MARK 15 - OTSAO BAIBEL (BSI)

Jisu Pilat hato Apüi

¹ Swomsae nguakhobu mixpa tüichongbu hia wanlom nwotmixbu füi tamchu nguawangbu füi katzua tsuak. Hwome Jisu to janbüi füi khak laxle Pilat hato apüile kox.

² Pitar-e chix ma kax atüi: “Nang Jehudi nok wanghom changcha hex?” Jisu-e lanle chix ang thüi: “Nange wüi akaxdao ngünlaxle.”

³ Nguapa akhokyabue chix ma tüle kaxhux fe.

⁴ Tamchatlechu Pitar-e atüi: “Nange chemlechu münlanüi hia? Hwome nang ma kaxhux fekyabu apalax!”

⁵ Chatlechu Jisu-e chemlechu chilan: ikoxle Pilat khosam.

Jisu Lang angkya Kax Tsuak

⁶ Kaitox Pangpwon foto hwome jukya khünak, kun ma kople thomkya mix tuita danle apao angkya chix wanlom tüikya.

⁷ Üntoxle Barabba le amünkya mixsün, nokpu zanbu füi tomle kople thomkya mixsün tuita tüikya; tingnok füi alün le ajong pongma hwome mix lang.

⁸ Khünaknu othom Pilat hato donglaxle ami pongkya ningle, kople thomkya khünak tuita danle fa angkya kaxju ang ngui.

⁹ Ipongma Pitar-e lan: “Kue hünzom hanpak ang Jehudi nok Wanghom dan angkya hünzom mong tsucha hex?”

¹⁰ Chemthüikoxle nguapa akhokyabue Jisu a chix ang miktsak laxle owüiole koxpule awan.

¹¹ Ikoxlechu chixe hwom ang Barabba mix danle naxfa ang nguapa akhokyabue khünaknu to chüi le ama.

¹² Chatlechu Pitar-e hwom kax to lanle thüi: “Jangchangba Hünzome ‘Jehudi nok Wanghom’ le nyakkya füi kue chemle naxmok le texpu?”

¹³ Hwome akhongle thüi: “Chix a takle langdao.”

¹⁴ Pitar-e hwom ang thüi: “Büthüikoxle? Chixe chem zia ama daopu?” Anaolechu hwom süchongle mix akhong: “Chix a takle langdao.”

¹⁵ Ikoxle Pitar-e khünaknu mongzom amüi ang, hwom hato Barabba danle alai, ifüima Jisu a müikhwon zu füi fit ilaxle lang ang owüiole kox.

Süpahibue Jisu Adix-ada

¹⁶ Süpahibue chix Chongwang khwa homtho to pao, ilaxle hwome süpahi othom pangnu wüi nyakle asox.

¹⁷ Hwome chix ang nyikhik awunle kox, ifüima hwome hux khüsün zinglaxle chix ang asünle kox.

¹⁸ Ilaxle hwome chix shwomle thüi: “Jehudi nok Wanghom! Nang tsünlo le ngolax!”

¹⁹ Hwome chix khang ma pünthom füi fit, chix to thuak füi thuak, ilaxle ahaile chikux athong le shwom.

²⁰ Ile chix adix-ada füima hwome chix angkya nyikhik siklaxle chix nyi wüi awunle kox. Ifüima hwome chix pünsak ma takle lang ang pao.

Jisu Pünsak ma Takle Langkya

²¹ Sereni nok Simon (Alekjendar hia Rufa nyi hopa) tingkhua tokya nguiüi hwom füi apong. Pünsak pai angkya süpahibue chix atsangle hwom füito pao.

²² Hwome Jisu Golgotha (Khangza hua) le nyakkya khato pao.

²³ Ikhato hwome chix ang grep-ju khaxkya füi awon ling ang tom, ikoxlechu chixe ija chiling.

²⁴ Ifüima hwome chix pünsak ma tak ilaxle khünak huak ma lap le opupue chem kopkople, nantak laxle chix nyiza hwome ahanle lax.

²⁵ Hwome chix pünsak ma tak ponge anop ningkya aku baji tuk changkya.

²⁶ JEHUDI NOK WANGHOM le chix ajaokya kax hwome chix khangkho ma zale tox.

²⁷ Üntoxle hwome chix füi tomle ahux mix anyichu, tuita chix tsaxchi ma ata mix a chix nongchi male tak.

²⁸ Ile “Chixe mütkop mixbu süntswon ma wom”, le akaxkya Otsao Lai kax changle ngai ang tom.

²⁹ Le-zyenüi khünakbue khang akhuxlaxle, chix wünhai le thüi: “Ei, Zangshwom-Hom pünlaxle nyix azom bama zingle tsuak angkya mix nang;

³⁰ athaxpi pünsak angkya julax ilaxle azanglax!”

³¹ Ile nguapa akhokyabue tamchu wanlom nwotmixbue chix chanyile thüi: “Chixe mixkho a sün ang tho ikoxle makho a sün ang müntho;

³² Keme ngünlaxle ongkya lima, Israel nok wanghompa Khrista athax ile pünsak angkya jukoxle müise.” Ija ningle chix füi tomle pünsak ma takkya nyiechu wüi chix tha ajao.

Jisu Zikya

³³ Tungto shene khonta azom chaxwan pangnu khato wüi haxshix zangnak.

³⁴ Üntoxle azom baji shene Jisu-e ozing alaile: “Eloi, Eloi, Lamasabakthani?”, le akhong.

³⁵ Ija khama ajongle ngokyabu züizüie ija zing atatkya ma thüi: “Apalax! Chixe Elija nyakle.”

³⁶ Ziklaxle hwom kha angkya khünak tuitae, pünsi tie awangkya othwop tuita, ze kiatua tun ma la laxle chix ang ling ang koxle thüi: “Taxmok! Pünsak angkya chix ajo ang Elija chihüi hia hüihüi!”

³⁷ Tüle azaxle akhong laxle Jisu zi.

³⁸ Zangshwom hom atsienle tinle thomkya nyikhiknu, okhochi makhange chitong kople kyetle anyi ang achang.

³⁹ Chix zuima ajong ngokya süpahi alixachonge, Jisu ile zikya ngünkya zuma: “Ija khünak a otsingtsing ma Zang Hosa jao changdaokya changa”, le thüi.

⁴⁰ Shekobu züizüie ochu tokhange hule ngokya; hwom khama Meri Magdalen, ilaxle Jakop honao hia Jusep nyi honu Meri, tamchu Salomi hwom asukya;

⁴¹ Chix Galili to tüipongma, hwome chix man to ilaxle chix to fong; ilaxle mama shekobu chix füito Jerusalem to nguikyabuchu hwom füi tomle asukya.

Jisu Mang Akhünkya

⁴² Arimathia nok Jusep nguipongma zanghan hom angle azong le tüikya. Chix a tuita Zang Wangting tanle ngokya, noke achuak achenle tüikya nguawang tuita changkya.

⁴³ Ija nyix a achwonkya nyix (sabath thonyix) changkya. Ikhoma Jusep mongchong laxle Pilat hato nguilaxle Jisu mang jule lax.

⁴⁴ Jisu ziüna le atatlaxle Pilat abüt. Chixe hota thakma apünkya süpahi alixachong nyaklaxle chix zi füima hanpak chemtukux ledaopuix, ija awanle lax.

⁴⁵ Hota thakma apünkya mixsün makhange awan ang kopkya zuma tix Pitar-e Jusep ang Jisu mang pao ang kox.

⁴⁶ Jusep-e nyidax shak, mang ajo ilaxle ija füi loplaxle long tholaxle zingkya zuk ma chix sho. Chixe zuk ka longnu tuita füi hakle tox.

⁴⁷ Meri Magdalen hia Jusep honu Meri nyie, Jisu mang ojong ma thompuix ang, toxkya to hule ngo.