MARK 13 - OTSAO BAIBEL (BSI)

Jisu-e Zangshwom-Hom Atsun angkya bama Akax

¹ Jisu Zangshwom-Hom angkya lai pongma, chix wangshem tuitae chix ang thüi: “Nwotmix! hulax, chemle müitsuakkya long hia hom hex?”

² Jisu-e chix ang thüi: “Ijabu hom chongkya nange ngünpuix nyi? Ikhama long tuitachu chiakhai homle müntoxüi ikoxle ibu pangnu wüi atsunüi.”

Sikngün üntoxle Zothupbu

³ Zangshwom-Hom akailaxle Jisu Olip haxhua ma thungle ngoponge, Pitar hia Jakop tamchu Juhan hia Andriw hwom süile chix hato hüilaxle akax,

⁴ “Ijabu ongai ningle chang angkya? Tamchu ibu changle hüiüi ma hanpak nguile hüikya münwan ang chem changüi? Ibu kwom hama apua hüi.”

⁵ Jisu-e hwom ang thüi: “Owaechu hünzom ochei lom to chipao angkya bama khünli lax.

⁶ Ku chix changpu, le ku mün ma akaxle huanuma nguiüi ilaxle hwome khünaknu tüle dyenüi;

⁷ üntoxle nuisox hia tsailo to zan zing atat pongma hünzom taxaban, ijabu a chang angkya jao; ikoxlechu oshuk hüile ngoüna le münchang.

⁸ Chaxwan tuita ata chaxwan füi azanüi; wangting tuita ata wangting füi azanüi; pangnu khato bütix siüi tamchu otui onuak tüiüi. Ijabu a naongün wokkak owang ningle changpu.

⁹ “Ikoxle hünzom ma hanpakma khünkhi lax, chemthüikoxle hünzom a kop laxle khwa to kaxfün ang paoüi; Sinagok ma hünzom to chak moküi; ilaxle Gowarnor hia wanghombu pomtho to ku hanpakma kaxkhi fa ang hünzom ajongüi.

¹⁰ Ikoxlechu oshuk hüiüi thoto Kaxho Müikya jat pangnu hato apuale kop angkya oli changle.

¹¹ Üntoxle otue hwome hünzom kaxfün ang khwa to paoüi hex, hanpak mangui tanto hünzome chem akax angkya changkoxpu le abanle taxngo; ikoxle hanpak nguikya füi tomle hünzom ang chempang koxüihex ija hünzome akaxkox. Chemthüikoxle nange wünkya zangwün a nang kax münchangüi; ikoxle ibu a Otsao Chasa tokhange hüikya changüi.

¹² Khünakbue matüi manao tamchu masu masabu lang ang owüiole koxüi; ilaxle susa hwome manu mapa füi alünle ajongüi, ilaxle hwom lang ang koxüi.

¹³ Ku mün khoma hexle khünak noke wüi hünzom thua anuüi; ikoxlechu oshuk kople adukya mixe khosün ataküi.

Za-adünle Abüt angkya

¹⁴ “Ikoxle ongai hünzome nushix dongle za adünkya max angkya mix (ekya mixe awanle koplax) chiajongpüli khama ajongle ngünüi hex, ija pongma Jehudi ma asukyabu haxhua to paolax.

¹⁵ Homkho to asukya mix, chix hom to tütali lax ang nople hanpak taxalyet.

¹⁶ Zim-hax to asukya mix, chix nyiza kop ang ma hom to taxchat ngozi.

¹⁷ Ija tuke omün ma asukyabu tamchu naosom tsomsip tankha asukyabu zongto huanuma nuzao sütüi.

¹⁸ Ijabu zangkong tue chichang angkya kuxma joplax.

¹⁹ Chemthüikoxle ija tuke apongkya thangshix, Zange chaxwannu zingpong tokhange athax kopkya mong ma iningle jao machangle tüiüi tamchu ile otuechu münchang toxüi.

²⁰ Ikoxlechu Jowanpa-e ibu hanpak amoxdaoa; ile chichang thüikoxle khünak owachu ozün ma ngotsuak angkya fang münchang. Ikoxlechu kamle kopdaokyabu hanpak ang, chixe ijabu hanpak amoxdaoa.

²¹ “Ifüima khünak owawae hünzom ang: ‘Hulax, Khrista a ikhama tüile!’ chichangba, ‘Hulax chuja khato!’, le jangthüi; ija to ongkya taxtüi.

²² Chemthüikoxle othai khristabu tamchu othai ajebu tüle lwonüi; ilaxle jangtsuakba otsao khünakbu ngaxchu dyen tsuak angkya kuxma hwome münwan hia ohünotünbu tüle ahoüi.

²³ Ikoxle hünzom khünli le ngolax; Hulax, kue ija achale wüi hünzom füi akaxle thompu.

Khünak Hosa Nguikya

²⁴ “Ija sikngün zothup kaikya füima, zanghan nakle maxüi; lyetnue tam chinyanüi;

²⁵ lyettsibu punle dütüi, ilaxle ding angkya tsakzong, sile achikachaxüi.

²⁶ Ifüima Khünak Hosa tüle zaxzangle tamchu ngamle zangfwom ma juüi.

²⁷ Ijama chix kaxtaimixbu apaoüi ilaxle tüchikao chaxwannu shuk makhange tüchikao zangding tua alople, Zange kamle thomdaokyabu ozong ali tokhange asoxüi.

Fupsa Pün makhange Awanle kop angkya

²⁸ “Fupsa pün makhange kaxpan awanle koplax. Otue osong dongle ochak chuiüi hex, hünzome tsonu nguiüna le awan ang kople.

²⁹ Ilailaile ijabu changle hüikya ngünkya zuma, hanpak chwonünale hünzome awanle koplax.

³⁰ Athax pongma tüikya khünakbu komle mazi tanto wüi ibu pangnu changle hüi angkya mong ma koplax.

³¹ Ding hia hax kaile paoüi ikoxlechu ku kax kaile münpaoüi.

Otu hia Hanpak Owaechu Müntik

³² “Ija nyix chichangba otu owan bama, Apa boma, kaxtaimixbue chichangba Hosae ngaxchu chichangba owaechu awan ang müntho.

³³ Hunga ngolax, mik hingle ngolax; chemthüikoxle hanpak otue changüi hex hünzome münawan.

³⁴ Ija a khünak tuita hom toxlaxle mixwün to paoüi ningle changpu. Chixe ma dabu ang mixhuak to ma mwot-mwot ahanle kox ilaxle hom nyet mix ang mik-hingle hule ngolaxo le tox.

³⁵ Ija khoma mik-hingle hule ngolax; chemthüikoxle hom hopupa a anyix ningle wüi nguitüi, awün ningle wüi nguitüi, ohat-thoe wüi nguitüi, anop ningle wüi nguifa tüi, chix chemtue ngui angkya hex hünzome münawan.

³⁶ Chix allele nguilaxbachu chix thoma hünzom jiple chibang angkya oli.

³⁷ Oja kue nang füi akaxpuix, ija kue noknusa füi akaxpu: Hunga ngolax!”