MARK 12 - OTSAO BAIBEL (BSI)

Haxtok ma Manzai mixbu Kaxpan

¹ Ifüima Jisu-e hwom füi kaxpan makhange akax ang süt: “Khünak tuitae grep haxtok manzai. Ija akhople zün zinglaxle zuziak fyet ang hax tho ilaxle nyet nui ang tap tuita zing. Ifüima mwotmok mixbu chak to manzai ang danle toxlaxle chix a mix chaxwan to mixwün ang pao.

² Otu nguikya zuma, hwom angkya grep manzai chix tsyen lax ang chixe hwom hato ma da tuita akat.

³ Mwotmok mixbue ija mixsün kop ilaxle fit üntoxle ohua ma achat.

⁴ Chatlechu wüi hopunue hwom hato chix da tuita tomle akat. Ikoxle mwotmok mixbue chix khang ma mak kha ilaxle zak akople hwon.

⁵ Anaolechu hopunue chix da tuita wüi tsanle akat. Ikoxle hwome chix lang; ilaxle mamabu tochu wüi hwome ile hwon; züizüi to fit-müile chang, mamabu a langle awüt.

⁶ Ilaxle chix ang athaxchu tuita atale tüikya, ija a chix mongkün sasün changkya. Oshuk ma chixe chix sasün hwom hato tsanle akat. Hosa thua hwom zaüi changtüi angpu le chixe thüt.

⁷ Ikoxle ibu manzai mixbue tata füi zangwünle thüi: ‘Ija a hopunu sasün tsingtsing changle; oman keme pi chix langhax, ilaxle ija mantswon kem kux ang achanghax!’

⁸ Idaile hwome chix koplaxle lang ilaxle chix mang grep haxtok akaile tswonle awüt.”

⁹ Jisu-e atüi: “Jangchangba grep haxtok hopupae chemle hwonüi? Chix nguiüi ilaxle mwot mokmixbu pangnu langüi ilaxle ija grep haxtok a mama mix ang koxüi.

¹⁰ Hünzome ija lai edaotüi angpu: “Homzing mixbue chilaxle awütkya long, akhokya homkom-longnu ang achangüi.

¹¹ Ija a Jowanpa-e mokpu; kem mikngün ma ija a, ohünotün changle.”

¹² Kaxpan ija a hwom to dyenkya kax changpule awanlaxle hwome chix kop angkya oshua lom, ikoxlechu hwom khünaknu thua za. Ikhoma hwome chix danle tox.

Süi Kox angkya bama Atüikya

¹³ Züizüi farisibu hia Herod wangshembu kax atüikya füi chix tsünle aman ang Jisu hato pao.

¹⁴ Hwom hüilaxle chix ma atüi: “Nwotmix, nang a otsingtsing zangwünkya mix changle tamchu nang owa thuachu münza; nange khünak thünza to münhu, ikoxle otsingtsing ma khünak bama Zang mongtex chem hex ija apuale le kwome awanle. Kwome Kaisar ang chaxwan süi fa angkya olom chichang changpuix?

¹⁵ “Kwome ibu chifa fakox müiüi?” Ikoxlechu Jisu-e Hwom tsingtsang awanlaxle hwom ang thüi: “Büthüikoxle hünzome ku aman ang azong ngopu? Kue hule ano kop angkya kuxma ku hato jan ngun huak tuita apüihüi.”

¹⁶ Hwome ija apüi. Chixe hwom ma atüi: “Ija owa noksa tamchu owa mün zale tüipu?” Hwome chix ang thüi: “Kaisar.”

¹⁷ Jisu-e hwom ang thüi: “Kaisar kux chem hex ija a Kaisar ang laxkox ilaxle Zang kux chem hex ija a Zang ang laxkox.” Ijama hwom ija chix kaxlan atatlaxle abüt.

Anaole Zokya bama atüikya

¹⁸ Ifüima zidaokya anaole münzo le akaxkya sadukibue chix hato hüilaxle chix ma atüi,

¹⁹ “Nwotmix, owawa khünak süshix naosom chitüi homtoxle kakonu tata toxlaxle zi koxle, chix hanpakma sixli lai angkya kuxma, ija mixcha honao ma shong angkya kwom ang Mosa-e wanlom fale toxle.

²⁰ Hanpak tuita ma hotüi honao hwom sün anüt tüikya. Tüichongpae sheko tuita lax; ikoxle naosom chitox homle chix zile pao.

²¹ Ifüima ifüi angkya honaoe ija mixcha lax ilaxle naosom chitox homle chixchu wüi zile pao. Ifüima azom lekyaechu ile wüi chang.

²² Ile hwom anüt bibi pangnue wüi she a hwom kako ang lax. Ikoxle hwom opupuechu sixli chitox homtoxle pao. Oshukma ija mixchachu wüi zile pao.

²³ Athaxpi anaole zokya zuma she a hwombibi khama opupu kakonu ang achangüi? Chemthüikoxle she a hwom anüt pange wüi ma kako ang laxpu.”

²⁴ Jisu-e hwom ang thüi: “Otsao Lai tamchu Zang tsakzong chitsing kox khato hünzom oma chithai haxkux.

²⁵ Chemthüikoxle otue hwom anaole zoüihex, aju asomle pao angkya chichangle zangkangting tokya kaxtaimixbu ningle ngoüi.

²⁶ Ikoxlechu ziünkyabu bama, hwom anaole zoüi le, Mosa lai ma, fum ma wün chuakya khama akax ngokya khama, Zange chix ang: ‘Ku Abraham Zang, Isak Zang tamchu Jakop Zang changpu’, le thüikya kha hünzome ele ma ano hexnyi?

²⁷ Chix a omangbu Zang münchang ikoxle ozün ma ngokyabu Zang changpu. Hünzom a komkaile thaile ngopu!”

Akhokya Kaxtom

²⁸ Wanlom nwotmixbu kha angkya tuitaechu hwom zangwün ija atatle lax. Jisu-e hwom kax to müile wüi landaoa le chixe ngün; ikhoma atüikya kax ija füi chix Jisu hato ngui. Chixe Jisu ma atüi: “Wanlom pangnu khama otong akhokya opupu hex?”

²⁹ Jisu-e lan: “Akhokya kaxtom a ija; O Israel, Apalax: ‘Jowanpa kem Zang a tuita wüi.

³⁰ Nang monge abakle, nang chasae abakle, nang khangkae abakle, ilaxle nang tsakzonge abakle, nange Jowanpa, nang Zang to mongkün kox.’

³¹ Anyi lekya akhokya kaxtom a ija: ‘Nange ma tomzi to ma bütukuxle mongkün kox.’ Ibu füi süchongkya kaxtom mama müntüi.”

³² Wanlom nwotmixe chix ang thüi: “Nwotmix! Nang kax changtomta le. Otsingtsingma Jowanpa, chix tix Zang changpu ilaxle chix boma mama zang owachu müntüi;

³³ Khünake mong makhange tamchu tutex füi, tsakzonge abakle, Zang to mongkün angkya oli changle; ilaxle chixe ma tomzi to ma bütukuxle mongkün angkya changle. Müi langlaxle tamchu mama tö koxkya füi ngaxchu kaxtom ija anyi kax ma laxle changkya wüi tüichongpa changle.”

³⁴ Jisu-e chix kaxlan tüle manle landaoa le ngünlaxle chix ang thüi: “Nang a Zang Wangting füi aluile atsaikya münchang.” Ija füima khünak owaechu chix ma mama kax atüi angkya mong chichong.

Messaiah bama Atüikya

³⁵ Jisu-e Zangshwom-Hom to hwon-ano le ngopongma ija kax atüi: “Khrista a Dawid Hosa changpule wanlom nwotmixbue büthüikya to thüipuix?

³⁶ Dawid füi Otsao Chasa akax: ‘Jowanpa-e ku Jowanpa ang thüi; Kue nang zanbu, nang chifa fang to mathom tanto; nang ku tsaxchi ma thung lax.’

³⁷ Dawid-e ngaxchu chix ang Jowanpa le nyak; jangchang thüiningle Messaiah a büthüikya to Dawid sixli chang changtsuak puix?”

Wanlom Nwotmixbu hanpakma Kaxkhün

³⁸ Khünaknu othom chongkya tuitae Jisu zangwün to mongmüi le apa. Chixe hwon-anokya ma thüi: “Wanlom nwotmixbu bama khünzai lax; hwome nyi lowüilole tholaxle ahamse tsule tamchu thalex nui to shwomkya laxse tsule;

³⁹ Üntoxle sinagok ma ngwotnui amüikya tamchu püntuxkya khato alixachong ngwotnui lomle;

⁴⁰ Owae zomnubu chwom laxle hwom kuxka laxpuix ilaxlechu naxzaole ozulole zangjoppuix; amakya sikngün a hwome kopüi!”

Zomnu tuitae Tö koxkya

⁴¹ Jisu Zangshwom-Hom ma ngun thün nui hama thungle ngopong ma, chixe khünaknue ngun chemle shopuix ija to hule ngo. Iponge hakpa luapabue ngun huanu huanuma sho.

⁴² Ofüima chemchu chitüikya zomnu tuita ngui, ilaxle she-e ngunhuak kho angui lankya ngun khix anyi sho.

⁴³ Chixe ma wangshembu nyaklaxle thüi: “Kue hünzom ang otsing tomtata akaxpu, ngunthün-nui ma ngun shokya pangnu füi, chemchu chitüikya zomnu ijae wüi süluile shodaoa.

⁴⁴ Chemthüikoxle mamabue ma mwot to lax-twonkya chaktua, hwom hanpakma chem mwot to chithaple oja atale tox puix ija shopu; ikoxle she-e ma ma chemtüipuix, ma süt hanpak ang ngaxchu atale chitoxle shokya changle.”