MATHI 10 - OTSAO BAIBEL (BSI)Wangshem Bün Anyi ( Mrk 3.13-19 ; Luk 1.12-16 ) 1 Ijama chixe chix wangshem bün anyi chix hato nyak; haxshix chasa jwon angkya; kaklak pangwüi amüi angkya; ibu tsakzong hwom ang kox. 2 Ibu bün anyi mün a ile changpu: Owang angkya Simon, owa ang Pitar lechu wüi nyak; chix honao Andriw; Zebedi sasün Jakop hia honao Juhan nyi; 3 Filip hia Bartholomew nyi; Thoma hia chaxwan süisai mix Mathi nyi; Alfas sasün Jakop hia Thadia nyi; 4 Kanan nok Simon tamchu zan chak to Jisu hangkya mix Juda Iskariot; ibibile changle. Bün Anyi ang Koxkya Mwot ( Mrk 6.7-13 ; Luk 9.1-6 ) 5 Jisu-e ibu kax adangle koxlaxle hwom mixhuak bün anyi tsanle apao: “Mixnok haxtok hia Samaria tingkhuabu to taxnop. 6 Ikoxle Israel kako samle ngokya chunbu hato paokox. 7 Hünzome paolaxle Zang Wangting soxle hüiüna le apukkox. 8 Kakmixbu amüikox; faikyabu amüikox; zidaokyabu azünkox; haxshix chasabu jwonle apaokox; hünzome amuale koppu, amuamua le laxkox. 9 Hünzom nyitsong thong to hun, syen chichangba ngun taxkop; 10 Hünzome lomba hanpak ang saxtsom nyitsong chichangba nyipong anyi, chichangba chisox, chichangba kaithox, ibu chemchu onüi taxkop; chemthüikoxle mwot mokkya mix ang ibu a kox angkya changle. 11 “Otue hünzom tingkhua hia tinglong tuita to nguiüi hex, ikhama hünzom pongle kopse tsukya khünak lomkox; ilaxle ikha angkya mapao-mapaole ikhama ngokox. 12 Ikoxle kako to nguikya zuma, ‘Hünzom ma mongsom tüikox’ le thüilax. 13 Ija homkha angkya khünakbue hünzom pongle jangkop thüiningle, hünzome hwom ang fakya salam hwom ma wüi naxngo kox; ikoxle hwome hünzom pongle chikop thüikoxle, ija salam hünzome wüi chatle laxdao. 14 Üntoxle owa kakoe chichangba tingshoe hünzom pongle chikop tamchu hünzom kax to na chitha le tüiüi hex, ikha dantoxdao ilaxle hünzom cha angkya labu ngaxchu hongle toxkox. 15 Otsingtsingma kue hünzom ang thüipu, Zange kaxfün nyix ija tingkhua angkya khünaknu füi Sodom hia Gomorah nok hato wüi chingcha chongle ahoüi. Hüi angkya Sikngün Zothupbu ( Mrk 13.9-13 ; Luk 21.12-17 ) 16 “Apalax, shwon tham khato chun hosabu ningle kue hünzom tsanle apaopu. Pu ningle atsinglax, osu ningle nonai le tüilax. 17 Khünzailax, chemthüikoxle koplaxle kaxfün ang hünzom khwa to apüi angkya tamchu hwom zangshwom hombu to hünzom to fit-müi angkya khünakbu tüi angkya changle. 18 Ku khokhoma hexle, nguakhobu hia apün-awangkyabu tamchu mixnokbu hato koplaxle, ku bama Kaxho Müikya apuk ang hünzom pao angkya changle. 19 Kax atwon ang hünzom apüikya zuma chem akaxüi le kho taxsam; kaxtsing akax ang ija ma wüi hünzom ang koxüi. 20 Chemthüikoxle ija kax akaxkya mix a hünzom münchang; ikoxle hünzom Hopa Chasae hünzom mong ma zangwünle fakya changüi. 21 “Hotüie honao, hopae sasün lang angkya hanpakma owüiole koxüi; tamchu sasün hwome honu hia hopa hwom füi alünle ajong laxle hwom lang ang owüiole kox angkya changle. 22 Ile ku mün khoma hexle khünaknu pangnue hünzom thua anuüi; ikoxchu oshuk kople adukya mixe khosünkya ataküi. 23 Otue hwome hünzom to tingkhua tuita ma zothupüi hex, mama ting to paokox. Kue hünzom füi otsingtsing akaxpu, hünzome Israel haxtok akhople matsuakba wüi Khünak Hosa nguiüi. 24 “Lainao owachu Nwotmix füi achongkya münchang; hopunu füi da wüi achongkya münchang. 25 Lai nao tuita nwotmix ningle tamchu da tuita hopunu ningle achang angkya mongtex sha angkya oli changle. Homkha ma akhokya ang Belzebul le jangnyakba, homkha angkya khünakbu ang tamtaikya mün oma fa angkya changle. Owa thua Za angkya hex ( Luk 12.2-7 ) 26 “Idaile hünzom a khünak thua taxza; chemthüikoxle kotok to chingaikya lima chemchu alumle münthomüi, chitsingkya lima mwot chemchu huxsa ma pyenle münthomüi. 27 Kue zangnak khato hünzom hama wünkya pangnu hünzome tamchatle zangngai ma wün angkya changle. Na ma thap laxle chem wündaopuix ija a homkho tokhange tinglyet angkya changle. 28 Tsangtsa amüt ang tho koxchu chasa lang ang chitsuak angkyabu thua taxza; itülüi, Zang owae tsangtsa hia chasa pangnyi haolum to amüt ang thopuix, chix thua zalax. 29 Nange otsak osa anyi ngunkhao anyi füi shak ang thole, ikoxlechu hünzom Hopae chitsing toxle tuitachu hax to chidütüi. 30 Hünzom khang angkya khopa ngaxchu komkaile e thompu. 31 Idaile taxza, chemthüikoxle otsak osa ozyem füi ngaxchu hünzom wüi thanu changpu. Jisu Pongle Kopkya hia Chikopkya ( Luk 12.8-9 ) 32 “Owawae noknu thüntho ma chix ku kux hex le jangngai thüiba, zangkangting to ngokya Apa pomtho ma kuechu chix pongle kop angkya changle. 33 Ikoxle khünak thüntho ma owawae ku pongle chikop thüikoxle kuechu zangkangting to ngokya Apa thüntho ma chix pongle münkop. Tumüi münchang, Changlo ( Luk 12.51-53 ; 14.26-27 ) 34 “Ku chaxwannu hato tumüi apüi ang nguipu le taxthüi. Tumüi fa ang chichangle chang fa ang nguipu. 35 “Hosae hopa füi, nomchae honyenu füi, sangmütpae hohopa füi le, alün aloxle naxchang ang, ku nguikya changpu. 36 Khünak zongto zan amakya, ma kako homkha changüi. 37 “Owae manu hia mapa to ku khüthak le mongkünüi hex, chix a ku wangshem ang achang koxle münasu; üntoxlechu owae masu masa to ku khüthak le mongkünüi hex, chix ku wangshem ang changkoxle münasu. 38 Ma pünsak koplaxle ku füito chihüikya mix ku wangshem ang changkoxle münasu. 39 Owae ma tsün sünle kop ang azongüi hex, chixe ija amütüi; ikoxle owae ku hanpakma ma tsün koxlaxüi hex, chixe itolyem le ataküi. Hinghobu ( Mrk 9.41 ) 40 “Owae hünzom pongle koppuix, chixe ku pongle koppu; üntoxle owae ku pongle koppuix, chixe ku tsanle ajokya mix pongle koppu. 41 Owae Zang kaxho mix Zang kaxho mix ningle pongle koppuix, hwom ang Zang kaxho mixe kopkya hingho ma süntom tüiüi. Tamchu otsao khünak tuita owae otsao khünak ningle pongle koppuix, chix angchu ija otsao khünak hingho ma süntom tüiüi. 42 Üntoxle owae ijabu hixkya khama tuita ang ngax thüichu wangshem mün ma tihing peta alingkya mix jangtüi, otsingtsing ma kue hünzom ang thüipu, chixe otuechu ma hingho münamütüi.” |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India