MATHI 13 - OTSAO BAIBEL (BSI)

Tuita Tsax Saikya mix bama Kaxpa

¹ Ija nyix wüi Jisu ija hom angkya laile paolaxle tinu kax to thung laxle hwom hama hwon-ano ang süt.

² Ijama khünaknu othom tüle chongkya tuita chix hato afox, ikoxle chix khua tuita ma nga ikoxle afoxle tüikya khünaknu a fa ma atong.

³ Ilaxle chixe kaxpan makhange anwot-ano le thüi: “Hanpak tuita ma tsaxli sai mix tsaxli sai ang ka.

⁴ Chixe saikya ma tsaxtsang züita lomtang fole düt, ibu a osabu nguilaxle tswonle sax.

⁵ Tsaxtsang züita a hax aluile chitüikya longfix khato düt. Hax zule chitüi koxle tsaxtsang ibu lema akhang.

⁶ Ikoxlechu zanghane huakkya zuma, hwom khangtan tamchu otsing mongtang hax chitüi koxle ibu zanle zi.

⁷ Tamchu züizüi a fumkha to düt; ibu tsongle hüi ikoxlechu fume alumle amüt.

⁸ Ikoxle züizüi a hax müikya kha to düt; ibu tüle owan müile tsong laxle züizüie hopong, züizüie puzom pong üntoxle züizüie tsübün pongle tsaxtsang dün.”

⁹ “Na zaikya mixe apalax”, le akaxlaxle Jisu zangwün ashuk.

Kaxpan Mongtex

¹⁰ Chix hato nguilaxle wangshembue thüi: “Nange kwom füi büthüikoxle kaxpan makhange akaxpu?”

¹¹ Jisu-e hwom ang thüi: “Zangkangting huxsa zangwün tsing angkya hünzom ang koxdaoa ikoxlechu khünaknu ang ija chifa.

¹² Chemthüikoxle aluile tüikya mix ang koxüi ikoxle chix ang huanuma tüiüi; ikoxle chemchu chitüikya mix angkya a atüitüisa ngaxchu komle pao angkya changle.

¹³ Ija khoma kue hwom füi kaxpan makhange akaxpu; chemthüikoxle hwome hukoxlechu chingün angkya kuxma tamchu apa koxlechu chitsing angkya kuxma.

¹⁴ Ija khoma Isaia-e ajekya kax ija hwom hanpakma twonüi: ‘Ibu khünaknue, atatkoxlechu chitsingüi; hukoxlechu chingünüi;

¹⁵ hwom ang khangkho samdaokoxle; hwom ang atat angkya na tütdaoa, ngün angkya hwom mik achik ngoüna. Ile chichang thüikoxle, hwome mik füi ngün ang those; ma nae atat ang those; ma kün-monge awan ang kopse; ilaxle hwom ku hato chatse; ikoxle kue hwom amüile fase, le Zange akax.’

¹⁶ “Ikoxle hünzom a mohiman! Chemthüikoxle hünzom mike ngünle ilaxle hünzom nae atatle.

¹⁷ Ikhoma kue hünzom ang thüipu, anyix hünzome chempang ngün ang koppuix ibu a ajebue tamchu otsao khünakbue ngünse le tüle tsukoxchu hwome ngün ang chikop.

Jisu-e Tsax Saikya Kaxpan bama Apua

¹⁸ “Hünzome apalax tamchu tsax saikya bama kaxpan mongtex awanle koplax.

¹⁹ Zangkangting kaxho atat ang a kop ikoxlechu chitsing, ibu a lomfo le dütkya tsaxtsangbu ningle changpu. Ipongkhae wüi haxshix nguilaxle hwom mong khato saile toxkya kaxho pale pao.

²⁰ Züizüie Kaxho atatkya füi tomle ija mongmüimüile pongle kop ikoxlechu mong ma tikshingshing le chikop, ibu a longfix ding to dütkya tsaxtsangbu ningle changpu;

²¹ Chemthüikoxle ija kaxho khoma aduk-athangkya apongkya zuma hwome ija kaxho ochwon ma danle tox.

²² Züizüie kaxho atat ikoxlechu chaxwannu tsün bama ajang tamchu tuina to asingkyae athakle asam; ibu a fum khato dütkya, oziak chidünkya tsaxtsangbu ningle changpu.

²³ Ikoxle owae kaxho atat, ija tsingle lax, ija ningle apuk atsatle changkyabu a, hax müikya khato dütkya tsaxtsang ojapange hopong, puzom pong tamchu tsübün pongle oziak dünpuix, ibu changpu.”

Bao Tsax bama Kaxpan

²⁴ Chatlechu chixe kaxpan tuita akax: “Zang Wangting a mixhuak tuitae ma haxtok ma tsaxli müikya saile toxkya ningle changpu;

²⁵ ikoxle khünak nok wüi jiple ngotan ma; jata chix zan nguilaxle tsax müikya khato bao tsaxli saile tox.

²⁶ Ikoxle nyemle ochak dongkya füi tomle ija baotsaxchu wüi lai.

²⁷ Ikoxle mwot mok mixbue hopunu hato hüilaxle thüi: ‘Opunu, nang haxtok ma nange tsaxli müikya saikya münchang hia? Ikoxle bao tsax ojong tokya lai?’

²⁸ Chixe hwom ang thüi: ‘ija a zan owawae hwonkya changüi.’ Mwot mok mixbue atüi, ‘Jangchangba kwom kalaxle ija bao tsaxtsax komle fifang, nang mong tsucha?’

²⁹ Opunue lan, ‘Ile taxchang, chemthüikoxle bao tsax fi puixle hünzome tsaxmüichu wüi file awütüi.

³⁰ Tsax züt angkya otu mangui-manguile hokhi tomle naxtsong kox. Athax tsax zütkya zuma, pongwang ma bao tsax-tsax zütle athop laxle wün to zok angkya hanpakma jongta khama afox angkya ikoxle tsaxmüimüi a ku pung ma afox angkya kue mokmixbu füi akaxüi.’”

Suili Tsang Kaxpan

³¹ Anaolechu kaxpan tuita chixe hwom füi akax: “Zang Wangting a suili tsang tuita ningle, oja khünak tuitae apüilaxle ma haxtok ma küipuix.

³² Ija suili tsang a pünziak khama ahixkya tuita; ikoxle ija tsong ningle, suilai khama achongkya pün ang achangle. Ile ding tokya osabu nguilaxle ija pün ma ozop zing ang thole.”

Twonkhax Kaxpan

³³ Anaolechu kaxpan tuita chixe hwom füi akax: “Zang Wangting a, sheko tuitae nalao to fu laxle mamyet-mamyetle akhuple thomkya muaküsa twonkhax ningle changpu.”

Jisu-e Kaxpan Twonkya

³⁴ Ibu pangnu apua ang Jisu-e khünaknu füi kaxpanbu makhange akax; kaxpan chilax homtoxle chixe hwom füi chemchu chiakax.

³⁵ Ajepa kax ija kotok to ngai ang chixe ile mok: “Kue hwom füi wünkya zuma, kaxpan füi tix ku tun dapüi; Haxtsak-zangnyem pongma wüi, pyenle thomkya kax kue, hwom hama apuale koxüi.”

Bao Tsax Kaxpan Apua

³⁶ Khünaknu othom danle toxlaxle chix hommong to dongkya zuma chix wangshembu chix hato nguilaxle thüi: “Haxtok mokya khato bangkya bao tsax bama kwom hama hiktikle apua hüi.”

³⁷ Jisu-e lan: “Tsaxli müikya saikya a Khünak Hosa changpu.

³⁸ Haxtok a chaxwannu changpu; tsaxli müikyabu a Zang Wangting ma womkyabu changpu ikoxle bao tsax a chichang-chizangkya susabu changpu.

³⁹ Ilaxle ijabu saile toxkya a bao changpu; tsax atukya a chaxwannu ashukkya changpu; ilaxle tsax züt mixbu a kaxtaimixbu changpu.

⁴⁰ Bao tsax afoxlaxle wünkha to zokle ashunkya ningle chaxwannu oshuk ma chang angkya changle.

⁴¹ Khünak Hosae chix kaxtaimixbu tsanle apaoüi; chix Wangting bama chikho asua ang koxkyabu hia mix ang ochax lyen ang tomkyabu pangwüi afoxüi;

⁴² ilaxle hwome za adünkya ibu okham-wün khato awütüi.

⁴³ Ijama otsaobue ma Hopa Wangting to zanghan ningle nyanüi. Na zaikya mixe atatle koplax!

Khomle Thomkya Ngun Kaxpan

⁴⁴ “Zang Wangting a haxmong to khomle thomkya ngun ningle changpu; khünak owae ija ataküi hex, chixe tamchatle pyenüi; ifüima mongmüi atungle paolaxle chix ma atüitüi komle hang laxle ija haxtok shaküi.

Liknu Kaxpan

⁴⁵ “Anaolechu Zang Wangting a ija ningle changpu: Mixhuak tuitae liknu müikya lom;

⁴⁶ otue chixe ataxle müikya liknu ataküi hex, chix ma atüitüi komle hang laxle ija liknu shak.

Sha Kaxpan

⁴⁷ “Anaolechu Zang wangting a nyax kop mixe tinu khato dao laxle nyax pangnu oli dünkya sha ningle changpu.

⁴⁸ Ija sha awangkya ma hwome fato waile alai, ilaxle amüimüi hwome tsong ma sho, chimüimüi a wütle tox.

⁴⁹ Chaxwannu oshuk ile changüi: Kaxtaimixbu nguiüi, ilaxle tsaokya khünakbu kha tokya chitsaokya khünakbu süiüi;

⁵⁰ ilaxle chitsaokyabu hwome wünkha to zokle ashunüi. Ikhato hwom sopkya hia wa azyakkya tüiüi.”

Kaxtsing Hozün hia Hozang

⁵¹ Jisu-e hwom ma atüi: “Ibu hünzome awan chami?” Hwome lan: “Awanle.”

⁵² Idaile chixe hwom ang thüi: “Idaile wanlom nwotmixbu opang Zang Wangting füizuimix ang achangün laxpuix, hwom a ma pung angkya bwotba hozün hozang pangnu alaikya hopunu tuita ningle changpu.”

Nazareth Noke Jisu Pongle Chikop

⁵³ Ibu kaxpan ashuk füima, chix ikha angkya atsaile pao;

⁵⁴ ilaxle chix manok to nguilaxle sinagok to hwom hama hwon-ano le chang. Chix kax ibu atatlaxle hwom ang khangkho sam ilaxle hwome thüi: “Ija khünak ang iningkya hwon-je tamchu ajepabu mwot mok angkya tsakzong owae koxlaxpuix?

⁵⁵ Chix a zingpa sasün münchang kox hia? Chix honu ang Meri le amünkya münchang kox hia? Jakop, Simon, Jusep hia Juda hwom a chix honao hwom münchang kox hia?

⁵⁶ Tamchu chix honao shekobu kem khama müntüi kox hia? Jangchangba chixe ibu tsakzong ojong tokya kop?”

⁵⁷ Ikhoma hwome chix to chiong. Ikoxlechu Jisu-e thüi: “Mating mahax hia ma homkha boma mama khato ajepa chiajaokya kha müntüi.”

⁵⁸ Hwome chix to chiongkya khoma ikhama chixe ohünotün mwot chemchu chimok.