LIWI 7 - OTSAO BAIBEL (BSI)

Tsangthom Tö Koxkyabu

¹ Ibibi a thaikya tsangthom bama koxkya müimamakya otsao wanlombu changpu.

² Ija tö hanpakma müi a, ojongkha ma zokle ashunkya tö langpuix, tö-tsap zongma shuakuxchi, ikhama lang angkya changpu. Ikha angkya aji füi tö-tsap akhople sak angkya changpu.

³ Ilaxle ija ozao pangwüi tö ang kox angkya changpu; müikua hia oshin to chwopkya ozao pangwüi,

⁴ anaolechu mongsa anyi hia ija samtua angkya than tamchu okhax to chwopkya, khaxwang füi tomle chixe alaile lax angkya changle.

⁵ Ilaxle ija to Jowanpa ang wün füi zokle ashunkya tö kox angkya hanpakma nguapae tö-tsap dingma zokle ashun angkya changle. Ija a thaikya-tsangthom tö changle.

⁶ Nguapabu khama lükakae ija sax angkya changle. Ija a tuita otsao nui ma saxüi; ija a müimamakya otsao changle.

⁷ Thaikya-Tsangthom tö wanlom chuwüi ochax tö wanlom ningle changpu; ibu hanpak ang wanlom tuitata wüi changle; nguapa owae ochax pao angkya zomzingle khongai koxpuix, omüi a chix hanpak ang changpu.

⁸ Nguapa owae opupu hanpak ang zokle ashunkya tö koxüihex, chixe tö koxkya müikhwon a ija nguapa kux ang changüi.

⁹ An songkya nui ma zingkya süt tö koxkya foto, ilaxle an-tsan khua ma zingkya tö pangwüi nguapa kux ang changüi.

¹⁰ Ikoxlechu süt tö azang ma koxkya pangwüi, münga füi awonkya wüi changlax chichangba ozua wüi changlax, ibu a zompu-zangpa Arun hwom nguapabu kux changpu idaile hwome tomwüi-tomwüi ahanle lax angkya oli.

Notom-Tusüi Töbu

¹¹ Ija a Jowanpa ang tumüi hanpakma koxkya tö kox wanlom changle.

¹² Ija chixe mongmüi hanpak ang koxkya tö jangchang thüiningle, ija ma chixe mongmüi hanpak tö füi twonkhax chiawonkya an odwon tuita münga füi awon, anaolechu twonkhax füi chiawonkya ankhao to müngae lyetlaxle tamchu ankhix münga füi awon kox angkya changle.

¹³ Mongmüi tö füi tomle twonkhax awonkya ankhao chuwüi chixe kox angkya changle.

¹⁴ Ilaxle chixe koxkya tö pangnu ang thompong-thompong athütlaxle, chixe Jowanpa ang tö kox angkya changle; ija a nguapa owae tumüi tö koxkya aji saxüihex, chix kux ang changüi.

¹⁵ Ilaxle chixe tumüi tö koxkya müi a chixe tö koxkya nyix saxüi; ofüinop kople chixe funtachu chitoxüi.

¹⁶ Ikoxlechu chixe tsaotsüt tö koxle changpongma chichangba mongtex tö koxkya tuita jangchangba, chixe tö koxkya nyix ija saxüi, ikoxle ota-otua ofüinyix chuwüi saxüi.

¹⁷ Ikoxlechu tö koxkya müi nyix azom kople ota jangtüi, ija a wün to zokle ashunüi.

¹⁸ Ilaxle tumüi tö nyix azom lükya to saxle jangchangba, ija pongle chikopüi chichangba owae tö koxlaxpuix, ija e ma chilaxle changüi; ija a nushix dongkya ang changüi, ilaxle owae ija saxüihex chixe ma thaikya hünlit alüile hünüi.

¹⁹ Chitsaokya jali to lyetdaokya müi chemchu chisax angkya changle, ija a wün füi zokle ashunüi. Tsaothale tüikya müi pangwüi sax ang tsuak.

²⁰ Owae ma ma chitsaokya tüingale Jowanpa ang tumüi tö koxkya saxle changüihex, ija khünak a ma khünak tu angkya alaile changüi.

²¹ Ilaxle owawae chitsaokya jali to, khünak chitsaokya mix towüi changlax chichangba chitsaokya müi towüi changlax tamchu chitsaokya zünmok towüi changlax lyetle jangchang thüiningle, ilaxle Jowanpa ang koxkya tumüi tö saxle jangchang thüiningle, ija khünak a ma othom kha angkya alai angkya changle.

²² Anaole chu Jowanpae Mosa ang wanlombu koxle

²³ Israel khünaknu füi akax ang tomle, hwome maihu, chun chichangba chun ozao chisax angkya changle.

²⁴ Tamchu malualua to zile paokya müi oza, müie tsütle langkya müi oza mama mwot to lax ang tsuak; tüta lüwüi chang koxlechu ija sax angkya oli münchangle apua.

²⁵ Chemthüikoxle opange Jowanpa ang wün füi tö koxkya saxle changüihex, ija saxkya mix a Zang khünakbu tu angkya alaile changüi.

²⁶ Tamchu hünzome ma ngwotnui to o-hi-jux chem ajichu chilingüi.

²⁷ Owawae hidaole thüingaxchu aji saxle jangchang, ija khünak a ma khünaknu tu angkya alaile changüi.

²⁸ Anaole chuwüi Jowanpae Mosa ang wanlom mamabu koxle thüi:

²⁹ “Israel khünaknu füi akaxkox: Owae ma Jowanpa ang tumüi tö koxüihex, chixe ma tumüi töbu kha angkya Jowanpa hato töbu ataxkya hingho tuita ningle apüile kox angkya changle.

³⁰ Chixe ma chak makhange Jowanpa hato süt tö apüile kox angkya changle. Chixe müi tsomti otsom füi apüilaxle amüikya hingho tuita ang Jowanpa ang kox angkya changle.

³¹ Ija müizao a nguapa tö-tsap ding ma zoküi, ikoxle otsom a Arun hia chix sasün hwom hanpak ang changüi.

³² Ilaxle tumüi tö hanpak ang langkya kha angkya tsaxchi chung, hünzome saile tsuakkya tö hanpak ang hünzome nguapa ang kox angkya changle.

³³ Arun sasün hwom khama opupue tumüi tö koxkya hia aji hia müizao tö koxüihex, chixe müichung tsaxchi chung laxüi.

³⁴ Chemthüikoxle tö süchuakle koxkya kha angkya otsom tamchu tö koxkya kha angkya müichung, oja Israel khünakbue tumüi tö ang koxkyabu hex, ibu kue laxdaoa, ilaxle ibu a nguapa Arun hia chix sasün hwom ang Israel khünaknue kox angkya hwom süntswon ningle kue koxdaoa.

³⁵ Jowanpae hwom zompu-zangpabu mwot mok ang koxkya nyix makhange, Jowanpa ang wün füi tö koxkya kha angkya, ija a Arun hia chix sasün hwom hanpak ang koxkya süntom changle.

³⁶ Ija süntswon a Israel khünaknue Arun hia chix sasün hwom ang tsün-tsün to koxle ngo angkya hanpakma, chixe hwom, zompu-zangpabu ang kamkya makhange koxkya Jowanpa kaxtom changle.

³⁷ “Ija zom-zang a zokle ashunkya tö, süt tö, ochax tö, thaikya tö, fünle koxkya tö, tumüi tö, ibu pangnu hanpakma changle.

³⁸ Ija a Israel khünaknu ang, Sinai faonu-lingnak khato tüipongma, chix hato tö apüi angkya hanpakma Mosa ang Sinai haxnukho tokya Jowanpa kaxtom changle.”