MATHI 11 - OTSAO BAIBEL (BSI)Baptikya Juhan tokhange Kaxho Mixbu ( Luk 7.18-35 ) 1 Ile Jisu-e chix wangshem bün anyi füi zünle akaxkya tsuak füima, hwom tingnu to hwom-ano le kaxho apuk ang pao. 2 Otue Bapti fakya Juhan-e, chix kun kha to ngopongma, Jisu-e mokkyabu bama kaxzing atat ang koppuix, chixe ma wangshembu züizüi ile atüi ang tsanle apao: 3 “Juhan-e hüiüi hexo le thüikya nang hia, hia kwome mama mix tamtan angkya? Kwom hama apua hüi.” 4 Jisu-e hwom kax to lanle thüi: “Hünzom chatlax! Hünzome chempang atat tamchu ngün ang kop, kaxho ibu Juhan ang laxkox: 5 Mikduakbue ngün ang kople; cha faikyabu aham ang tsuakle; angwonkyabu kak müile; naba mixe atat ang kople; zidaokyabu anaole zole; ilaxle mixshix-zasabu hato Kaxho Müikya apuk ang tomle. 6 Ku to mongao chitüikyabu ang mong otukux müiüi hex!” 7 Hwom chat füima Jisu-e khünaknu hama Juhan bama ile apua ang süt: “Hünzom Juhan hato faokha to pao pongma chem ngünüi le thüt? Zangwin to aloxle ngokya fumsa suisa ngünüi le thütpia? 8 Hünzome chem tomta to hu ang paopu? Chemkülailai le nyi laxlaxle ngokya mixsün to hu ang paopia? 9 Chichangba alixachong zapua laxlaxle ngokya mix to hu ang paopia? Chem tomta to hu ang paopuix ku hama wünhuki! Ajepa to hu ang paopia? Changle, kue hünzom füi akaxfang: Aje füi ngaxchu süthak hünzome ngün ang kopdaoa. 10 “Hulax, kue kaxho mix tuita, nang thoma achale, hüi ang tsanüi le Otsao Lai kax ma akax ngokya mix a chix changle. 11 Otsingtsingma kue hünzom ang thüipu, sheko makhange puxkya khakha ma bapti fakya mix Juhan thakkaikya mix malai; ikoxlechu zangkangting to ahixkya ngaxchu chix füi süchongle tüile. 12 Bapti fakya Juhan-e, chix kaxho apukkya tokhange owang wanglaxle anyix kopkya bama Zang Wangtinge huanuma fuxtsüi angkya laile ilaxle müishix-mixmabue ija kople thom ang azongle. 13 Juhan din kople ajebu pangnusae wüi ilaxle wanlomechu wüi ija Wangting bama zangwünle hüile. 14 Üntoxle hünzome jangong thüiningle, nguiüi hexo le akax thomkya Elija a Juhan changle. 15 Hünzom ma na jangzaiba apahüi! 16 “Athax, anyix ngainyixkya khünaknu kue chem füi apyenüi? Hwom a hat to thungle ngokya naosombu ningle. Thom tuitae mama thom füi azaxle akax: 17 “Kwome hünzom ang aju-asom pongma, mütkya thuaput waxmai mütle fa; ikoxlechu hünzom chiazüi! Kwome mangzuk tsai ngao; ikoxlechu hünzom a chisop! 18 Otue Juhan nguipuix, chixe ju-sax lingle chichang tamchu atsao alangle zangjopkya hanpak lax; ikoxle pangnue wüi chix ma bao tüile le akax. 19 Khünak Hosa ngui ilaxle chixe sax-lingle chang, ikoxle noke thüi: ‘chix a sütbakmix; jutok saxngale ngokyabu hia süisai mixbu zuikhui changle!’ Zang je a mwot makhange tix awan ang koppu.” Chiongkya Tingnu ( Luk 10.13-15 ) 20 Jisu Khrista-e ohünotün mwot huanuma mokkya tingnu tokya khünakbu mong chialüix koxle, chixe hwom to sa ang süt: 21 “Maxsax Korazin! Maxsax Bethsaida! Hünzom ma mokkya ohünotün mwotbu Tair hia Sidon ma mokpuix thüikoxba, nyitsyen zahom awunlaxle labu khato wotle, amiba wüi mong chatkya ahodaose. 22 Kue hünzom füi otsingtsing akaxpu; kaxfünkya nyix Zange chix chingcha, hünzom füi Tair hia Sidon nyi hato wüi süchongle ahoüi! 23 Üntoxle nang Kaparnaum! Nang a zangkangting to nwonle thombae le texpuix nyi? Nang a haolum to tswonle awüt daoüi; chemthüikoxle nang hama mokkya ohünotün mwot Sodom nok ma mokpuix thüikoxba, ija anyix kople tüise. 24 Kue nang füi otsingtsing akaxpu, Kaxfün nyix Zange, nang füi Sodom nok hato wüi chingcha süchongle ahoüi!” Ku hato Hüilaxle Nazaklax ( Luk 10.21-22 ) 25 Iponge Jisu-e akax: “O Apa! Nang a zangkangting hia chaxwannu Jowanpa, kue nang ang münchong fapu! Chemthüikoxle nange hwontüi jelangkyabu tamchu man-ngünkyabu hato chiaho le pyenle thomkya ija naosombu thüntho ma nange kotok to ngai ang tomdaoa! 26 Changpu, Apa! Chemthüikoxle ile chang angkya a nang mongtex! 27 “Apae ku ang pangnu li wüi fadaoa. Hopa boma Hosa owaechu müntsing tamchu Hosa hia chixe angaile ahose le mongtsukyabu boma Hopa owaechu müntsing. 28 “Hünzom hünlix hünkya hia najuale maxkyabu pangnu, ku hato oman, kue hünzom ang nazak faüi. 29 Hünzome ku dang ma pailax, ilaxle ku angkya awanle koplax; chemthüikoxle ku a somdangkya mix tamchu chasa ma jonaikya mix changpu; ilaxle hünzome nazak atak ang thoüi. 30 Chemthüikoxle kue hünzom ang fakya dang a chwonpai tamchu ku hün a chazangkya changle.” |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India