LIWI 5 - OTSAO BAIBEL (BSI)

Ochax Tö Kox angkya Olombu

¹ Ochax tö kox angkya a ibibi olom ma tüile. Nang a pünpa-chongwang hwome chemle pang changpuix ija kaxtik ang khwa to se ikoxlechu nange chem ngünpuix ija bama mikngün hia natat bama kax chemchu chingaile jangchang, ija bama nange sikngün apong angkya wüi changle.

² Nange chitex-chile le zanglom ma chitsaokya oli to twonle jangchang, thütba: Müimang ningkya to, nange chichang fang changle hüidaoa ma thaikya awanle hüikya füi tomle nang a chitsaokya ang changüna.

³ Nange chitex-chile le khünak makhange hüikya chitsaokya oli to twonle jangchangdao, ija tüta ningkya wüi chang koxlax, ma thaikya awanle hüikya füi tomle nang a chitsaokya ang changpu.

⁴ Nange jansuma tsaosaxle jangchang, tüta ningkya bama wüi chang koxlax, nange ija awanle hüikya füi tomle nang a thaikya ang changdaoa.

⁵ Chemtue nang thaikya ang changpuix, nange nang ochax ngai angkya wüi changpu,

⁶ ilaxle ija nang ochax tsangthomle tö kox ang, nange Jowanpa hato chun chichangba zwon zwonnu tuita apüile kox angkya oli changpu.

⁷ Nange ija chun chichangba zwon apüile kox ang chitho thüiningle, nange Jowanpa hato nang ochax tsangthom ang osu anyi chichangba jua-o anyi, tuita a ochax tö hanpak ang ilaxle tuita a zokle ashunkya tö hanpak angle apüile kox angkya oli changpu.

⁸ Nange ija nguapa hato apüile koxüi; chixe osa tuita pongwang ma ochax tö ang koxle kopüi. Chixe ija osa ongom azop lanlaxle chiafün homle langüi

⁹ ilaxle ija aji hidaole tö-tsap osyen to saküi. Aji mama a tö-tsap chitong ma ajenle awütüi. Ija a ochax pao angkya tö changüi.

¹⁰ Ifüima chixe mama osa a, zanglom ma tüikya ningle zokle ashunkya tö ang koxüi. Ile nguapae nang ochax hanpakma tö koxüi, ilaxle nang ang ochax thailak tüiüi.

¹¹ Nange osu anyi chichangba jua-o anyi kox ang ngaxchu chithole jangchang, nange ankhix tuak anyi tukux ochax tö hanpak ang apüiüi. Nange ikhato olip münga chichangba ongam müikya oli chemchu chiawonüi, chemthüikoxle ija a ochax tö hanpak changle, saxziak to hanpak münchang.

¹² Nange ija nguapa hato apüiüi. Ija pangnu tsyen ang chakpuix tuita lax üntoxle nguapae Jowanpa ang süt tö hanpak ang tö-tsap ding ma zokle ashunle tö koxüi. Ija a ochax pao angkya tö ang changle.

¹³ Ija ningle nguapae nang ochax hanpakma tö koxüi, ilaxle nang ang ochax thailak tüiüi. Ota tüikya ankhix a, saxziak hanpak tö koxpongkya ningle nguapa kux ang changüi.

Tsangthom angkya Töbu

¹⁴ Jowanpae Mosa ang ibibi wanlom kox.

¹⁵ Hünzom kha angkya owawae chitex-chile le Jowanpa tsyen kox angkya otsao süntom chikoxle ochax lyenkya mix jangtüi, nange ija tsangthom hanpak ang Jowanpa hato ofwot chitüikya chun chichangba zwon ola tuita apüile kox angkya changpu. Ija thathüt a tyale thomdaokya onok thathüt ma thütle changüi.

¹⁶ Nange Zang süntswon chem kox angkya hex ija koxüi ilaxle ija to nüile othom tsa bole kox angkya changle. Nange ija nguapa chak to koxüi. Nguapa ija nang ochax hanpak ang tö koxüi, ilaxle nange ochax thailak ataküi.

¹⁷ Hünzom kha angkya owawae chitex-chile le Jowanpa kaxtombu amale jangchang, nang thaidaoa idaile ija tsang thom angkya wüi changpu.

¹⁸ Nange ija tsangthom hanpak ang nguapa hato ofwot chitüikya chun chichangba zwon ola tuita apüile kox angkya changpu. Ija otha a onok ziathop ma thütle chang angkya oli. Nange chitex-chile le thaidaokya ochax tsangthom ang nguapae ija tö koxüi, ilaxle nang ochax thailak tüiüi.

¹⁹ Ija a Jowanpa zongto nange ochax lyenle changdaokya tsangthom tö tuita changpu.