MARK 4 - OTSAO BAIBEL (BSI)

Tsax Saikya Kaxpan

¹ Chatlechu Jisu-e Galili Shinthuk-titung kax ma hwon-ano ang süt. Afoxkya khünaknu chix akhople huanuma tüikya, ikhoma chix khua ding ma nga ilaxle thung. Khua a ti khato wüi changkya ikoxle khünaknu a fako ma tüikya.

² Hwom hama jojüikyabu apua ano ang chixe kaxpanbu twonle chixe hwom ang thüi:

³ “Apalax! Hanpak tuita ma tsax sai mix tsaxli sai ang ka.

⁴ Chixe zimfa ma chiakle saikya zuma tsaxtsang züizüi lomtang to düt; osabu hüilaxle ijabu tswonle sax.

⁵ Züizüi hax muale tüikya longtok to düt. Hax zule chitüi koxle ibu tsaxtsang lebama akhang.

⁶ Ofüima zanghankya zuma ija khang tankya tsax nyemsabu to tüle huak, üntoxle zule otsing jukya chitüi koxle ochwon ma zilaxle ijabu zanle max.

⁷ Ilaxle züizüi a hux füikya fumkha to düt, fum ibu lwon le hüikoxle tsax to alumle changkya khoma ibue oziak chidün.

⁸ Ikoxle züizüi a haxwan müikya khato düt; ijabu nyemle tsong ilaxle züizüi ma tsübün pong, puzom pong üntoxlechu hopong le jao oziak tüle dün.”

⁹ Ilaxle Jisu-e ashuk: “Atat ang na zaikya mixe atatlax!”

Ija Kaxpan Mongtex

¹⁰ Jisu chix tata tüiponge, wangshembu füi tomle ija chix kax atatkyabue ija kaxpan akhixle wünle fa angkya chix füi akax.

¹¹ Chixe hwom ang thüi: “Zang Wangting huxsa zangwün bama awan angkya hünzom ang koxdaoa; ikoxlechu kotok tokyabu hanpakma ijabu pangnu kaxpan makhange tix tsuakpu,

¹² ikhoma; “Hwome tüle hukoxchu chitsingüi; tüle apakoxchu chiawan tsuaküi; Ile chichang thüikoxle, hwom mong Zang hato chatse; chixe hwom ang thailak koxkya tüise.”

Jisu-e Tsaxli saikya Kaxpan bama akhixle Wünle kox

¹³ Ilaxle chixe hwom ma atüi: “Hünzome ija kaxpan maawan tomta hia? Ile changkoxle mamabu kaxpan a chemle awanle thoüi?

¹⁴ Tsax saikya mixe Zang kax saipu.

¹⁵ Khünak züizüia lomtang kax to dütkya tsaxtsangbu ningle changpu; otue hwome atatpuix ifüi tomle haxshix hüilaxle hwom mongkha to saile thomdaokya kax tswonle pao.

¹⁶ Khünak mamabu longtok to saikya tsaxtsangbu ningle changpu; kaxho atatkya füi shemle hwome mongmüi atungle pongle kop.

¹⁷ Ikoxle hwom ma otsing zule ju angkya onui tam chitüi, ikhoma azang koxlechu otsün chilo; ija kax khoma sikngün hia zothup apongkya zuma hwome ochwon ma ija danle tox.

¹⁸ Mama khünakbu a hux füikya fum khato saikya tsaxtsangbu ningle; hwome onox ma kaxho pongle kop.

¹⁹ Ikoxle chaxwannu bama abankya tamchu ngun syen tokya nüfux hia mamabu to asingkya, ibu chix ma nopkyae pongle kopthom daokya kaxho to alum, ile ijae oziak dün ang chitom.

²⁰ Ikoxle khünak mamabu a hax müikya khato saikya tsaxtsangbu ningle; hwome Zang kaxho atat, ija pongle kop, ilaxle oziak dün; züitae tsübün pong, züizüie puzom pong üntoxle züizüie hopong.”

Khonge Akhuple thomkya Wüntik Tuita

²¹ Jisu-e chizakle hwom ang thüi: “Wünzua khonge akhuple chichangba lyafang to thom ang apüi zaicha? Ija dan angkya onui ma mündan puixnyi?

²² Ijadaile pyenle thomkya oli pangwüi kotok to alaiüi chichangba tütalichu khomle thomkya chitüi le kotok to angai angkya oli changle.

²³ Atat angkya na zaile tüikya mixe atat ang laxkox!”

²⁴ Anaolechu chixe hwom ang thüi: “Hünzome chem atatpuix ija to mong koxlax! Hünzome mix bama kaxfün fa ang oja wanlom twonlaxpuix, ija wanlom Zange hünzom kaxfün fa ang twonüi; owae tsing ifüi sütsexle ngaxchu changtüilax.

²⁵ Khünak owa ma hidaole tüipuix, chix ang aluile faüi, ikoxle owama chemchu chitüiüi hex, atüitüisa ngaxchu chix angkya bakle paoüi.”

Tsaxli Tsongkya bama Kaxpan

²⁶ Jisu-e chizakle akaxle thüi: “Zang Wangting a ija ningle changüi: Khünak tuitae chix haxtok ma tsaxli saile tox.

²⁷ Chix awün ningle jip ilaxle anyix ningle tix chix zo, ija bama wüi tsaxtsangbu akhang ilaxle tsongle hüi. Ikoxlechu chixe ibu chemle tsongle hüipuix chiawan.

²⁸ Haxwane chix lualua to pün tsong ang kox ilaxlechu ziak ang tomle; pongwang ma ochak lai, ifüima tsaxto, ifüima tsaxto ma tsaxtsange awangle laiüi.

²⁹ Otue oziak münüihex, khünake changkuix füi züt ang sütüi, chemthüikoxle tsax atu ang otu nguile hüile.”

Suili-tsang bama Kaxpan

³⁰ Üntoxle Jisu-e hwom ma atüi: “Keme Zang Wangting chem ningle tüile le thüiüi? Ija akhixle wün angkya hanpakma chem kaxpan twonüi?

³¹ Ija a ile changle, khünak tuitae chaxwan ma ahixkya pünziak tuita suili tsang kop ilaxle chixe ija haxtok ma küi.

³² Sühom füima ija tsong ilaxle suilai pün khakha ma süchongkya pün tuita ang achang. Ija püne, okhung to osabue ozop zing ang müile okangsabu alai.”

³³ Ija ningkya kaxpan mamabu huanuma twonlaxle Jisu-e khünaknu hama hwon-ano. Hwome otukux awan ang thopuix ibukuxle chixe hwom hama apua.

³⁴ Kaxpan chilax homtoxle chixe hwom füi chiakax; ikoxle wangshembu füi chix tata süile changpongma chixe hwom hama pangnusa akhixle wün.

Jisu-e Zangchei Adang

³⁵ Ija nyixnyix wüi hansonge, Jisu-e wangshembu ang thüi: “Kem tinu ta le tachi to lehax.”

³⁶ Ikhoma hwome khünaknu othom dantoxlaxle Jisu ami wüi thungle ngoünkya khua ma wangshembu chuwüi ngale tomle achex. Ikhama khua mamabuchu wüi tüihukya.

³⁷ Allele tüle zongkya zangcheie thu ilaxle tichapbu khua ding to dongle tie awang ang azong.

³⁸ Jisu a khua omüichi to tüikya. Chix a khangte ma ngom ate laxle jiple ngokya. Wangshembue chix azwotle thüi: “Nwotmix, nange kem ziüi münngün hia?”

³⁹ Jisu ajong laxle zangwin ang thüi: “Dangün”. Chixe tichapbu angchu wüi thüi: “Taxamok”. Zangchei thwonthütle dang ifüima zingzazui le dang.

⁴⁰ Ifüima Jisu-e wangshembu ang thüi: “Hünzom itukux büthüikoxle zapu? Hünzom ang mongong ojao chitüi le büthüipu?”

⁴¹ Hwom huanuma wüi za ilaxle tata füi akax: “Chix chem ningkya mix hex? Zangwine ngaxchu chix kax ma laxle!”