LIWI 6 - OTSAO BAIBEL (BSI)

¹ Jowanpae Mosa ang ibibi wanlombu kox.

² Hünzom kha angkya owawae Jowanpa zongto, ma füikya Israel khünak tuitae athünle thom ang toxkya münachatpule angamkya chichangba chix angkya tütali ahuxle laxkya chichangba chix dyenlale changkya

³ chichangba amütdaokya bama nang atsekya ilaxle ija nange mün-ngünhexle atsekya, ibu makhange ochax lyenle jangchangdao, chixe tö apüile kox angkya wüi changpu.

^4-5 Nange ibu olom ma tüta ningkya ochax lyenle jangchangdao, nange chichang-chizangle kopkya bama tsangthom angkya wüi changpu. Oja nyix nang thaikya atakle changpuix, ija nyix wüi, nange hopupa ang anguile achat akox angkya changpu. Ija to obo ang thomtsa onüi kox angkya changpu.

⁶ Jowanpa ang nang tsangthom tö kox angkya hanpakma nguapa hato nange ofwot chitüikya chun chichangba zwon ola tuita apüile kox angkya changpu. Ija otha a onok thathop ma tyale thüt angkya changpu.

⁷ Nguapae ija nang hanpak ang tö koxüi ilaxle nang ochax thailak tüiüi.

Otom ma lanle Zokle Ashunle Koxkya Töbu

⁸ Jowanpae Mosa ang

⁹ Arun hia chix sasün hwom ang ibibi wanlombu kox angkya kaxtom kox: Zokle ashunkya tö a zang angaile ashun thomüi, ilaxle wün chuale ngo ang tomüi.

¹⁰ Ifüima nguapae chix jak-nyilo tholaxle tö-tsap ma tüikya labu hunlaxle tö-tsap zui ma toxüi.

¹¹ Ifüima chixe nyizabu lüiüi ilaxle zanglom ma tsaole tüikya nui to ija labu awütüi.

¹² Tötsap angkya wün otuechu chiamütle achua thom angkya changpu. Nguapae nopfole ikhama ha shoüi, ija ding ma zokle ashunkya tö achwonüi, ilaxle notom-tusüi tö angkya müizao zokle ashunüi.

¹³ Tötsap ma wün othuithuima chuale ngo ang koxüi, otuechu ija wün max ang chitomüi.

Saxziak Töbu

¹⁴ Ibu a saxziak tö hanpakma wanlombu changle. Arun sixli nguapae tö-tsap tunthoma Jowanpa ang ija saxziak tö kox angkya changpu.

¹⁵ Chixe chak-khui ma awangle ankhix hia münga laxüi, ilaxle ija ma ongan amüi angkya so laxüi, ilaxle ibu pangwüi tuita Jowanpa ang koxkya mongmüi ahole tö-tsap ding ma zokle tö koxüi. Ija tö ongan müikya Jowanpa zongto zinglongle müikya tuita changle.

^16-17 Ota tüikya a nguapabue saxüi. Ija a twonkhax chiawon homle an lum ang zingüi ilaxle otsao nui ma saxüi, ija a Jowanpa ngwotnui Nyihom nya-o ma changüi, Ija a Jowanpae nguapabu ang süt tö koxkya kha angkya hwom süntom ang koxkya changpu. Ija a ataxkya otsao. Ija chuwüi ochax tö hia Zang süntom töbu ningle otsao changpu.

¹⁸ Athax füichi ma jento, Jowanpa ang süt tö koxkya kha angkya tuita hwom süntom ningle, Arun su-sa hwom lükakae ija ahanle sax ang tsuak. Owawae tö ang koxkya süt to twonle jangchang thüiningle ija otsao tsak-zonge chix to maklaxle changüi.

¹⁹ Jowanpae Mosa ang ibibi wanlombu kox,

²⁰ ija a Arun sasün hwom nguapabu ang kamle atsao angkya hanpakma. Chemtue chix kamle atsaoüihex, ija nyix, chixe Jowanpa ang tö tuita ningle ankhix paon anyi (ija a nyixfokya to koxkya saxziak tö ma thütle), süifi a anopningle ilaxle süifi a hansonge kox angkya changle.

²¹ Ija a münga füi awon angkya changle ilaxle tikkhe ma mok angkya changle üntoxle thule akhixlaxle ija Jowanpa ang ongan müikya tö tuita ang apüile kox angkya changle.

²² Athax füichima ojento Arun su-sa hwom khama owae Nguakho Mwot mokle changüihex, chixe ija tö kox angkya changle. Ija a Jowanpa ang tö koxkya tuita ang komkaile zokle ashunüi.

²³ Nguapae koxkya saxziak tö kha angkya fun tuita sax ang müntsuak; ibu pangwüi zokle ashun angkya oli changle.

Ochax Tö Koxkyabu

²⁴ Jowanpae Mosa ang kaxtom fa,

²⁵ ija a Arun hia chix sasün hwom ang ochax tö kox angkya bama ibibi wanlombu kox angkya hanpakma. Ochax tö hanpak ang kox angkya müi a tö-tsap zongma shuakuxchi ma langüi, ija kha a zokle ashunkya tö kox angkya müibu langkya nui changle. Ija a müimamakya otsao tuita changle.

²⁶ Nguapa owae ija müi tö koxüihex, chixe ija otsao nui, Jowanpa ngwotnui Nyihom nya-o ma saxüi.

²⁷ Khünake chichangba tütalie wüi changkoxchu ija omüi to lyetle jangchangdao, ija otsao tsak-zonge ija to thomzünle changüi. Nyiza tütali to müi aji füi lyetle jangchangdao, ija a otsao nui ma so angkya changpu.

²⁸ Haxtik tuita ningkya chang koxle ija müi atole changdaokya tik a akhix angkya changpu, ilaxle jan tiklak twonle jangchangdao, ija müile fwotüi ilaxle ti füi sole atsaoüi.

²⁹ Nguapa homkha angkya lüka pangnue ija tö sax ang tsuak; ija a müimamakya otsao changle.

³⁰ Ikoxlechu ija müi aji Nyihom to apüilaxle ochax pao angkya zomzingle jangchangdao, ija omüi a chisaxüi; ija a zokle ashun angkya oli.