LIWI 9 - OTSAO BAIBEL (BSI)

Arun-e Töbu Kox

¹ Ilaxle anyi lükya ma, Mosa-e Arun hia chix sasün hwom tamchu Israel nok tüichong mixmüibu se.

² Chixe Arun ang thüi: “Nange ochax tö hanpak ang maihupongsa tuita koplax, anaolechu wün to zokle ashunkya tö hanpak ang ofwot chitüikya chunla tuita; ibu a Jowanpa ang tö koxpongma koxkox.

³ Ilaxle Israel khünaknu füi nange ija kax akaxkox: Hünzome ochax tö hanpak ang zwonpong tuita koplax, ilaxle zokle ashunkya tö hanpak ang maihusa tuita üntoxle chun hosa tuita le koplax. Ibu pangwüi zanglao tuipong tsongdaokya müi laxlax.

⁴ Anaole chu Jowanpa ang tumüi tö kox angkya maihupong tuita hia chun ola tuita le koplax; tamchu münga füi awon sütli tö tuita laxlax-toxlax; chemthüikoxle anyix Jowanpa hünzom hato ngai angkya changle.”

⁵ Ilaxle Mosa-e hwom ang kaxtom fakya ningle ijabu hwome Jowanpa hato, zangshwom ang khünaknu asoxkya Nyihom to apüi; ilaxle khünaknu pangwüi soxle hüilaxle Jowanpa hama ajong.

⁶ Ijama Mosa-e akax: “Ija a hünzome mok angkya, Jowanpae fakya kaxtom changle; ifüima Jowanpa fuazang hünzom hato ngaiüi.”

⁷ Ifüima Mosa-e Arun ang thüi: “Jowanpae kaxtom fakya ningle tö-tsap zuito hüilax ilaxle ikhama, khünaknu thaidaokya alak angkya hanpakma nange ochax tö laxkox, tamchu zokle ashunkya tö chuwüi laxkox. Ma hanpak angchu tamchu khünaknu hanpak ang chuwüi, ochax paole khongai angkya hanpak ija tö laxkox.”

⁸ Ikhoma Arun a tö koxnui hato ngui ilaxle chix ochax hanpak ang kox ang apüikya maihupongsa lang.

⁹ Sasün hwome chix hato aji apüile kox, ilaxle ija aji ma chix chak-khi som üntoxle tö-tsap ma tüikya müizongbu to lyet ilaxle ota tüikya ajibu a tö-tsap chitong ma thok.

¹⁰ Ikoxlechu Jowanpae Mosa ang koxkya kaxtom ningle, ochax tö ang koxkya müizao, mongsa tamchu okhax to chwopkya, khaxwang, ibu bakle chixe tö-tsap ma zokle ashun.

¹¹ Ilaxle ohak hia okhwon; chixe hwom pom homtho to zok.

¹² Ilaxle chixe zokle ashunle tö kox angkya müi lang; ilaxle Arun sasün hwome chix ang aji kox; chixe ija tö-tsap akhople sak.

¹³ Ilaxle hwome chix ang müikhang hia mama müi ofun-ofo pangwüi kox, ilaxle chixe ibu pangwüi tö-tsap dingma zokle ashun.

¹⁴ Ilaxle chixe oche-oshin hia ocha-ochak so, ilaxle mama zokle ashunkya tö pangnu dingma danle zokle ashun.

¹⁵ Ifüima chixe khünaknu hanpak tö kox. Khünaknu ochax tö hanpak ang kopkya zwon, ochax tö kox ang apüi. Chixe ija müi lang ilaxle owangpongkya lailaile ochax tö kox.

¹⁶ Ilaxle chu chixe zokle ashunkya tö apüi, ilaxle wanlom ma tüikya ningle tö kox.

¹⁷ Swomsa zokle ashunkya tö boma chakpuix awangle süt tö koplaxle, tö-tsap ding ma zokle ashunle tö kox.

¹⁸ Tamchu khünaknu hanpakma tumüi tö kox ang huzanpong hia chun ola chatle chu chixe lang ilaxle Arun sasün hwome chix ang aji apüile kox. Chixe ija aji füi tö-tsap akhople sak.

¹⁹ Maihupong hia chunla ma tüikya müizao pangwüi Arun-e kop,

²⁰ ilaxle ibu pangwüi ija müi otsom ding ma dan üntoxle tö-tsap zuito azyale apüi. Chixe müizao a tö-tsap ding ma zokle ashun.

²¹ Otsom hia müichungbu a, Mosa makhange fakya kaxtom ningle, nguapabu hanpak ang, sümüikya hingho tuita ningle Jowanpa chak to kox.

²² Arun-e chix chak khünaknu chito ahalaxle khünaknu to mohiman; ilaxle ochax tö, zokle ashunkya to, tamchu tumüi tö, ibu koxlaxle chix thai.

²³ Zangshwom ang khünaknu asoxkya Nyihom to Mosa hia Arun nyi dong, ilaxle lai üntoxle khünaknu to mohiman, tamchu khünaknu hato Jowanpa fuazang ngaile aho.

²⁴ Jowanpae allele wün alai, ilaxle zokle ashunkya tö üntoxle tö-tsap angkya müizao zokle ashun. Ibu ngünkya zuma khünaknu akhong ilaxle akhuxle thün khom.