MATHI 12 - OTSAO BAIBEL (BSI)

Sabath Nyix hanpakma Atüikya

¹ Ifüima aluile chihomle, nyixta Jisu zim kaile lele ngokya. Chix wangshembu ang wok tüle ano, ikhoma hwome tsaxto jutlaxle anuile sax ang süt.

² Farisibue ija ngünlaxle Jisu füi akax: “Hulax, ija mwot nazak nyix chimokse nang wangshembue mokle; ija a kwom wanlom füi apüile mokkya changpu.”

³ Jisu-e hwom ang thüi: “Dawid hia chix füikya khünakbu ang wok ano pongma chixe chemle mokpuix ija hünzome ele ano hexchami?

⁴ Chix tamchu chix füi tüikya khünakbue Jowanpa hom to donglaxle Jowanpa ang tö koxkya an sax. Wanlom ma ija a nguapa boma owaechu saxtsuak angkya chichang.

⁵ Tomtale wünhax jangthüi: nazak nyixfole zangshwom-hom ma nuikya nguapabue nazak nyix lyen ikoxlechu hwom thaikya ang chilax. Ija bama hünzome wanlom ma ele maano hex nyi?

⁶ Kue hünzom ang thüipu, zangshwom-hom füi ngaxchu süchongkya ikhama tüile.

⁷ Otsao Lai-e thüile: ‘Kue laxse tsukya a tö koxkya münchang ikoxle chingcha laxse tsule!’ Hünzome ija chem ang thüipuix le awanpuix thüikoxba, chithaikya khünakbu tha hünzome münajao ngose;

⁸ chemthüikoxle Khünak Hosa a nazak nyix thakmachu Jowanpa changpu.”

Chak Faile Kakkya mix tuita

⁹ Ikha dantoxlaxle Jisu sinagok to ngui.

¹⁰ Hulax, chak faikya mix tuita ikhama tüikya. Jisu thaikya opong atak ang to-zi le ngokyabu züizüi ikhama tüikya. Hwome chix ma atüi: “Nazak nyix kak amüi ang chitho thoüi?”

¹¹ Jisu-e hwom ang thüi: “Hünzom mixhuak tuita ma chun tuita tüi, ikoxle ija chun nazak nyix kha tswom to düt koxle chixe chemle hwonüi? Chixe ija künle koplaxle münalaiüi hia?

¹² Chun tuita füi khünak tuita wüi achongkya changle. Idaile nazak nyix changkoxlechu owawa to fong angkya wanlome abaxkya müntüi.”

¹³ Ifüima chixe ija chak faile kakkya mixsün füi akax: “Nang chak thuikox.” Ijama chixe thui ikoxle tüchi chak ningle ichi chakchu wüi otyatyale müi.

¹⁴ Ifüima farisibu laile paolaxle chix lang angkya kat-azua laxle mwottho zing.

Zange kamkya Da

¹⁵ Otue Jisu-e chix zan to kale kat azuakya awanle lax, chix ikha angkya laile pao; ilaxle khünaknu othom chongkya chix füito azuile hüi ilaxle chixe kakmixbu komle amüi.

¹⁶ Üntoxle chix bama owa hamachu chiwün angkya hwom füi akax.

¹⁷ Isaia ajepa makhange hüile ngokya Jowanpa kax ija kotok to ngai angkya hanpakma chixe ile mok:

¹⁸ “Kue kamle kopkya ku da ikhama tüile; owa to kue mongkün puix tamchu ku mongzom müipuix. Kue ku chasa chix ma ajoüi, ilaxle chixe ku kaxpfün chaxwannu hato apuküi;

¹⁹ Chix kax ma chialan, chiakhong, chichangba tingjang lomnu to, kaxza zongle chiakax;

²⁰ shonai mix füi jonai le tüi; fongmix chitüikyabu zongto, chix a chingchale tüile. Sukyae lütle machang tanto, chix azongle ngoüi;

²¹ ilaxle khünaknu noke wüi, chix ma hwom mongong thomüi.”

Jisu Hia Belzebul nyi

²² Ija ma haxshix chasae kople thomkya, mik aduak tamchu kaxchu wüi uxle tüikya mixsün tuita hwome chix hato apüi. Jisu-e chix amüi. Ija kaxuxe akax ang tho; ilaxle ngün ang kop.

²³ Jisu-e mokkya ija mwot ngünlaxle pangnusae wüi abütle thüi: “Chix a Dawid sasün changcha mi?”

²⁴ Ikoxlechu ija atatlaxle farisibue thüi: “Bao wanghom Belzebul e fakya tsakzong füi chixe haxshix chasabu jwon ang thole.”

²⁵ Jisu-e hwom mongto texle ngokya awanlaxle hwom ang thüi: “Chaxwan oja tata füi atsi ala laxle mathomthom le ngopuix, ija otsün lo angkya münchang. Tamchu oja tingsho chichangba kako ma tata füi ahe laxle othom-othom ma ahanle ngopuix, ija janle shu angkya changle.

²⁶ Idaile baoechu ma ningkya hozui bao jangjwon thüiba, hwomchu wüi tata füi afanüi. Jangchangba chix wangting chemle ngothoüi?

²⁷ Üntoxle kue Belzebul tsakzong füi haxshix jwonkya jangchang thüiba hünzom füito azuikyabue owa tsakzong füi jwonpu? Hünzom füito azuikyabue hünzom thaikya chem ma aho?

²⁸ Ikoxle ku ang haxshix chasa jwon angkya tsakzong koxkya a Belzebul münchang ikoxle Zang Chasa changle. Athaxpi ija makhange Zang Wangting a hünzom hato nguile tüile le ahole.

²⁹ “Mixtsak naomüi pongwang ma khale chikop thüikoxle chix hom to nguilaxle chix tuina chemle papao thoüi? Chix khale kop koxtix ija pao ang thoüi.

³⁰ “Ku füito chitüikya mix a ku zongto zan changle; ija ningle afox ang ku to chiasunkya mixe ija chiakle.

³¹ Ijadaile kue hünzom ang thüipu, khünak ang hwom ochax hia kaxma pangnu thailakkya tüiüi; ikoxlechu owae Otsao Chasa ang kaxma thüilaxüi hex, chix ang thailak müntüi.

³² Üntoxle owae Khünak Hosa ajaole akaxüi hex, ija chix ang thailak faüi, ikoxle owae Otsao Chasa ajaoüi hex, ija chaxwannu machu tamchu hüiüi tüikya chaxwan tochu chix ang thailak müntüi.

Pün üntoxle ija Oziak

³³ “Müikya pünziak kop angkya hanpakma hünzom ma owan müikya pün tüi angkya changpu; opün wan chimüikya pün ma hünzome oziakchu chimüikya kopüi. Pün a oziak makhange tix awan ang kople.

³⁴ Hünzom pubu; ma chimüi khato müikya chemle akax thoüi changkoxkya. Chemthüikoxle mong chem füi awang laxle tüipuix, tun ma ibibi tix ngaipu.

³⁵ Khünak müikya mixe ma mong ma müikya athün thomkya tokhange müikya oli alaile; chimüikya mixe ma mong ma chimüikya athün thomkya tokhange chimüikya oli alaile.

³⁶ “Kue hünzom ang thüipu, khünake chilaxli kax chempang akaxdao laxpuix; kaxfünkya nyix hwome ibu zangwün bama kaxlan fa angkya changle.

³⁷ Chemthüikoxle nang kax füi nang khoseüi tamchu nang kax füi nang thajao angkya changle.”

Ohünotün Mwot Jukya

³⁸ Züizüi wanlom nwotmixbu hia farisibue ijama chix ang thüi: “Nwotmix, kwome nange mokkya ohünotün mwot ngünse tsule.”

³⁹ Ikoxle chixe lanle thüi: “Chisu chitangkya hia Zang chitsingkya tsün thome ohünotün mwot lomle; hünzom ang a Juna ohünotün mwot boma mama münwan chemchu münfa.

⁴⁰ Juna nyix azom wün azom chongkya nyax tuita wokkha to chemle ngodaopuix ija lailaile Khünak Hosachu nyix azom wün azom haxmong to ngo angkya changle.

⁴¹ Kaxfünkya nyix Ninewi noke hünzom ma kaxfele ija tsünthom ajaoüi; chemthüikoxle Juna-e hwon-ano koxle hwom ang mong alüix; ikoxle hulax, Juna füi süchongkya tuita ikhama tüile.

⁴² Handünchi tokya wangchanu Sheba-e ija tsünthom füi kaxfün nui to ajongüi ilaxle ija tsünthom ajaoüi; chemthüikoxle chaxwannu oshuk tokya she a Solomon hwon-je to apa ang nguipu ikoxle hulax, Solomon füi süchongkya tuita ikhama tüile.

Haxshix Chasa Chatkya

⁴³ “Otue khünak tuita angkya haxshix chasa laile paoüi hex, chix a nazak angkya nui lomle faonu lingmong faole ahamüi; ikoxle ngwotnui chiatakkya zuma,

⁴⁴ chix ojongkha tokya laile paokya hex, ija chix hom to chatle ngui angkya mongzang wünüi. Chix nguikya thoma ijongkha atsao laxle ahuale ngokya ngün;

⁴⁵ ijama chix tamchatle pao, ma füi süshixkya mama chasa anüt laxlaxle nguilaxle ikhama dongle ngo; ifüima ija khünak a amipongkya füi ngaxchu sümakya ang achang. Chisu chitangkya ija tsünthom hanpakma ile wüi changüi.”

Jisu Honu hia Honao hwom

⁴⁶ Ile chix khünaknu othom füi akaxle ngoponge honu hia honao hwom nguilaxle chix lomle homtho to ajongle ngo.

⁴⁷ Iponge ikha angkya mixsün tuitae chix ang thüi: “Hulax, hünnu hia hünnao hwom nang füi zangwünsele homtho to ajongle tüile.”

⁴⁸ Jisu-e chix kax to lanle thüi: “Ku anu a owa? Ku nao hwomchu wüi opang?”

⁴⁹ Chixe chix wangshembu chito chak thui laxle akax: “Hulax, ijabu tix ku zongto anu tamchu kunao hwom changpu.

⁵⁰ Chemthüikoxle owae zangkangting tokya Apa kax ma laxle tüiüi hex, ibu tix ku zongto anu tamchu kunao hwom changpu.”