MARK 16 - OTSAO BAIBEL (BSI)

Azangle Zokya

¹ Sabath füi nyix, Meri Magdalen ilaxle Jakop honu Meri hia Salomi hwome Jisu to pa angkya hanpakma ongan müikya münga shak.

² Hatdang owang nyix swomsae zangzung füi tomle hwom zuk to ju.

³ “Zuk ka hakkya longnu kem ang owae daple kox angkya”, le hwome lomba to zangwün (Chemthüikoxle longnu a chongdaokya wüi changkya).

⁴ Ikoxle hwome hule anokoxle, longnu laoxle awüt thomdaokya ngün.

⁵ Hwom zuk-kha to dong ikoxle hwome naosün tuita, nyi tsekya awunlaxle thungle ngokya ngün; ilaxle hwom abüt.

⁶ Ija mixsüne hwom ang thüi: “Taxza, hünzome pünsak ma takle langkya, Nazareth nok Jisu lompu le kue awanle. Chix chatle azangle zodaoa; chix ikhama müntüi; hünzome chix danle toxkya nui to hulax!

⁷ Hünzome paolaxle chix wangshembu tamchu Pitar hwom hama apuakox. Chix hünzom thoto achale Galili to paoüi; chixe hünzom füi akaxle toxkya ningle, ikhato hünzome chix ngünüi.”

⁸ Zukting angkya hwom lailaxle zikle pao. Chemthüikoxle abütkya tamchu zakyae hwom aban; ija khoma hwome owa hamachu chemlechu chiwün.

HOZANG KAXHO MÜIKYA ASHUKKYA Meri Magdalen hato Jisu Ngai

⁹ Chix anaole azangle paokya füima, hatdang owang nop swomsae, pongwang ma, Meri Magdalen, owa angkya haxshix chasa anüt jwonle alaipuix, she hato Jisu laile aho.

¹⁰ She chatlaxle Jisu füi ngohomkyabu hama apua. Ipongma hwom a mongma laxle sople ngokya.

¹¹ Chix ozün ma tüile le thüikya hia Meri Magdalen chix ngün ang kopdao le thüikya to hwome ojao chiong.

Jisu chix Wangshem Anyi hato Ngai

¹² Ifüima hwomkha angkya mixhuak anyi tingkhua to chatkya lomba to, malili lom tokhange chix hwom hato laile aho.

¹³ Nguilaxle hokhie mamabu hama wün; ikoxlechu hwome hokhi kax to chiong.

Jisu Bün ata hato Ngai

¹⁴ Ofüima bün büta fongsax ang thungle ngopongma, chix hwom hato laile aho; ilaxle hwome chiong homle mong tsakle ngokya khoma hwom to sa. Chemthüikoxle chix azangle zokya füima chix sün ngün ang kopdaokyabu kax to hwome chiong.

¹⁵ Chixe hwom ang thüi: “Hünzom a chaxwannu pangnu khato paokox; khünaknüsa hama Kaxho Müikya apukkox.

¹⁶ Owae ong laxle bapti laxüi hex, chixe khosünkya ataküi; ikoxle owae chiong laxüi hex, chixe thajao kopüi.

¹⁷ Mongongkyabu ang ibu mok angkya tsakzong koxpu: Ku mün ma hwome haxshix chasabu jwonle apaoüi; chitsingkya kax ma hwome zangwünüi;

¹⁸ Hwome pu kople apüi koxchu chichangba tüta ningkya zik-hing lingkoxchu, ijae hwom to ikuxsa ngaxchu sikngün münfaüi. Kakmixbu to hwome chak füi twonle hwom kakbu amüi koxüi.”

Jisu a Zangkangting to Dün

¹⁹ Hwom füi ile akax füima, Jowanpa Jisu zangkangting to dün, ilaxle Jowanpa tsaxchi ma athung.

²⁰ Wangshembue pangnu khato pao ilaxle hwon-ano; ilaxle Jowanpa-e hwom füi tomle mwotmok; ile otsingtsing chix changpule münwan füi kaxkhi alai le, hwom makhange ohünotünbu mwot mok ang tom.