MATHI 2 - OTSAO BAIBEL (BSI)

Handünchi tokya Khünakbu Jisu Wai ang Nguikya

¹ Wanghom Herod ma apünle ngoponge, Jehudi angkya Bethlehem ma Jisu pux. Ifüi shemle handünchi tokya, lyettsibu bama awankya züita tsingpa-manpabu Jerusalem to ngui üntoxle atüi,

² “Jehudi nok wanghom ang puxkya nao ojonghex? Kwome chix lyettsi handünchi to laikya ngünlaxle chix shwom ang nguipu.”

³ Ija kax atatlaxle wanghom Herod ang tamchu chix füi tomle Jerusalem ma ngokya noknusa ang mongma.

⁴ Chixe Jehudi nok nguakhobu hia Wanlom nwotmixbu pangwüi nyakle asoxlaxle atüi: “Messaiah a ojong ma puxüi le tüipuix?”

⁵ Hwome chix ang thüi: “Jehudi angkya Bethlehem male tüile, chemthüikoxle ajepae zakya kax ile tüile:

⁶ “‘Jehudi angkya Bethlehem; nang a Jehudi chaxwan ma tüikya tingnubu khama ahixkya le münchang; Chemthüikoxle nang makhange lompa tuita lai angkya changle. Chixe ku wangpün Israel khünaknu, lom azui angkya changle.’”

⁷ Herod-e tsingpa-manpa ibu huxsa ma se ilaxle ija lyettsi laikya füima hanpak chemtukux sütdaopuix le hwom makhange tikle lax.

⁸ Ifüima chixe hwom ija kax füi Bethlehem to apao: “Paokox ilaxle ija naosa khünkhile lomkox. Otue atak puix, kue chuwüi nguilaxle chix shwom angkya kuxma, ku hatochu apuahüi!”

⁹ Hwome wanghompa kax mong ma koplaxle pao; ipongma, ami hwome handünchi to ngünkya lyettsi hwom thothoma aham ilaxle naosa ngokya tang ma zak.

¹⁰ Ija lyettsi tamchatle ngün ang kopkya zuma hwom ang tüle mongmüi.

¹¹ Hom hommong to dongle hukoxle naosa a honu Meri füi ngün, ilaxle hwome akhuxle chix shwom. Hwome makuxkux hingho shepbu alaile, hun, so tamchu ongan müikya thalix hinghobu chix ang kox.

¹² Üntoxle wanghompa Herod hato chichat angkya wünmang ma Zange hwom füi akaxkya khoma hwom a mama lom tokhange mahomhom to chat.

Ijip to Paole Azangkya

¹³ Hwom pao füima Jowanpa Kaxtaimix tuitae Jusep füi wünmang chito akax: “Zolax, naosa hia honu nyi koplaxle Ijip chaxwan to paole azanglax. Kue nang füi tamchatle ma akax tanto ikhato ngolax; chemthüikoxle Herod-e naosa lang ang lom angkya changle.”

¹⁴ Jusep zo ilaxle naosa hia honu nyi koplaxle zangnaknak ma wüi Ijip chaxwan to paole ka.

¹⁵ Herod mazi mazile chix ikhato ngo. “Kue kusa Ijip tokya nyak”, le Jowanpa-e ajepa makhange akax ang tomkya kax kotok to ngai angkya kuxma ija ile chang.

Naosombu Langkya

¹⁶ Otue tsingpa-manpabue chix dyendaoa le wanghom Herod-e awan ang koppuix, chix ang huanuma mongtsik. Ikhoma Bethlehem tamchu tomzi tingsho pangnukha tokya, zangpua anyi makhange fangchichi lüka naosom komle lang angkya kaxtom koxle chixe khünak apao. Chixe ile tsingpa-manpabu makhange lyettsi laikya hanpak tikle kopkya ma otuthüt laxle mok.

¹⁷ Ija ma Jeremia makhange ajekya Jowanpa kax ija kotok to ngai ang tom:

¹⁸ “Ramah to tüle mang sopkya, mong maxle sopkya ozing tuita atat; Rachel a sasün hwom khoma sople ngo, tamchu sasün hwom zibakünkoxle, she a sopkya dang ang chitho.”

Ijip tokya Chatkya

¹⁹ Wanghompa Herod zi füima, Ijip to Jowanpa kaxtaimix tuita, Jusep füi wünmang ma apong laxle akax:

²⁰ “Zolax ilaxle naosa honu nyi koplaxle Israel chaxwan to chatün; chemthüikoxle naosa lang ang azongle ngokyabu zidaoa.”

²¹ Ikoxle Jusep zo, naosa hia honu nyi koplaxle Israel chaxwan to chat.

²² Ikoxlechu Arkelio-e hopa Herod man ma Jehudi apün ngokya kax atatlaxle ikhato ngui ang za. Ofüima wünmang chito Jowanpa-e adangle fakoxle Galili haxtok chito pao.

²³ Ikhato hwom Nazareth le nyakkya tingsho ma hom-hax zaile anok. “Chix ang Nazareth nok le nyaküi”, le tüikya Jowanpa kax kotok to ngai.