hopa, Hosa, Otsao Chasa hwom mün ma ibu bapti le laxkox.

²⁰ Kue hünzom hama apuakya pangnu kax ma laxle tüi angkya hwom hama anokox. Üntoxle hulax! Ku hünzom füi chaxwannu oshuk kople othuithuima ngoüi.”