Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

MATHI 14 - OTSAO BAIBEL (BSI)


Baptikya Juhan Zikya
( Mrk 6.14-29 ; Luk 9.7-9 )

1 Ipongma Galili apün le ngokya wanghompa Herod-e Jisu bama fuale wünkya zing atat.

2 Ilaxle chixe nguakhobu ang thüi: “Ija a baptikya mix Juhan changle; chix ziünkya anaole zokya changle; ija daile chix ma ija ohünotün mwot mok angkya tsakzong tüipu.”

3 Herod-e honao wangchanu Herodia füikya zangwün khoma Juhan a koplaxle khale kun ma shole thomkya;

4 chemthüikoxle Juhan-e chix ang manao wangchanu ma wangchanu ang lax angkya oli münchangle akax.

5 Ikhoma wanghome chix langse tsu, ikoxchu Jehudi khünakbu thua za; chemthüikoxle hwome Juhan a tuita ajepa changpule lax.

6 Ikoxle Herod puxkya din shwomle nuikya nyix, Herodia sasün wangchasa noknu pomtho ma azüile aho; Herod ang mong tüle müi.

7 Ikhoma she-e ajuju tütalichu chixe koxüile wanghompae tsao saxle akax.

8 Ija wangchasae hotatüie anole fakya ningle akax: “Baptikya mix Juhan khang athax ile khua tuita ma ku ang laxhüi.”

9 Wanghompa mongto tüle kak; ikoxlechu ibibi mixwünbu thüntho ma tsaosax le akax daokya khoma, she-e jukya kox angkya wüi lai.

10 Ikhoma chixe kunkha tokya Juhan khang düt ang tom.

11 Ilaxle ija khang khua tuita ma apüilaxle wangchasa ang kox, ija she-e hotatüi hato apüi.

12 Ifüima Juhan wangshembu nguilaxle ija zwoptho paole zu. Hwome ija bama Jisu hato nguilaxle wünle kox.


Jisu-e Hajat Aga Khünaknu Tux
( Mrk 6.30-44 ; Luk 9.10-17 ; Jhn 6.1-14 )

13 Jisu-e ija atatkya zuma, khua ma ngalaxle mix dangkya khato pao; ikoxle khünaknue ija zing atatkya ma, tingkhua tokhange cha ma chix man to.

14 Chix laikya zuma khünaknu othom chongkya tuita ngün. Hwom tokya chingchae chixe kakmixbu amüile kox.

15 Hanasong koxle wangshembu chix hato nguilaxle thüi: “Ikha a chemchu chitüikya faokha changle tamchu zanghanchu wüi homdaoa; tingkhua to paolaxle hwome ma süt mo naxwünlax ang khünaknu fan ang tomkox.”

16 Ikoxle Jisu-e hwom ang thüi: “Hwom pao angkya mwot münchang; hünzome hwom ang süt laxkox.”

17 Hwome chix ang thüi: “Kwom chak ma an khao aga hia nyax jang anyi wüi.”

18 Chixe hwom ang thüi: “Ijabu ku hato apüi hüi.”

19 Chixe khünaknu hingzang ding to thung ang tom; an khao aga hia nyax jang anyi koplaxle chixe münchong fale mohiman. Chixe ibu akhixlaxle wangshembu chak to kox ilaxle hwome khünaknu ang ahanle kox.

20 Hwom pangnue wüi wokfwot müile sax. Ikoxle onüi ata-atuale toxkyabu wangshembue sang ma bün anyi awang le tswon.

21 Sheko hia naosombu chie homtoxle, fongsüt ma womkya khünak huak hajat aga tukux tüikya.


Jisu Ti tok to Ahamkya
( Mrk 6.45-52 ; Jhn 6.15-21 )

22 Chixe khünaknu fan ang tomkya bama chix wangshembu a khua makhange, chix thoma acha le tachi to pao ang tom.

23 Khünaknu othom afan füima, chix a haxhua to chix tata zangjop ang dong. Hanhomkya füima chix ikhato chix tata ngo.

24 Ipongma thochi makhange zangcheie thule wangshembu a khua ma tinu sung to khokhokhe le ngo.

25 Ofüinop zangzunge chix a ti tok to ahamle hwom hato hüi.

26 Chix ti tok to ahamle hüikya ngünlaxle wangshembu abüt laxle thüi: “Ija a bao changüi.” Zalaxle hwom akhong.

27 Ima wüi thuile Jisu-e hwom füi akax: “Taxza, Ku changpu!”

28 Ikoxle Pitar-e lanle thüi: “Jowanpa, nang jangchangba kuchu nang hato titok to ahamle hüi ang tomhüi.”

29 Jisu-e chix ang thüi: “Oman.” Khua angkya thai laxle Pitar Jisu hato hüi ang titok to aham.

30 Ikoxchu chixe zangchei ngünkya zuma zalaxle monghix, ilaxle chix ti mongto düt ang azong. Chixe akhong: “Jowanpa ku azün hüi!”

31 Ijama Jisu-e chix chak thui laxle chix kople thüi: “Nang mongong chitüikya muakya mix; nange büthüikoxle mongaopu?”

32 Okhi khua ma dongkya füi shemle zangchei zakle dang.

33 Ijama ikhama tüikya wangshembue chix shwomle thüi: “Otsingtsingma nang a Zang Hosa changpu.”


Geneseret ma Jisu-e Kakmix Amüi
( Mrk 6.53-56 )

34 Tinu kai laxle hwom a Geneseret chaxwan to ngui.

35 Ikhato khünaknue chix süntsing. Ikhoma hwome ozui onam tingkhuabu tokya kakmixbu apüi ang tomle apao, ilaxle hwom chix hato apüi.

36 Kakmixbu ang chix nyitua to ngaxchu twon ang laxkoxle hwome chix tong shwom ilaxle chix to atwontwon pangwüi müi.

Wancho Naga Bible - OTSAO BAIBEL

Copyright © 2012 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ