MANGSOP 1 - OTSAO BAIBEL (BSI)Jerusalem Mongtsik-mongma 1 Hanpak tuita ma khünake awangle tüikya Jerusalem, chemle wandangjale tüipuix! Hanpak tuita ma zangfange chathua zale tüikya, athax she a thanu ang changdaoa; Tingnubu khama sümüipupa a da tuita ang changdaoa. 2 She a jamütungle sople apüi; she bwomzong to mikfi jenle ju. She üinu ozang hwom khama, she mong asom ang tuita ngaxchu chitüi. She füi nokmüile changkyabue she ale ilaxle athax a hwom pangwüi she zongto zan ang chang. 3 Judah angkya khünaknu a chingcha ashukle dabu ang hwomkha angkya atsangle pao. Hwom a mixnok chaxwanbu to ngo, mamixle nyak angkya owa chitüikya nok to— Zanbue akhoplaxle, paole azang angkya olom jao chitüile. 4 Otsao nazak nyix Zangshwom-Hom to zangshwom ang nguikya athaxpi khünak tuita chitüi. Ikhama tsai ngaole ngokya naochabu sikngün ma ngo, ilaxle nguapabu wotle awao angkya boma chemchu chitüi. Tingnu panja ahuasak, ilaxle Zaion a künduk-mongthang ma ngo. 5 She zanpabue she to lüt; hwome ma tsak-zong füi she to künle kop. She huanu ochax khoma Jowanpae she füi sikngün apong ang tom; She naosombu a koplaxle tsui pao. 6 Jerusalem sünmüi a kaile toxdaokya zangwün ang achang. Hwom lompabu a woknuake lopkya müikhibu ningle, Hwom a müihap mixbu zantho to fütle paokya bama huanuma zongsho. 7 Maxkya chifün ma she tata athax, Jerusalem-e she sünmüi-joma thütle atak. Chemtue she a zanpabu chak to dongpuix, she to asunle fa angkya mix tuita chitüi; She to anaokya zuma lütkyabue she chanyile wanjai. 8 She achuak-achenkya paodaoa; she a tomhua ma ilaxle mongtextex ma nutnuile. She awao ilaxle azakle thün khom. Jerusalem-e khomtsikya ochaxbu füi she alüile zakkop ang tom. 9 She chitsaokya ochwon ma ngünle lax, ikoxle she shoma hanpakma she to ojao chikak. She asongle dütkya a khomtsikya tuita; owaechu she joxle amüi ang chitho. She zanpabue lütdaoa, ilaxle she a Jowanpa ma chingcha jule akhong. 10 Zanpabue she tuina komkaile pale pao. She hwom a Zangshwom-Hom jao to nopüi ngün, Jowanpae ikhato mixnokbu a chiadün angkya kax tüikya. 11 She khünaknue hidaole ngaxchu sax angkya süt tüichale lom pongma awao; Hwom ozün ma thom angkya kux male hwome ma tuinabu osüt-oling füi alüix. Tingnu akhong: “Jowanpae ku max-samle ngokya chifün to huhüi.” 12 “Ku to hulax!”, le-zyenüi khünakbu pangwüi füi akaxle she akhong: “Ku to kakkya ningle owa tochu makak tox, Chix mongtsik pongma Jowanpae ku hato ahüikya okak a. 13 “Chixe thakchi tokya wün ajole, ija wüne ku mongkha ashunle. Chixe ku hanpakma kam tha ilaxle ku haxkha to ahüi. Ifüima chixe ku danle tox ilaxle ku a jento tsütle kakkya füi ngo. 14 “Chixe ku ochax pangwüi akhi-atak ilaxle ibu pangwüi tuita ma athop; Chixe ibu ku dingkux ma alikle kox, ilaxle ijae lixle ku ang zongsho. Jowanpa-e ku a ku zanpabu chak to kox, ilaxle ku hwom tuto chem angchu chichangle max. 15 “Ku süpahi atsakkyabu cha Jowanpa nyi; Ku naosombu amüt ang chixe süpahibu akat. Grep-ti fyetkya nui to grep zutle asyep pupule chixe ku khünaknu zutle asyep. 16 “Ikhoma ku mikbu a mikfie awangle tüile. Ku mong owaechu asomle fa ang müntho; owaechu ku mong achenle chichang. Zanpa ku to anaole changdaoa; ku khünaknu chak ma chemchu müntox. 17 “Kue ku chakbu thüi: Ikoxlechu ku to owaechu münfongüi. Jowanpae pangnu chitokya zanbu ku zan to ka ang se; Chilaxle tüi tuita ningle hwome ku ashikle akhix. 18 “Ikoxlechu Jowanpa a sukya changle, chemthüikoxle kue chix kax ma chilax. Ku kax to apalax, khünaknue pangnu khato; ku tsütle kakle ngokya to hulax. Ku naosom sheko hia lüka pangwüi zanda ang kople paodaoa. 19 “Ku füi nokmüima ngokyabu kue se, ikoxlechu hwome ku to fongse chitsu. Nguapabu hia lompabu tingjang lomnubu ma zi, Hwom azangle ngo angkya hanpakma sütlomngale a. 20 “Hulax, O Jowanpa, ku künmax-mongshan to, chasa ma ku chamax-muasamle changkya to! Ku mongkha a ku ochax bama mongmaxkya ma ashixle changdaoa. Tingjang lomnubu to mix langkyabu tüile; hommong khato ngaxchu mang tüile. 21 “Apalax ku wotkya zing to; ku ang mong asomle fang angkya owachu chitüi. Nange ku hato thama ahüikya ngünlaxle ku zanpabu ang tüle mongmüile. Apüihüi nange tsaosaxkya nyix; ku sikngündaokya ningle ku zanpabu sikngün ang tomkox. 22 “Hwom chichang-chizangkya ochax pangnu khoma hwom thaile le ajaokox; Nange ku to ku ochaxbu khoma chemle sikangünle changdaopuix ija ningle hwom tochu sikangün kox. Ku mongmaxle awaopu, ilaxle ku a mongkha ma kakle.” |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India