MATHI 21 - OTSAO BAIBEL (BSI)

Jerusalem to Tholünle Nguikya

¹ Jisu hia chix wangshembu Jerusalem hato nguikya zuma, Olip haxhua angkya Bethfes to hwom ngui. Ikhato Jisu-e wangshem anyi

² ija kax füi achale tsanle apao: “Hünzom thüntho ma tüikya tingsho to nguilax, ikhato Gatho tuita hosa füi tomle fünle bangüi. Ija dalaxle ku hato apüi hüi.

³ Ilaxle owawae jangtsa thüiningle, chix ang ‘Nwotmix-e laxüi ta’, le thüilax; ijama chixe ija pao ang tomüi.”

⁴ Ija a ajepa kax ija kotok to ngai angkya hanpakma chang:

⁵ “Zaion tingnu ang thüikox; Hulax, nang wanghom, nang hato hüile ngole; Chix somdangle tamchu, Gatho ma ngale hüile!”

⁶ Idaile wangshem nyi achale pao ilaxle Jisu-e akaxkya ningle mok;

⁷ Okhie Gatho honu hosa nyi apüi; otok ding ma hwome ma nyiza nom ilaxle ija ding ma Jisu nga.

⁸ Khünaknubue manyi maza lomjang fole nom ilaxle züizüie fummuabu pak laxle ijabu lom ma nom.

⁹ Jisu thüntho ma tamchu chix nuakfüi ma ahamkya khünaknu ile akhong: “Dawid sasün achuakkox! Jowanpa mün ma nguikya mix, chix to Zange mohiman hüi! Zang mün achuakkox!”

¹⁰ Otue Jisu Jerusalem to nguipuix, tingnu ma ngokya khünaknu pangnu khosam laxle atüi: “Ija a owa?”

¹¹ Khünaknue lan: “Chix a Nazareth nok Jisu changpu!”

Jisu Zangshwom-Hom to Dong

¹² Jisu Zangshwom-Hom to dong ilaxle thalexle ngokyabu pangnu jwon; chixe ngun alüixle ngokya tsap hia juao hangle ngokya tüntongbu khole awüt;

¹³ Ilaxle hwom ang thüi: “Otsao Lai Kax ma zale thomkya ile tüile: ‘Ku Hom ang Zang Job-Hom le nyaküi.’ Ikoxle hünzome ija ahux mixbu azwonkya nui ang achangle thomle!”

¹⁴ Mik makya hia faishokle kakkyabu Zangshwom-Hom ma chix hato hüi ilaxle chixe hwom amüile kox.

¹⁵ Nguakhobu hia wanlom nwotmixbu, chixe mokkya ohünotün mwot ngünlaxle tamchu naosombue “Dawid Hosa achuakkox”, le akhong ngokya atatlaxle tüle mongtsik.

¹⁶ Ikhoma hwome Jisu ang thüi: “Hwome chempang akax ngopuix nange atatcha?” Jisu-e thüi: “Atatle, ikoxle; ‘Okhongui le achuak angkya hünzome naosom hama apuale kox,’ le thüikya Otsao Lai kax hünzome ele maano hia?”

¹⁷ Jisu-e hwom danle toxlaxle tingnu angkya laile Bethani to pao ilaxle ija wün ikhato pom.

Jisu-e Fupsa Pün to Thuakzom

¹⁸ Ofüi nyix anopningle tingnu to chatüi lom to Jisu ang wok ano.

¹⁹ Lomkax ma fupsa pün tuita ngünlaxle chix ija hato khele ano; ikoxle ija ma ochak boma chemchu chibang. Ikhoma chixe ija pün ang thüi: “Nang ma tamchatle oziak tam münziakpu!” Ija füi tomle ija fupsa pün zile zan.

²⁰ Wangshembu ija ngünlaxle abüt ilaxle ija fupsa pün ochwon ma chemle zipuix le zangwün.

²¹ Jisu-e lan: “Ija mong ma koplax; hünzome jangong thüiba tamchu mongao chitüi thüiba, kue ija fupsa pün to mokkya mwot hünzomechu mok ang thoüi; ija ning chem, hünzome ija haxhua füi, laox laxle chix lualua to tinu khato düt angkya ngaxchu akax ang thoüi ilaxle ija ile changkya changle.

²² Hünzome jangong thüiba, hünzome zangjop pongma ajuju komle koxüi.”

Jisu Tsakzong bama Atüikya

²³ Jisu chatle Zangshwom-Hom to ngui; chixe hwon-ano le ngoponge, nguakhobu hia Jehudi nok lompabu chix hato hüilaxle atüi: “Nange ija chemtsak-chemzong makhange mokpu? Ija tsakzong nang ang owae fapu?”

²⁴ Jisu-e hwom kax to lan: “Kuechu hünzom ma kaxfa tuita atüi fang; ilaxle ija to janglan thüiba, kue ibu chemtsak-chemzong füi mokpuix, hünzom hama apua faüi:

²⁵ Bapti kox angkya Juhan-e tsakzong ojong tokya kop? Zang tokhange koppia hia khünak tokhange koppuix?” Hwom khakha ma zangwün ang süt: “Keme chemle lanüi? Zang tokhange le lan kox nang, ‘jangchangba hünzome chix to chemthüikoxle chiong’, le chixe wüi atüiüi;

²⁶ Ilaxle keme, khünak tokhange koplea le lan koxchu khünaknu thua za; chemthüikoxle khünaknu pangnue wüi Juhan a tuita ajepa changpule lax.”

²⁷ Idaile hwome Jisu ang thüi: “Kwome münawan.” Ikoxle chixechu hwom ang thüi: “Jangchangba chemtsak-chemzong makhange kue ibu mwot mokpuix ija kuechu hünzom hama münapua.

Sasün Anyi Kaxpan

²⁸ “Athax hünzome chemle texpu? Hanpak tuita ma mixpa tuita ang sasün lükasa anyi tüikya. Tüichongpa hato hüilaxle chixe akax, ‘Kusa, anyix pi zangmo ang kathün.’

²⁹ Hosae lan, ‘Kupi kat mong münzai.’ Ikoxlechu ofüima chix ang mong alüix ilaxle zangmo ang ka.

³⁰ Ifüima hopae naolipa hatochu hüilaxle ile wüi akax. Chixe ‘jo’ le lanlaxle chix a zangto chika.

³¹ Okhi opupue hopa mongtex ma mokpuix?” “Hotüie wüi a”, le hwome lan. Jisu-e hwom ang thüi: “Kue hünzom ang thüipu: Süisai mixbu hia chinunchakkai khünakbu wüi hünzom thoto Zang Wangting alop angkya changle.

³² Baptikya mix Juhan hünzom hato otsingtsing lomtang apuale nguipu, ikoxle hünzome chix to chiong; ikoxle süisai mixbue hia chinunchakkai khünakbue chix to ongpu. Ile ngün füima ngaxchu hünzom ang mong chialüix tamchu chix to chiong.”

Haxtok ma Manzai-mixbu Kaxpan

³³ Jisu-e thüi: “Mama kaxpan apalax; Hanpak tuita ma grep haxtok hopunu tuita tüikya. Chixe ija haxtok akanle tsawat wat, ju fyet angkya nui ang hax tho ilaxle nyet nui sailia dünle tox. Ofüima mwotmok mixbu chak to ija haxtok mo angkya danle toxlaxle chix a mixwün to pao.

³⁴ Zuziak khai angkya otu nguikya ma chixe ma tsyen lax angkya hanpakma dabu mwotmok mixbu hato tsanle akat.

³⁵ Mwotmok mixbue dabu kop, tuita to fit, ata mix a lang, mama mixchu wüi long füi thuple lang.

³⁶ Tamchatlechu hopunue owang angkya füi süluile mama dabu akat; hwom tochu wüi mwotmok mixbue ile wüi hwon.

³⁷ Oshuk ma chixe Hosa tsanle akat. Tüta koxchu hwome sasün thua za angkya changtüi angpu le chixe thüt.

³⁸ Ikoxle mwotmok mixbue sasün ngünkya zuma thüi: ‘Ija a hopunu sasün tsingtsing changle; oman, kemepi chix langhax ilaxle chix tuina komle keme laxhax.’

³⁹ Ija khoma hwome chix kop; haxtok akaile chix tswonle pao ilaxle lang.”

⁴⁰ Jisu-e atüi: “Athax haxtok hopunu nguikya zuma ibu mwotmok mixbu to chixe chemle hwonüi?”

⁴¹ Hwome thüi: “Chixe ibu ochax khünakbu langjao langüi ilaxle chix tsyen otia ma koxtsuak angkya mama mwotmok mixbu ang ija haxtok mo ang tomüi.”

⁴² Jisu-e hwom ang thüi: “Homzing mixbue chilaxle, awüt thomkya long; homkom-longnu ta ang achangüi”, le thüikya kha Otsao Lai hünzome ele maano hia? Ija a Jowanpa-e mok ang tho angkya ikoxlechu mikngün ma chemtukuxkya ohünotün hex!

⁴³ Anaolechu Jisu-e akax: “Kue hünzom ang thüipu; hünzom angkya Zang wangting paoüi ilaxle oziak müile alai ang tho angkya mix ang koxüi.

⁴⁴ Ija long tok ma dütkyabu ofun ang achangle akhixüi; tamchu ija long owawa tok ma dütle jangchang thüikoxle ija labu ang achangle akhixüi.”

⁴⁵ Ija Jisu kaxpan atatlaxle nguakhobu hia farisibue hwom to dyenkya changpule awan.

⁴⁶ Ikhoma hwome chix kop ang azong, ikoxlechu khünaknue Jisu a tuita ajepa changpule laxkya ngünlaxle, hwom thua zakya khoma chix kop ang chitho.